Atɔ Lɛsunahɛ 19 - Bulu Ntam Pɔpwɛ mʋ́a Israel Ɩlʋ

¹ Ɩnɩ fɛ́ɛ́ ɔma a, nonu ɔmɛ kʋá igyi fɛ ɔdɔm ánɩ́ bʋdɛkplʋn kʋklʋkʋʋ ɔsʋsʋ. Bʋdɛblɩ bɛɛ, “Haleluia! Anɩ Bulu tɔhɔ aha nkpa. Mʋ nkʋlɛ bʋ tumi mʋ́a numnyam,

² tsufɛ mʋ ɩsʋbɩtɩ igyi ɔnɔkwalɩ, ɩda ɔkpa. Alabɩtɩ okipʋ kpɔnkpɔɔnkpɔntɩ amʋʋ ɔlɔpʋ mʋ obu-ɔnɔtsia yinta ɔyɩtɔ amʋ ɩsʋ, alafɩtɛ mʋ asumpʋ obugya tsu mʋ wa.”

³ Bʋtra bʋdɛkplʋn kʋklʋkʋʋ bɛɛ, “Haleluia! Wulu amʋ ogyasi lakʋsʋ yɔ ɔsʋsʋ brɛ fɛ́ɛ́!”

⁴ Ɩnʋ ahandɛ adʋanyɔ-na amʋ pʋ́ akɩankpapʋ ana amʋ bemli bun sum Bulu amʋʋ otsie owie obia amʋsʋ, blɩ bɛɛ, “Amen! Haleluia!”

Okufabi Amʋ Ɔka Otsiakɛ

⁵ Ɩnʋ ɔmɛ kʋ lɛlɩn tsu owie obia amʋtɔ ɔbɛɛ, “Mlɩ Bulu asumpʋá mlɩtenya mʋ ifu, nyebi ahandɛ fɛ́ɛ́, mlɩkanfʋ anɩ Bulu amʋ!”

⁶ Mʋ́ ɔma a, ɔmɛ tsɔtsɔɔtsɔ lɛlɩn, fɛ ntsu bʋlahɛ dɛtsʋn waa, ntɛ ɔprada dɛpʋtɩ kʋklʋkʋʋ ɔbɛɛ, “Haleluia! Anɩ Wie Bulu Otumipʋ amʋ dɛ iwie gyi.

⁷ Mlɩha anya ansigyi, ɩwɩ ɩsankɩ anɩ, awa mʋ numnyam! Tsufɛ Okufabi amʋ ɔka otsiakɛ lafʋn. Mʋ ka amʋ lahɩhɩɛ ɩwɩ ta.”

⁸ Bɛha mʋ ɔkpa bɛɛ, ɔwa ɔhrada atadɩɛá ɩlɔwankɩ, ɩdɛ ogya kpa. (Ɔhrada atadɩɛ anfɩ ɩlɩɩ ha Bulu aha yilebwɛ.)

⁹ Mʋʋ Bulu-ɔbɔpʋ amʋ lɛbla mɩ ɔbɛɛ, “Wanlɩn fɛ́ɛ́, ‘Bulu layula aha ánɩ́ alatɩ Okufabi amʋ ɔkatsia nkɛ amʋ asɩ.> ” Mʋʋ ɔlɛtra bla mɩ ɔbɛɛ, “Asʋn anfɩ igyi ɔnɔkwalɩ, Bulu wa itsu.”

¹⁰ Ɩnʋ nemli bun mʋ ayabitɔ, mbɛɛ ansum mʋ, tamɛ ɔlɛbla mɩ ɔbɛɛ, “Mábwɛ! Tsufɛ Bulu osumbi ngyi fɛ fʋa fʋ apio amʋʋ mlɩdɛ Yesu ɩwɩ adansɩɛ gyi amʋ. Sum Bulu nkʋlɛ pɛ! “Tsufɛ aha amʋʋ bʋdɛ Yesu ɩwɩ adansɩɛ gyi amʋ bʋbʋ Bulu ɔnɔsʋ asʋnblɩ ɔŋɛ.”

Ɔpɔnkɔ Fututusʋ Ɔdɩnkapʋ

¹¹ Ɩnʋ mʋa nówun a, ɔsʋsʋ lafinki. Nɛlakɩ a, ɔpɔnkɔ fututu ɔkʋ lɩɩ a! Mʋsʋ ɔdɩnkapʋ amʋ ɩda gyi, “Yile Ɔbwɛpʋ pʋ́ Ɔnɔkwalɩpʋ.” Otegyi asʋn, ɔtɔkɔ ɩsa ɛ ɔnɔkwalɩsʋ.

¹² Mʋ ansibi aklambi igyi fɛ ogya plɛnplɛn. Owiepa tsɔtsɔɔtsɔ ibun mʋ nwun. Ɔbʋ ɩda kʋá bɔwanlɩn dɩnka mʋsʋ, ɔhaa meyin mʋ́ tsɩa mʋtɔ.

¹³ Ɔlɔwa liga ánɩ́ bɔwa mʋ́ obugyatɔ. Mʋ ɩda gyi, “Bulu Asʋn.”

¹⁴ Ɔsʋsʋ ɩsa akɔpʋ bʋdɩn mpɔnkɔ fututusʋ. Bɔwa ɔhrada atadɩɛá ɩlɔwankɩ, ɩdɛ ogya kpa bʋbuo mʋ.

¹⁵ Ɔdayi ɩya anyɔ klaklaakla kʋ lɛdalɩ tsu mʋ ɔnɔ. Mʋ́ ɔbɔ́pʋsaɩn ɔmá-ɔmá bun nɩ. Ɔbɔ́pʋ owuntɔlɩn kpa amʋ́. Bulu Otumipʋ amʋ ɔblɔ kpɔnkpɔntɩ amʋ ɔbɔ́pʋnyimɛ amʋ́, fɛ alɩá bʋtenyimɛ waɩn-abi.

¹⁶ Ɩda ánɩ́ bɔwanlɩn dɩnka ɔha amʋʋ ɔdɩn ɔpɔnkɔ fututu amʋ atadɩɛsʋ pʋ́ mʋ obiansʋ gyi, “Asɩtɔ Ɔsɩ, Awietɔ Owie.”

¹⁷ Ɩnʋ nowun Bulu-ɔbɔpʋ ɔkʋ lɩɩ owitɔ. Ɔlɔkplʋn kpoli mbubwiá bʋna afutɔ fɛ́ɛ́ ɔbɛɛ, “Mlɩba! Mlɩbefia Bulu ɔpʋnʋ kpɔnkpɔntɩ amʋʋ alatswɩ ha mlɩ amʋ asɩ!

¹⁸ Mɛnɩ mlégyi awie, ɩsa ɔnɔ alɩɩpʋ, ɩsa akɔpʋ akinkin, mpɔnkɔsʋ adɩnkapʋ pʋ́ amʋ́ mpɔnkɔ, ɔyɩtɔ aha, ɩwɩ agyipʋ, nkpábi, nyebi ahandɛ fɛ́ɛ́ aye.”

¹⁹ Ɩnʋ nowun ánɩ́ ɔbwɩkɩta-atɔ amʋ mʋa ɔsʋlʋsʋ awie pʋ́ amʋ́ ɩsa akɔpʋ fɛ́ɛ́ bɛkpa aba bɔyɛkɔ ɔpɔnkɔ fututusʋ ɔdɩnkapʋ amʋ mʋa mʋ ɩsa akɔpʋ.

²⁰ Tamɛ begyi ɔbwɩkɩta-atɔ amʋsʋ, bɛkɩta mʋa mʋ ɔnɔsʋ ɔtɔɩpʋ amʋʋ ɔtɔbwɛ osuna akpɔnkpɔntɩ mʋ ɩdatɔ amʋ. Ofula amʋ ɔlɔpʋmlɛ aha amʋʋ ɔbwɩkɩta-atɔ amʋ nsʋhɩɛtɔ dɩn amʋ́sʋ, bʋtosum ɔkpɩ amʋʋ bɔpwɛ lɩan ɔbwɩ amʋ nɩ. Bɔtswɩ ɔbwɩ amʋ mʋa mʋ ɔnɔsʋ ɔtɔɩpʋ amʋ wa ogya patɩ kpɔnkpɔntɩá ogya mʋa atonkodu ɩhɩɛ detsii mʋ́tɔ.

²¹ Ɔpɔnkɔsʋ ɔdɩnkapʋ amʋ lɔpʋ ɔdayi ɩya anyɔ amʋʋ ɩlɛdalɩ tsu mʋ ɔnɔ amʋ mɔ ɩsa akɔpʋ atrahɛ amʋ fɛ́ɛ́. Mbubwi amʋ begyi amʋ́ aye plɩplɩplɩplɩ.