Atɔ Lɛsunahɛ 21 - Bulu Ntam Pɔpwɛ mʋ́a Israel Ɩlʋ

Ɔsʋsʋ Mʋ́a Ɔsʋlʋ Pɔpwɛ

¹ Ɩnʋ nowun ɔsʋsʋ mʋ́a ɔsʋlʋ pɔpwɛ, tsufɛ ɔsʋsʋ mʋ́a ɔsʋlʋ gyankpapʋ amʋ ɩtra ma ɩnʋ. Ɔpʋ ɛ tra ma ɩnʋ.

² Mʋʋ nowun wulu wankɩhɛ, igyi Yerusalem pɔpwɛ amʋ, ɩdɛkplɩ tsu Bulu wa ɔsʋsʋ ɩba. Bulu lɛhɩhɩɛ mʋ́ fɛ ɔtsɩá bawa mʋ atɔ wanklaan, oyefia mʋ klu.

³ Nonu ɔmɛ kpɔnkpɔntɩ kʋá ɩlɛlɩn tsu owie obia amʋ asɩ ɔbɛɛ, “Kɩ! Sei mʋ́ a, Bulu otsiakpa laba anyankpʋsatɔ. Obétsia amʋ́tɔ, bɔ́bwɛ mʋ aha. Mʋ onuto obétsia amʋ́tɔ, ɔbɔ́bwɛ amʋ́ Bulu.

⁴ Obétsitsi amʋ́ ntsú fɛ́ɛ́. Lowu ntɛ isu ntɛ ipian ntɛ asʋn wunhɛ kʋkʋ ɛ ɩmɛ́ɛtra tsia, tsufɛ atɔ dada amʋ fɛ́ɛ́ ɩlatsʋn.”

⁵ Mʋʋ owie obiasʋ otsiapʋ amʋ lɛblɩ ɔbɛɛ, “Kɩ, ndɛ togyitɔ bwɛ pɔpwɛ.” Mʋʋ ɔlɛlabla mɩ ɔbɛɛ, “Wanlɩn asʋn anfɩ tswɩ, tsufɛ mʋ́ fɛ́ɛ́ ɩbʋ mʋ́tɔ, igyi ɔnɔkwalɩ.”

⁶ Mʋʋ ɔlɛtra bla mɩ ɔbɛɛ “Nabwɛ mʋ́ fɛ́ɛ́ ta. Mɩgyi Alfa mʋ́a Omega, Ogyankpapʋ mʋ́a Ɔtrahɛ. Nɛ́ha ɔha ánɩ́ ɔmɛwʋlɩ dɛ mʋ nkpa-ntsu, ɔmɛ́ɛka mʋ́ ɩkɔ.

⁷ Nɔ́pʋ oyula anfɩ ha ɔha ánɩ́ olegyi ɩsʋ. Nɔ́bwɛ mʋ Bulu, mʋ ɛ ɔbɔ́bwɛ mɩ bi.

⁸ Tamɛ afupʋá beyinki mɩ ɔma, aha ánɩ́ bʋmɔhɔ mɩ gyi, mbusuo abɔpʋ, aha amɔpʋ, mbʋa atɔpʋ, atɔ alapʋ, ɩkpɩ atswɛpʋ pʋ́ afunupʋ fɛ́ɛ́ otsiakpa gyi ogya patɩ kpɔnkpɔntɩ, ogya mʋ́a atonkodu ɩhɩɛ detsii mʋ́tɔ. Ɩnɩ gyi lowu nyɔsɩ amʋ nɩ.”

Yerusalem Pɔpwɛ

⁹ Ɩnʋ Bulu-abɔpʋ abasienɔ amʋʋ bʋdɛ ablanwɛn asienɔ amʋʋ asʋn wunhɛ asienɔ trahɛ ɩbɔ mʋ́ amʋtɔ ɔkʋlɛ lɛba bɛbla mɩ ɔbɛɛ, “Ba, ansuna fʋ ɔtsɩá Okufabi amʋ ɔba betsia.”

¹⁰ Ɩnʋ ɔlɛkpa mɩ Ɔŋɛtɔ ya ɩbʋ fʋahɛ kpɔnkpɔɔnkpɔntɩ kʋsʋ, olosuna mɩ Yerusalem wulu wankɩhɛá ɩdɛkplɩ tsu ɔsʋsʋ Bulu wa ɩba.

¹¹ Bulu numnyam dɛwankɩ wʋlɩ wulu amʋsʋ. Ɩhɩɛ dɛwankɩ hʋnanana fɛ atsufolibi, ɩdɛ ogya kpa fɛ ahʋhwɛá mʋ́ ansɩtɔ lɔwankɩ.

¹² Bɔpwɛ bunti trihɛ fʋahɛ kʋ bomli mʋ́, ɩbʋ aklʋn akpɔnkpɔntɩ duanyɔ. Bulu-abɔpʋ duanyɔ bʋdɛ aklʋn amʋ ɔnɔ gyo. Bɔwanlɩn Israel abusuan duanyɔ amʋ ada dɩnka aklʋn amʋsʋ ɩkʋlɛ-kʋlɛ.

¹³ Aklʋn asa bʋ owi ɔdalɩkpa. Asa bʋ owi ɔkplɩwiekpa, asa bʋ ɔsʋsʋ, asa ɛ bʋ ayasɩ.

¹⁴ Beyi bunti amʋ dɩnka abwi yileyile duanyɔsʋ. Bɔwanlɩn Okufabi amʋ sumbi ayɔpʋ amʋ ada dɩnka abwi amʋsʋ ɩkʋlɛ-kʋlɛ.

¹⁵ Bulu-ɔbɔpʋ amʋʋ ɔdɛ mɩ asʋn bla amʋ dɛ sika pɛpɛ oyiá bʋtɔpʋsusu atɔ. Ɔbɔ́pʋsusu wulu amʋ, mʋ́ abunti pʋ́ aklʋn ánɩ́ ilobomli mʋ́ fɛ́ɛ́.

¹⁶ Wulu amʋ ɩswɩtɔ pʋ́ mʋ́ tɛɩtɔ fɛ́ɛ́ igyi kɛkɛ. Brɛá olosusu mʋ́ a, mʋ́ ɩswɩtɔ, mʋ́ tɛɩtɔ pʋ́ mʋ́ fʋatɔ fɛ́ɛ́ igyi maɩlɩ ɔpɩm-ɔkʋlɛ lafana (1,400).

¹⁷ Ɩnʋ olosusu bunti amʋ tritɔ ɛ. Igyi ayabi lafanyɔ mʋ́a duasie (216), nyankpʋsa atosusuhɛ ɔnɔ.

¹⁸ Abwiá igyi fɛ ahʋhwɛ bɔpʋpwɛ abunti amʋ. Bɔpʋ sika pɛpɛá tɔtɔ mɛfra mʋ́, igyi fɛ glaasɩ pwɛ wulu amʋ.

¹⁹ Bɔpʋ abwiá ɩbʋ bia ɔtsan-ɔtsan duanyɔ wa abunti amʋ ntswɩasɩ. Abwi amʋ ada gyi, yaspa, safiri, agate, emerald.

²⁰ Oniks, kanelia, krisolit, beril, topas, krisopas, yasint pʋ́ ametiste.

²¹ Abuto wʋlɩhɛ fututu wanklaan duanyɔ bɔpʋbwɛ aklʋn amʋ. Ɩklʋn amʋ kugyikʋ igyi butobi fututu kʋlɛ. Sika pɛpɛá tɔtɔ mɛfra mʋ́, igyi fɛ glaasɩ bɔpʋwa abrɔnʋ wulu amʋtɔ. Fɛ́talɩ kɩ tsʋn mʋ́tɔ.

²² Mmowun Bulu ɔtswɛkpa kʋkʋ wulu amʋtɔ, tsufɛ Bulu Otumipʋ amʋ mʋa Okufabi amʋ gyi Bulu ɔtswɛkpa ɩnʋ.

²³ Wulu amʋ imehian owi ntɛ ɔtsra wankɩ mʋ́tɔ, tsufɛ Bulu numnyam tɔwankɩ ha mʋ́, Okufabi amʋ ɛ gyi mʋ́ ɔkandɩɛ.

²⁴ Ɔmá-ɔmá bɛ́natɩ wulu amʋ wankɩtɔ. Ɔyɩtɔ awie ɛ bɔ́pʋ amʋ́ numnyam ba mʋ́tɔ.

²⁵ Bʋméefin mʋ́ ɔnɔ aklʋn, tsufɛ oklun ma ɩnʋ.

²⁶ Ɔmá fɛ́ɛ́ bɔ́pʋ amʋ́ numnyam pʋ́ amʋ́ obú ba mʋ́.

²⁷ Togyitɔá mʋ́ ɩwɩ mɛtɩn, mbusuo abɔpʋ ntɛ afunupʋ bʋmóowie wulu amʋtɔ, nkɛtɩ aha amʋʋ bɔwanlɩn amʋ́ ada wa Okufabi amʋ nkpa ɔwʋlʋtɔ amʋ nkʋlɛ.