Atɔ Lɛsunahɛ 5 - Bulu Ntam Pɔpwɛ mʋ́a Israel Ɩlʋ

Okufabi Amʋ Ɔwʋlʋ Amʋ Tii

¹ Ɩnɩ ɔma a, nowun ánɩ́ ɔha amʋʋ otsie owie obia amʋsʋ amʋ dɛ ɔwʋlʋ kuntahɛ mʋ gyɔpɩtɔ. Bɔwanlɩn atɔ dɩnka mʋ́ nkpa mʋ́a mʋ́ ɔma fɛ́ɛ́, bɔpʋ okpin tan mʋ́ ɔnɔ tse sienɔ.

² Ɩnʋ nowun Bulu-ɔbɔpʋ otumipʋ ɔkʋá ɔdɛkplʋn fɩtɛ ɔbɛɛ, “Ma lɔfʋn ánɩ́ ɔbɛ́maɩn atɔ asienɔ anfɩ, tii ɔwʋlʋ amʋ ɔnɔ?”

³ Bʋmenya ɔhaa ɔsʋsʋ ntɛ ɔsʋlʋsʋ ntɛ ɔsʋlʋ ayasɩá ɔbɛ́talɩ tii mʋ́ ɔnɔ, kla mʋ́.

⁴ Ɩnɩ sʋ nɛhɩɛ su, tsufɛ bʋmenya ɔha ánɩ́ ɔlɔfʋn, obétii ɔwʋlʋ amʋ ntɛ ɔbɛ́kla mʋ́.

⁵ Ɩnʋ ahandɛ amʋtɔ ɔkʋlɛ lɛbla mɩ ɔbɛɛ, “Mátra su. Kɩ, Yuda abusuantɔ Gyata, ogyi Owie Dawid mʋ na amʋ lagyi ɩsʋ. Ɔlɔfʋn ánɩ́ ɔbɛ́maɩn atɔ asienɔ amʋ, tii ɔwʋlʋ amʋ ɔnɔ.”

⁶ Ɩnʋ nowun Okufabi ɔkʋ. Ɩlɛlɩan ánɩ́ bapʋ mʋ ha igyi kɩ. Ɔlɩɩ owie obia amʋ, akɩankpapʋ ana amʋ pʋ́ ahandɛ adʋanyɔ-na amʋ nsɩnɛ. Ɔbʋ nsiebi asienɔ pʋ́ ansibi asienɔ. Mʋ ansibi asienɔ amʋ gyi ɔŋɛ asienɔá Bulu tɔwa sɩsɩ ɔsʋlʋ anfɩsʋ ɔtɩnɛgyiɔtɩnɛ nɩ.

⁷ Okufabi amʋ lɛdalɩ ba nkpa, ɔlɔbɔhɔ ɔwʋlʋ amʋ lɛ ɔha amʋʋ otsie owie obiasʋ amʋ gyɔpɩtɔ.

⁸ Ɩnʋ mbwɩ amʋʋ bʋkɩ nkpa ana amʋ pʋ́ ahandɛ adʋanyɔ-na amʋtɔ okugyiɔkʋ lemli bun Okufabi amʋ ansɩtɔ. Okugyiɔkʋ dɛ ɔsankuo pʋ́ sika pɛpɛ blanwebiá ɔhɩɛn bɔ mʋ́. Bulu aha mpaɩ gyi ɔhɩɛn anfɩ.

⁹ Akɩankpapʋ ana amʋ pʋ́ ahandɛ adʋanyɔ-na amʋ bʋdɛ ɩlʋ pɔpwɛ wa bɛɛ, “Fʋlɔfʋn ánɩ́ fótsu ɔwʋlʋ amʋ, maɩn atɔ asienɔ amʋʋ bɔpʋtan mʋ́ ɔnɔ amʋ. Tsufɛ bɔpʋ fʋ ha igyi, fɔpʋ fʋ obugya hɔ aha ha Bulu. Fɔhɔ aha abusuangyiabusuan, ɔblɩgyiɔblɩ, ɔmágyiɔmá pʋ́ ɔsʋlʋsʋ aha ɔtsan-ɔtsan fɛ́ɛ́tɔ.

¹⁰ Fayaɩ fʋ iwie ogyikpa ha amʋ́, fabwɛ amʋ́ fʋ igyi ahapʋá bétsia ha anɩ Bulu amʋ igyi. Bégyi iwie ɔsʋlʋsʋ.”

¹¹ Nɛlakɩ, nonu Bulu-abɔpʋ tsɔtsɔɔtsɔ ɔmɛ. Bʋhɩɛ bʋtsɔá bʋma ɩklatɔ. Bobomli owie obia amʋ mʋ́a akɩankpapʋ amʋ pʋ́ ahandɛ adʋanyɔ-na amʋ.

¹² Bɔpʋ ɔmɛ kpɔnkpɔɔnkpɔntɩ wa ɩlʋ bɛɛ, “Okufabi amʋʋ bɔpʋha igyi amʋ lɔfʋn ha tumi, ɩwɩnya mʋ́a nyansa pʋ́ awutɔ ɔwʋnlɩn, ɩdayile mʋ́a numnyam pʋ́ kanfʋ.”

¹³ Ɩnʋ nonu atɔá Bulu lɔbwɛ fɛ́ɛ́ ɔmɛ. Mʋ́a ɩbʋ ɔsʋ mʋ́a asɩ, ɔsʋlʋ ayasɩ pʋ́ ɔpʋtɔ fɛ́ɛ́, bʋdɛ ɩlʋ wa bɛɛ, “Kanfʋ, ɩdayile, numnyam pʋ́ tumi fɛ́ɛ́ iletsia ɔha amʋʋ otsie owie obiasʋ amʋ pʋ́ Okufabi amʋ brɛ fɛ́ɛ́!”

¹⁴ Mʋʋ akɩankpapʋ ana amʋ bɛblɩ bɛɛ, “Amen!” Ɩnʋ ahandɛ adʋanyɔ-na amʋ bemli bun sum Bulu mʋa Okufabi amʋ.