Atɔ Lɛsunahɛ 20 - Bulu Ntam Pɔpwɛ mʋ́a Israel Ɩlʋ

Bɔwa Ɔbʋnsam Ɩkan Nfi Ɔpɩm

¹ Ɩnʋ nowun ánɩ́ Bulu-ɔbɔpʋ ɔkʋ lɛkplɩ tsu ɔsʋsʋ. Ɔdɛ ɩlan klukluukluá ɩma ɔka saafɩ pʋ́ ɩkan kpɔnkpɔntɩ kʋ.

² Ɔlɛkɩta bʋtɩ, ogyi ɩwɔ dada amʋʋ bʋtɛtɩ mʋ Ɔbʋnsam ntɛ Satan amʋ, ɔlɔwa mʋ ɩkan nfi ɔpɩm-ɔkʋlɛ.

³ Ɔlɔtswɩ mʋ wa ɩlan klukluuklu amʋtɔ, fin mʋ́, wa mʋ́ ɔnɔ saafɩ, mɛnɩ Ɔbʋnsam mɛ́ɛtra talɩ mlɛ ɔmá-ɔmá amʋ. Nfi ɔpɩm amʋ ɔma asa bɛ́lɛ mʋ kpalobi.

⁴ Mʋ́ ɔma a, nowun awie-mbia kʋ. Aha amʋʋ baha amʋ́ ɔkpa ánɩ́ bégyi asʋn amʋ bʋtsie mʋ́sʋ. Nowun aha akʋ ɔkla. Amʋ́gyi aha ánɩ́ bɛtɩn amʋ́ Yesu ɩwɩ adansɩɛgyi pʋ́ Bulu asʋn ɔkanda sʋ nɩ. Amʋ́ kɛn gyi aha amʋʋ bʋmotsula sum ɔbwɩkɩta-atɔ amʋ ntɛ mʋ ɔkpɩ amʋ, bʋmotsula abʋpʋ mʋ nsʋhɩɛtɔ dɩnka amʋ́ ɔsʋkpɩ ntɛ amʋ́ ɩbasʋ nɩ. Bulu lɛha amʋ́ betsinki, amʋ́a Kristo begyi iwie nfi ɔpɩm-ɔkʋlɛ amʋtɔ.

⁵ Amʋ́ Bulu legyankpa kʋsʋa tsu afulitɔ nɩ. (Awupʋ atrahɛ bʋméetsinki, nkɛtɩ nfi ɔpɩm amʋ ɩlatsʋn.)

⁶ Bulu loyula mʋ aha agyankpapʋ amʋʋ ɔlɔkʋsʋa tsu afulitɔ amʋ. Amʋ́ mʋ́ a, lowu nyɔsɩ amʋ ɩma amʋ́sʋ tumi. Bɔ́bwɛ igyi ahapʋ ha Bulu mʋa Kristo, mʋa amʋ́nyɔ bégyi iwie nfi ɔpɩm-ɔkʋlɛ amʋ.

Satansʋ Gyi

⁷ Nfi ɔpɩm amʋ ɔma a, bɛ́lɛ Satan obu.

⁸ Ɔbɛ́dalɩ yɛmlɛ ɔmá-ɔmá ánɩ́ bʋbʋ ɔyɩ afʋnka ana, igyi Gog mʋa Magog amʋ, mɛnɩ ɔbɛ́kpa aha tsɔtsɔɔtsɔá bʋma ɩklatɔ buo ɩwɩ ya ɩsa.

⁹ Nowun ánɩ́ bɛnatɩ tsʋn ɔyɩtɔ fɛ́ɛ́, kafia Bulu aha pʋ́ amʋ́ wulu yileá Bulu tekle, tamɛ ogya lɛkpa tsu ɔsʋsʋ bɛhɩ amʋ́ akɔpʋ fɛ́ɛ́ plɩplɩplɩplɩ.

¹⁰ Ɩnʋ bɔtswɩ Ɔbʋnsam amʋʋ ɔlɛmlɛ amʋ́ amʋ wa obun ánɩ́ ogya mʋ́a atonkodu detsii mʋ́tɔ plɛnplɛnplɛntɔ. Mʋa ɔbwɩkɩta-atɔ amʋ pʋ́ mʋ ɔnɔsʋ atɔɩpʋ afunupʋ amʋ bétsia ɩwɩɔsɩntɔ ɔpa onye brɛ fɛ́ɛ́.

Asʋngyi Trahɛ

¹¹ Ɩnʋ nowun owie obia fututu kpɔnkpɔntɩ kʋá ɔkʋ tsie mʋ́sʋ. Nwʋlʋta mʋ́a ɔsʋlʋ bɛsrɩ si mʋ, tamɛ bʋmenya oŋainkpa.

¹² Nowun awupʋ, nyebi ahandɛ bʋlɩɩ owie obia amʋ ansɩtɔ. Bobwii nwʋlʋtɔ tswɩ. Bobwii nkpa ɔwʋlʋ amʋ ɛtɔ tswɩ. Ɩnʋ bɔpʋ tɔá nwʋlʋ amʋ ɩlɛblɩ tsu awupʋ amʋ bwɛhɛ ɩwɩ gyi amʋ́ asʋn.

¹³ Ɔpʋ lɛlɛ awupʋá bʋbʋ mʋtɔ ba. Lowu mʋa afulitɔ ɛ bɛlɛ amʋ́á bʋbʋ amʋ́tɔ ba. Bulu legyi okugyiɔkʋ asʋn mʋ bwɛhɛ ɔnɔ.

¹⁴ Ɩnʋ bɔtswɩ lowu mʋa afulitɔ fɛ́ɛ́ wa ogya ánɩ́ ɩtamaduntɔ. Ɩnɩ gyi lowu nyɔsɩ nɩ.

¹⁵ Bɔtswɩ ɔhagyiɔha ánɩ́ bʋmowun mʋ ɩda nkpa ɔwʋlʋ amʋtɔ ɛ wa ogya amʋtɔ.