Atɔ Lɛsunahɛ 4 - Bulu Ntam Pɔpwɛ mʋ́a Israel Ɩlʋ

Ɔsʋsʋ Bulusum

¹ Ɩnɩ ɔma a, nɛlawun atɔ bamba. Nowun ánɩ́ obu lafinki ɔsʋsʋ. Nɛlanu ɔmɛ amʋʋ ilegyankpa bla mɩ asʋn amʋ. Ɔmɛ amʋ igyi fɛ ɔkpɛ. Ɔlɛbla mɩ ɔbɛɛ, “Dʋ ba nfɩ, mɩ ansuna fʋ tɔá ilehian ánɩ́ ɩbɛ́ba ɩnɩ ɔma.”

² Bulu Ɔŋɛ lɛba mɩsʋ ɔtsawʋlɛ pɛ. Mʋ́á nowun a, owie obia kʋ tsie ɔsʋsʋ ɩnʋ, ɔkʋ tsie mʋ́sʋ.

³ Ɔha amʋʋ otsie mʋ́sʋ amʋ ɩwɩ dɛ ogya kpa fɛ abwi wanklaan kʋá igyi pɛpɛ mʋ́a fututu. Mʋ́ ɔtɩnɛkʋ ɛ igyi fɛ nyankpʋtaa, ɩdɛ ogya kpa bomli owie obia amʋ fɛ ibwi wanklaan kʋá igyi fɩta bɔbwɛ.

⁴ Owie-mbia adʋanyɔ-na itsie bomli owie obia amʋ. Ahandɛ adʋanyɔ-na bɔwa atadɩɛ fututu bʋtsie mbia amʋsʋ, bʋbun sika pɛpɛ ɩpa.

⁵ Ɩnʋ nyankpʋ lɔwa ɩbɩ fwɩ bɩ. Odekpie, ɔprada dɛpʋtɩ dalɩ owie obia amʋtɔ. Ibia asienɔ ɩlɩɩ owie obia amʋ ansɩtɔ, idetsii. Mʋ́gyi Bulu Ɔŋɛ asienɔ amʋ nɩ.

⁶ Nowun glaasɩ ɔpʋ kʋá mʋ́sʋ ɩdɛ ogya kpa fɛ atsufolibi, ɩda owie obia amʋ ansɩtɔ. Mbwɩ akʋá bʋkɩ nkpa ana, ansibi iduadua amʋ́ nkpa mʋ́a ɔma fɛ́ɛ́, bobomli owie obia amʋ ɔbʋn nsɩnɛ ɩnʋ.

⁷ Amʋ́tɔ ogyankpapʋ gyi fɛ gyata. Onyɔsɩ gyi fɛ ɔnantswie yinhɛ. Ɔsasɩ ansɩtɔ igyi fɛ nyankpʋsa, ɔnasɩ ɛ gyi fɛ oyitsuá odefuli.

⁸ Okugyiɔkʋ bʋ abamba asie, ansibi iduadua mʋ́tɔ mʋa mʋ́ ɔma fɛ́ɛ́. Bʋdɛ ɩlʋ wa ɔpá onye bɛɛ, “Wankɩ, wankɩ, wankɩ gyi anɩ Wie Bulu Otumipʋ. Mʋletsia, otsie, ɔbɛ́laba.”

⁹ Mbwɩ amʋ bʋtɔwa ɩlʋ amʋ, pʋ numnyam, obú mʋ́a ɩpan ha ɔha amʋʋ otsie owie obia amʋsʋ, omóowu ɛkɛkɛɛkɛ amʋ. Nɩ bɔbwɛ mʋ́ alɩ a,

¹⁰ ahandɛ adʋanyɔ-na amʋ ɛ bamli bun ɔha amʋʋ otsie owie obiasʋ amʋ ansɩtɔ sum mʋ. Mʋbʋ ɩnʋ brɛ fɛ́ɛ́ nɩ. Fówun babwii amʋ́ owiepa amʋ tswɩ obia amʋ ansɩtɔ blɩ bɛɛ,

¹¹ “Anɩ Wie pʋ́ anɩ Bulu! Fʋlehian ánɩ́ abɔ́pʋ obú, numnyam mʋ́a tumi ha, tsufɛ fʋlɔbwɛ atɔ fɛ́ɛ́. Fɔbwɛ togyitɔ fʋ apɛtɔ. Mʋ́ fɛ́ɛ́ ɩlaba mʋ́tɔ.”