Atɔ Lɛsunahɛ 2 - Bulu Ntam Pɔpwɛ mʋ́a Israel Ɩlʋ

Efeso Ɔpasua Nkla

¹ “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Efeso wulutɔ ɔbɔpʋ fɛɛ, “Ɔha amʋʋ ɔdɛ ntsrakpabi asienɔ mʋ gyɔpɩtɔ, ɔna sika pɛpɛ ɔkandɩɛ-oyi abambi asienɔ amʋ nsɩnɛ amʋ ɔbɛɛ:

² Nyin tɔá fʋdɛbwɛ fɛ́ɛ́. Nawun alɩá fʋhɩɛ fʋdɛ agyʋma yɔ, pʋ́ alɩá fʋdɛ nsi wa lɩɩ kinkin. Nyin ánɩ́ fʋtamakle aha lalahɛ asʋn. Fakapʋ aha amʋʋ bʋdɛ amʋ́ ɩwɩ tɩ Kristo sumbi ayɔpʋ amʋ, wun ánɩ́ afunupʋ bʋgyi.

³ Fotomi wun ipian mɩ sʋ, fʋmeyinki ɔma.

⁴ Tamɛ asʋn kʋlɛ pɛá mbʋ fʋ ɩwɩ gyi, ɔdwɛ ɩtra ma mɩa fʋnyɔ ntɛ fʋa fʋ aba nsɩnɛ fɛ gyankpapʋ amʋ.

⁵ Mʋ́ sʋ kaɩn alɩá tɛkɩ fʋgyi asa fadɩda. Damli klʋntɔ, afʋlatsia fʋ atsiabi. Nɩ megyi alɩ a, nɛ́ba bɛlɛ fʋ ɔkandɩɛ-oyi amʋ lɛ mʋ́ aba ɔpasua atrahɛ amʋtɔ.

⁶ Tamɛ toku kʋlɛá ɩbʋ alɛ fʋ ɩwɩ gyi, fʋtamakle Nikolai abuopʋ bwɛhɛ lalahɛ amʋ, fɛ alɩá mɩ ɛ ntamakle mʋ́.

⁷ “Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ. Nɛ́ha ɔha ánɩ́ olegyi ɩsʋ obégyi Paradiso ndobitɔ oyi-abi amʋʋ ɩtɛha nkpa amʋ.”

Smirna Ɔpasua Nkla

⁸ Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Smirna wulutɔ ɔbɔpʋ fɛɛ, “Ɔha amʋʋ ogyi Ogyankpapʋ mʋ́a Ɔtrahɛ, olowu lakʋsʋ tsu afulitɔ amʋ ɔbɛɛ:

⁹ Nyin fʋ ipian wunhɛ pʋ́ ohian ánɩ́ fʋdegyi, tamɛ fʋbʋ atɔ! Nyin alɩá ɔpasua amʋʋ bʋdɛ ɩwɩ kɩ bɛɛ, Yudafɔ bʋgyi amʋ bʋdɛ afunu wa dɩnka fʋsʋ. Megyi Yudafɔ bʋgyi, Ɔbʋnsam abuopʋ ɔpasua bʋgyi.

¹⁰ Máha ipian ánɩ́ ɩbɛ́ba fʋsʋ ɩwa fʋ ifu. Ndɛ fʋ bla, Ɔbʋnsam ɔbɛ́ha bɛ́kɩta mlɩtɔ akʋ tswɩ obu. Ɔbɔ́sɔ mlɩ kɩ. Bɛ́dɩnka fʋsʋ nkɛ du. Nɩ lowutɔ igyi o a, fʋ mʋ́ wa ɔnɔkwalɩ. Nɛ́ha fʋ ɩsʋgyi-ɩpa, igyi nkpa ánɩ́ ɩtamata.

¹¹ “Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ. Ɔhagyiɔha ánɩ́ olegyi ɩsʋ a, lowu nyɔsɩ amʋ ɩmɛ́ɛda mʋ.”

Pergamo Ɔpasua Nkla

¹² Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Pergamo wulutɔ ɔbɔpʋ fɛɛ, “Ɔha amʋʋ ɔbʋ ɔdayi ɩya anyɔ klakla amʋ ɔbɛɛ:

¹³ Nyin ánɩ́ fʋtsie ɔtɩnɛá Ɔbʋnsam owie obia tsie, tamɛ fʋdɛ fʋ hogyitɔ kinkiinkin. Brɛá bɔmɔ mɩ adansɩɛ ogyipʋ ɔnɔkwalɩpʋ Antipa mlɩ wa ɩnʋ kʋraa a, fʋmɛkpa mɩ ɔma.

¹⁴ Tamɛ mʋ́ o a, mbʋ fʋ ɩwɩ asʋn kpalobi kʋ. Mlɩtɔ akʋ bʋbuo Balaam amʋʋ olosuna Balak alɩá ɔbɔ́bwɛ Israelfɔ bɔ́bwɛ lakpan, ɔlɛha amʋ́ betsia wa atsɩ mʋ́a ayin asʋn, tsia gyi ɔkpɩtɔ-atɔ amʋ.

¹⁵ Alɩ kɛn akʋ bʋbʋ mlɩtɔá bʋbuo Nikolai atosunahɛ nɩ.

¹⁶ Mlɩdamli klʋntɔ. Nɩ megyi alɩ nóbofwie mlɩtɔ, pʋ mɩ ɔnɔtɔ ɔdayi amʋ kɔ amʋ́.

¹⁷ “Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ. “Ɔhagyiɔha ánɩ́ olegyi ɩsʋ obégyi atogyihɛ amʋʋ bɔpʋŋain amʋ kʋ. Nɛ́tra ha okugyiɔkʋ ibwi fututuá bɔwanlɩn ɩda pɔpwɛ dɩnka mʋ́sʋ. Mʋ nkʋlɛ ɔbɛ́bɩ ɩda amʋ. Ɔhaa mɛ́ɛbɩ mʋ́ tsɩa mʋtɔ.”

Tiatira Ɔpasua Nkla

¹⁸ Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Tiatira wulutɔ ɔbɔpʋ fɛ́ɛ́, “Bulu mʋ Bi amʋʋ mʋ ansibi igyi fɛ ogya ɔdandʋ, mʋ ayabiasɩ igyi fɛ kɔbrɩá bapʋwa ogya, plɩ mʋ́ ɩwɩ amʋ ɔbɛɛ:

¹⁹ Nyin fʋ bwɛhɛ fɛ́ɛ́. Nyin fʋ ahadwɛ, fʋ hogyi, fʋ osum agyʋma pʋ́ fʋ nsiwa lɩɩ kinkin. Nyin ánɩ́ fʋdɛbɩ bwɛ dʋn gyankpapʋ amʋ.

²⁰ Tamɛ asʋn ánɩ́ mbʋ ha fʋ gyi, faha ɔtsɩ amʋʋ bʋtɛtɩ mʋ Yesebel, ɔdɛ mʋ ɩwɩ tɩ ɔbɛɛ, Bulu ɔnɔsʋ ɔtɔɩpʋ amʋ dɛpʋ mʋ atosunahɛ mlɛ mɩ asumpʋ, bʋdɛ atsɩ mʋa ayin asʋn wa, bʋdɛ ɔkpɩtɔ-atɔ ɛ gyi.

²¹ Nakɩ mʋ ansɩtɔ ánɩ́ ɔbɛ́damli klʋntɔ bobuo Bulu, tamɛ omedekleá obési mbʋatɔ.

²² Mʋ́ sʋ nɛ́da mʋ, wa mʋ ɩlɔ. Obówun ipian. Nɩ mʋa aha amʋʋ bʋdɛ mbʋa tɔ amʋ ɛ bʋmesi, lɛ ɩwɩ lɛ mʋ́tɔ a, nɛ́ha amʋ́ bɛhɩɛ wun ipian.

²³ Nɔ́mɔ mʋ abuopʋ amʋ. Akristofɔ ɔpasua fɛ́ɛ́ bɛ́bɩá mɩgyi ɔha amʋʋ otowun aha klʋntɔ pʋ́ amʋ́ nwuntɔ asʋn amʋ nɩ. Nɛ́ka okugyiɔkʋ ɩkɔ mʋ bwɛhɛ ɔnɔ.

²⁴ “Tamɛ mlɩ aha trahɛ ánɩ́ mlɩlasi mlɩbʋ Tiatira wulutɔ, mlɩmobuo ɔtsɩ amʋ atosunahɛ amʋʋ bʋdɛ mʋ́ tɩ ‘Ɔbʋnsam asʋn ŋainhɛ> amʋ mʋ́ a, mmɔ́ɔpʋ atɔ sʋrahɛ kʋkʋ sʋra mlɩ.

²⁵ Tamɛ mlɩkɩta mɩ atosunahɛ amʋʋ mlɩbʋ amʋtɔ kinkiinkin yɔfʋn brɛá nɛ́ba.

²⁶ Nɛ́ha ɔha ánɩ́ olegyi togyitɔsʋ, ɔlɛtalɩ bwɛ mɩ apɛ yɔfʋn ɔyɩ ɔnɔmɔkɛ tumi, obégyi ɔmá fɛ́ɛ́sʋ.

^27-28 Ɔbɛ́kpa amʋ́ owuntɔlɩnsʋ, bwiebwie amʋ́ blublublu fɛ abʋa. Obénya tumi amʋʋ mɩ Sɩ lɔpʋha mɩ amʋ odu. Nɔ́pʋ mʋ bakɛ ɔtsrakpabi ha mʋ, pʋsuna ánɩ́ alagyi ɩsʋ.

²⁹ “Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ.”