Atɔ Lɛsunahɛ 7 - Bulu Ntam Pɔpwɛ mʋ́a Israel Ɩlʋ

Bulu Aha Mpɩm Lafakʋlɛ Adʋana-na (144,000)

¹ Ɩnɩ ɔma a, nowun Bulu-abɔpʋ ana, bʋlɩɩ ɔyɩ afʋnka ana amʋ fɛ́ɛ́sʋ. Bʋdɛ afu afʋnka ana amʋtɔ kinkiinkin, mɛnɩ ɩmɛ́ɛtra tsʋn ɔsʋlʋsʋ, ɔpʋsʋ ntɛ oyi kʋkʋ.

² Ɩnʋ nowun ánɩ́ Bulu-ɔbɔpʋ bamba dɛdalɩ tsu owi ɔdalɩkpa. Ɔdɛ Bulu Ɔkɩankpapʋ atɔá ɔtɔpʋhɩɛ mʋ aha nsʋ. Mʋʋ ɔlɔsʋra okitikiti kʋklʋkʋʋ kpoli abɔpʋ ana amʋʋ Bulu lɛha amʋ́ tumi ɔbɛɛ, bʋbeyinta ɔsʋlʋ mʋ́a ɔpʋ amʋ.

³ Bulu-ɔbɔpʋ amʋ lɛbla Bulu-abɔpʋ ana amʋ ɔbɛɛ, “Mlɩmáyinta ɔsʋlʋ ntɛ ɔpʋ ntɛ oyi kʋkʋ, yɔfʋn brɛá nɔ́pʋ atɔ hɩɛ mɩ Bulu asumpʋ ɔsʋkpɩ nsʋ asa.”

⁴ Ɩnʋ bɛkla aha amʋʋ bapʋ Bulu atɔ hɩɛ amʋ́ nsʋ amʋ fɛ́ɛ́. Amʋ́ ɔdʋdʋɔ bʋgyi aha mpɩm lafakʋlɛ adʋana-na (144,000). Amʋ́ fɛ́ɛ́ botsu Israel abusuan duanyɔ amʋtɔ.

^5-8 Bɛhɩɛ aha mpɩm duanyɔ (12,000) nsʋ abusuan amʋ kugyikʋtɔ. Abusuan amʋ ada gyi, Yuda, Ruben, Gad, Asa, Naftali, Manase, Simeon, Lewi, Isakɩar, Sebulon, Yosef pʋ́ Benyamin.

Ɔdɔm Ánɩ́ Botsu Ɔmá-ɔmátɔ

⁹ Ɩnɩ ɔma a, nowun ɔdɔm kʋá ɔhaa mɛ́ɛtalɩ kla amʋ́. Botsu ɔmágyiɔmá, abusuangyiabusuan, ɔsʋlʋsʋ aha ɔtsan-ɔtsan pʋ́ ɔblɩgyiɔblɩtɔ. Bʋlɩɩ owie obia amʋ pʋ́ Okufabi amʋ ansɩtɔ. Bɔwa liga fututuutu, bʋdɛ mbla.

¹⁰ Bɔsʋra okitikiti kʋklʋkʋʋ bɛɛ, “Anɩ Bulu amʋʋ otsie owie obiasʋ pʋ́ Okufabi amʋ tɔhɔ aha nkpa!”

¹¹ Ɩnʋ a, Bulu-abɔpʋ amʋ fɛ́ɛ́ bɛlɩɩ bomli owie obia amʋ pʋ́ ahandɛ adʋanyɔ-na amʋ pʋ́ akɩankpapʋ ana amʋ. Bemli bun, pʋ ansɩtɔ bun ɔsʋlʋtɔ owie obia amʋ ansɩtɔ, sum Bulu,

¹² blɩ bɛɛ, “Amen! Ɩkanfʋ, numnyam, nyansa, ɩpan, obú, tumi pʋ́ ɔwʋnlɩn ɩbwɛ mʋ klɛ brɛ fɛ́ɛ́! Amen!”

¹³ Ɩnʋ ahandɛ amʋtɔ ɔkʋlɛ lɛfɩtɛ mɩ ɔbɛɛ, “Amɛndɩ gyi aha anfɩ bɔwa liga fututuutu anfɩ? Nkʋnʋ botsu?”

¹⁴ Mʋʋ nɛbla mʋ mbɛɛ, “Ɔhandɛ, fʋ yin.” Mʋʋ ɔlɛbla mɩ ɔbɛɛ, “Aha anfɩ gyi aha ánɩ́ batsʋn asʋn wunhɛ kpɔnkpɔntɩ amʋtɔ dalɩ nɩ. Amʋ́ lafwɩ amʋ́ atadɩɛ Okufabi amʋ obugyatɔ, ɩlafuli fututuutu nɩ.

¹⁵ Mʋ́ sʋ bʋlɩɩ Bulu owie obia amʋ ansɩtɔ, bʋdɛ mʋ sum ɔpa-onye mʋ ɔtswɛkpa ɩnʋ nɩ. Ɔha amʋʋ otsie owie obia amʋsʋ ɛ obétsia amʋ́tɔ, bun amʋ́sʋ.

¹⁶ Akʋn mʋ́a ɔmɛwʋlɩ mɛ́ɛtra kɩta amʋ́, owi ntɛ ɔpawi ɛ ɩmɛ́ɛtra tɔ amʋ́.

¹⁷ Tsufɛ Okufabi amʋʋ ɔlɩɩ Bulu owie obia amʋ asɩ amʋ ɔbɔ́bwɛ amʋ́ ɔkpapʋ. Obégya amʋ́ nkpa, kpa amʋ́ ya nkpa-ntsu amʋ ɔwɩkpa, anɩ Wie Bulu obétsitsi amʋ́ ansɩ ntsú fɛ́ɛ́.”