Atɔ Lɛsunahɛ 22 - Bulu Ntam Pɔpwɛ mʋ́a Israel Ɩlʋ

Nkpa-ntsu Tsʋnhɛ

¹ Ɩnʋ Bulu-ɔbɔpʋ amʋ losuna mɩ nkpa-ntsu amʋʋ ɩlɔwankɩ fɛ ahʋhwɛ amʋ. Ɩdɛtsʋn tsu Bulu mʋa Okufabi amʋ owie obia amʋtɔ.

² Ntsu amʋ ɩna brɔnʋ yileá ɩda wulu amʋ nsɩnɛ. Nkpa-oyi ɩlɩɩ ntsu amʋ agbemgbe anyɔ amʋsʋ, itoswie abi ɔtsan-ɔtsan ɔtsragyiɔtsra. Itoswie tse duanyɔ ofi ɔkʋlɛtɔ. Mʋ́ afɩta ɛ igyi afa ha ɔmá fɛ́ɛ́tɔ aha.

³ Togyitɔá Bulu lalwɩɩ mʋ́ méetsia wulu amʋtɔ. Mboun Bulu mʋa Okufabi amʋ owie obia obétsia ɩnʋ, mʋ asumpʋ bósum mʋ.

⁴ Bówun mʋ ansɩtɔ, mʋ ɩda ɛ bɛ́dɩnka amʋ́ ɔsʋkpɩ.

⁵ Owi mɛ́ɛtra ta ɩnʋ ɛkɛkɛɛkɛ. Bʋmɛ́ɛtra hian ɔkandɩɛ ntɛ owi, tsufɛ anɩ Wie Bulu ɔbɔ́wankɩ wʋlɩ amʋ́sʋ. Bégyi iwie brɛ fɛ́ɛ́.

Yesu Ɩba

⁶ Ɩnʋ Bulu-ɔbɔpʋ amʋ lɛbla mɩ ɔbɛɛ, “Asʋn anfɩ bʋ mʋ́tɔ, igyi ɔnɔkwalɩ. Anɩ Wie Bulu tɛlɛ tɔá ɩbɛ́ba suna mʋ ɔnɔsʋ atɔɩpʋ. Mʋlawa mʋ ɔbɔpʋ ɔbɛɛ, ɔbɛ́lɛ tɔá ɩbɛ́ba nkɛ anfɩtɔ suna mʋ asumpʋ.”

⁷ “Kɩ! Ɩmɔ́ɔwa ɔpá nɛ́ba! Ɔwʋlʋ anfɩtɔ asʋn bɛ́ba mʋ́tɔ. Mʋ́ sʋ Bulu obóyula ɔha ánɩ́ olegyi mʋ́ fɛ́ɛ́sʋ!”

⁸ Mɩ Yohane lonu asʋn anfɩ, nowun mʋ́ fɛ́ɛ́. Brɛá nonu asʋn anfɩ, nowun atɔ amʋ ɛ a, nemli bun Bulu-ɔbɔpʋ amʋʋ ɔlɛlɛ mʋ́ suna mɩ amʋ ayabitɔ, mbɛɛ ansum mʋ.

⁹ Tamɛ ɔlɛtra bla mɩ ɔbɛɛ, “Mábwɛ! Tsufɛ Bulu osumbi ngyi fɛ fʋa fʋ apio Bulu ɔnɔsʋ atɔɩpʋ, pʋ́ aha amʋʋ bégyi asʋn amʋʋ bɔwanlɩn wa ɔwʋlʋ anfɩtɔ amʋsʋ. Sum Bulu nkʋlɛ!”

¹⁰ Mʋʋ ɔlɛbla mɩ ɔbɛɛ, “Mápʋ atɔ lɛsunahɛ anfɩ ŋain, tsufɛ mʋ́ babɩ lafʋn ta.

¹¹ Ha lalahɛ ɔbwɛpʋ ɔyɔ mʋ lalahɛbwɛsʋ. Ifintɔ otsiapʋ otsia mʋ ifintɔ, yile ɔbwɛpʋ ɛ ɔkɩta mʋ yilebwɛtɔ. Ɔha ánɩ́ ɔbɛɛ, mɔ́pʋ mʋ ɩwɩ ha Bulu osi mʋ ɩwɩ ha Bulu.”

¹² Ɩnʋ Yesu lɛbla mɩ ɔbɛɛ, “Kɩ, ɩmɔ́ɔwa ɔpá nɛ́ba! Nɛba ɩkɔ ɔkakpa. Nɛ́ka ɔhagyiɔha ɩkɔ mʋ bwɛhɛ ɔnɔ.

¹³ Mɩgyi Alfa mʋ́a Omega. Ogyankpapʋ mʋ́a Ɔtrahɛ, asɩ Otsuapʋ pʋ́ ɔnɔ Ɔmɔpʋ.

¹⁴ “Bulu obóyula aha ánɩ́ bʋdɛ amʋ́ atadɩɛ fwɩ, mɛnɩ bɛ́talɩ nya ɔkpa tsʋn wulu yile amʋʋ ɩba amʋ ɔnɔ wie mʋ́tɔ yegyi nkpa-oyi amʋ abi.

¹⁵ Akɩaɩ obésin ɩban amʋ ɔma. Amʋ́ gyi; atɔ alapʋ, mbʋa atɔpʋ, aha amɔpʋ, ɩkpɩ atswɛpʋ pʋ́ aha ánɩ́ bʋtekle afunu, bʋtɔwa mʋ́ ɛ fɛ́ɛ́.

¹⁶ “Mɩ Yesu lawa mɩ ɔbɔpʋ mbɛɛ, ɔba bɛbla fʋ asʋn anfɩ, afʋpʋbla Akristofɔ ɔpasua amʋ fɛ́ɛ́. Mɩgyi Owie Dawid mʋ na, mʋ atɔ ogyipʋ pʋ́ Bakɛ Ɔtsrakpabi wankɩhɛ amʋ nɩ.”

¹⁷ Ɩnʋ Bulu Ɔŋɛ amʋ pʋ́ ɔka pɔpwɛ amʋ bɛblɩ bɛɛ, “Ba!” Ɔhagyiɔha ánɩ́ onu asʋn anfɩ ɔblɩ ɔbɛɛ, “Ba!” Ɔhagyiɔha ánɩ́ ɔmɛwʋlɩ dɛ mʋ ɔba. Ɔhagyiɔha ánɩ́ odekle ɔba, Bulu okie mʋ nkpa-ntsu amʋ.

Ɩtrahɛ

¹⁸ Mɩ Yohane, ndɛ ɔhagyiɔha ɔla da kpakpaakpa. Mbɛɛ, nɩ ɔkʋ lonu atɔ lɛsunahɛ ɔwʋlʋ anfɩtɔ asʋn, ɔlɔpʋ kʋ tsɩa mʋ́tɔ a, Bulu ɛ ɔbɛ́ha asʋn wunhɛá ɩbʋ ɔwʋlʋ anfɩtɔ ɩbɛ́ba mʋsʋ.

¹⁹ Nɩ ɔkʋ ɛ lɛlɛ tɔkʋ tsu ɔwʋlʋ anfɩtɔ a, mʋmʋ Bulu ɛ ɔbɛ́lɛ mʋ ogyikpa ánɩ́ ɩbʋ nkpa-oyi amʋ pʋ́ wulu wankɩhɛ amʋʋ nɔwanlɩn mʋ́ ɩwɩ asʋn wa ɔwʋlʋ anfɩtɔ amʋtɔ.

²⁰ Ɔha amʋʋ ɔdɛ ntobi anfɩ ɩwɩ adansɩɛ gyi ɔnɔkwalɩsʋ amʋ ɔbɛɛ, “Ee! Ɩmɔ́ɔwa ɔpá nɛ́ba!” Amen! Owie Yesu, ba!

²¹ Anɩ Wie Yesu ogyi Bulu aha bʋalɛ!