Atɔ Lɛsunahɛ 18 - Bulu Ntam Pɔpwɛ mʋ́a Israel Ɩlʋ

Babilon Bwie

¹ Ɩnɩ ɔma a, nɛtra wun Bulu-ɔbɔpʋ ɔkʋ ɛ dɛkplɩ tsu ɔsʋsʋ ɔba. Ɔbʋ tumi kpɔnkpɔntɩ. Mʋ numnyam dɛwankɩ wʋlɩ ɔsʋlʋsʋ.

² Ɔlɔkplʋn kʋklʋkʋʋ ɔbɛɛ, “Babilon labwie! Wulu yile Babilon labwie! Ɩlamli ɔŋɛ lalahɛ ɔtsan-ɔtsan fɛ́ɛ́ oŋainkpa. Ɩlabwɛ isia ha mbubwi lalahɛ pʋ́ mbwɩkɩta-atɔ lalahɛ fɛ́ɛ́.

³ Tsufɛ alapʋ mʋ mbʋatɔ-nta amʋ da ɔmá-ɔmá fɛ́ɛ́ ɔnɔ. Mʋa ɔyɩtɔ awie fɛ́ɛ́ batɔ mbʋa. Ibia agyipʋ fɛ́ɛ́ banya ɩwɩ tsu nkpa amʋʋ olegyi amʋtɔ.”

⁴ Ɩnʋ nɛlanu ɔmɛ kʋ tsu ɔsʋsʋ ɔbɛɛ, “Mɩ abi, mlɩlɛ ɩwɩ lɛ mʋtɔ! Mlɩmáwa ɩbɩ mʋ lakpan amʋtɔ, mɛnɩ mʋ asʋn wunhɛ amʋ kʋ mɛ́ɛba mlɩsʋ.

⁵ Tsufɛ mʋ lakpan lawɔ nwʋlʋta. Mʋ́ sʋ Bulu lakaɩn mʋ́sʋ.

⁶ Pʋ mʋ lalahɛá alapʋgyi fʋ aha ka mʋ ɩkɔ. Pʋ mʋ bwɛhɛ ka mʋ ɩkɔ tsenyɔ-tsesa. Ɔlɔpʋ nta kpekple ha aha bonun. Mʋ́ sʋ pʋ mʋ́á ɩbʋ ɔnlɩn dʋn mʋ́ aku anyɔ ha mʋ onun.

⁷ Alagyi ɔdwɛ lalahɛ, tsu ɩwɩ dʋbɩ. Mʋ́ sʋ pʋ ɩwɩɔsɩn mʋ́a asʋn wunhɛ ka mʋ ɩkɔ sei. Ɔtɛbla mʋ ɩwɩ ɔbɛɛ, ‘Owie tsɩhɛ ngyi, ntsie mɩ obiasʋ. Megyi ɔsʋrapʋ ngyi, mmɔ́ɔwa nwɛ ɛkɛkɛɛkɛ!>

⁸ Mʋ́ sʋ asʋn wunhɛá igyi akʋn, isu pʋ́ lowu bɔ́tʋ mʋ ɛkɛwʋlɛ pɛ. Bɔ́wa mʋ ogya, ɔbɔ́hɔ plɩplɩplɩplɩ, tsufɛ Otumipʋ anɩ Wie Bulu gyi. Mʋdɛ mʋ ɩsʋ bɩtɩ.”

⁹ Ɔsʋlʋsʋ awie amʋʋ mʋa amʋ́nyɔ bɔtɔ mbʋa, begyi ɔdwɛ lalahɛ amʋ bówun mʋ ogyasi, su kpisi.

¹⁰ Mʋ ipian amʋʋ odewun amʋ ɩbɔ́wa amʋ́ ifu. Mʋ́ sʋ bɛ́lɩɩ tsutsuutsu blɩ bɛɛ, “Gyɔwɩ nɩ! Babilon gyɔwɩ nɩ! Wulu kpɔnkpɔɔnkpɔntɩ, nkalɩ sʋ Bulu labɩtɩ fʋ ɩsʋ ɔtsawʋlɛ pɛ alɩ?”

¹¹ Ɔyɩtɔ bia agyipʋ bósu, gyi awɩrɛhɔ, tsufɛ ɔhaa tra ɔma ɩnʋá ɔbɔ́hɔ amʋ́ atɔ fɛhɛ.

¹² Mʋletsia hɔ sika pɛpɛ pʋ́ sika fututu atɔ, abwi wanklaan pʋ́ abuto wʋlɩhɛ, ɔhrada, ago, srɩkɩ atati pʋ́ kogyan, nyiá ɩbʋ ɔfan, atɔá bɔpʋ srʋfɔ-ɩsɛ bwɛ, mʋ́á bɔpʋ nyiá ɩbʋ ibia sre, pʋ́ mʋ́á bɔpʋ kɔbrɩ mʋ́a ɩdatɔ pʋ́ abwiá ɩhɩɛ bʋ akɩlɛ aná fɛ́ɛ́ bwɛ tsɔtsɔɔtsɔ tsu amʋ́ wa.

¹³ Oletsia hɔ amʋ́ pɩprɩ, ɔhɩɛn, ohuam, apʋsɛ, nta, olif-nfɔ, nfuo wanklaan, ayo, nnantswie, akufa, mpɔnkɔ, akeke, tsia hɔ aha nkpábi kʋraa.

¹⁴ Bósu blɩ bɛɛ, “Ntobi amʋʋ fʋtekle amʋ fɛ́ɛ́ ladalɩ fʋ ɩbɩ. Atɔ amʋʋ fʋtɔpʋwa bite amʋ fɛ́ɛ́ lahʋlɩ fʋ. Fʋmɛ́ɛtra wun mʋ́ ɛkɛkɛɛkɛ!”

¹⁵ Bia agyipʋ amʋʋ batsʋn mʋsʋ nya ɩwɩ amʋ fɛ́ɛ́ bɛlɩɩ ɩfʋntɔ, tsufɛ bʋdɛ ifu nya ánɩ́ bówun mʋ ɩwɩɔsɩn amʋ odu. Bɛ́kɩ mʋ ipian amʋ, su gyi awɩrɛhɔ!

¹⁶ Bɛ́blɩ bɛɛ, “Gyɔwɩ nɩ! Wulu yile, gyɔwɩ nɩ! Tɛkɩ fʋhɩɛ fʋbʋ akɩlɛ. Atati fututu mʋ́a pɛpɛ pʋ́ ago fʋtɛdɩda. Sika pɛpɛ atɔ mʋ́a abutoá ɩdɛ ogya kpa srasrasra fʋtɔwa.

¹⁷ Atonyahɛ tsɔtsɔɔtsɔ anfɩ fɛ́ɛ́ lahʋlɩ fʋ ɔtsawʋlɛ pɛ!” Ntsusʋ-yibi akanpʋ, mʋ́ ahandɛ pʋ́ mʋ́tɔ agyʋma ayɔpʋ pʋ́ ibia agyipʋ fɛ́ɛ́ bɔ́wa ɩfɔ mʋ wa.

¹⁸ Nɩ bowun mʋ ogyasi amʋ a, bɔ́sʋra okitikiti bɛɛ, “Wulu mɔmʋ lɔfʋn wulu anfɩ ɔyɩtɔ fɛ́ɛ́?”

¹⁹ Bɛ́kpa ɩsɩ wa nwuntɔ, gyi awɩrɛhɔ, blɩ bɛɛ, “Gyɔwɩ nɩ. Wulu yile, gyɔwɩ nɩ! Fʋ nyatɔ anɩ ntsusʋ ayibi awie fɛ́ɛ́ anɩlanya ɩwɩ tsu. Fʋ ɩwɩsʋ atɔ fɛ́ɛ́ lahɩ ɔtsawʋlɛ pɛ!”

²⁰ Ɔsʋsʋ atsiapʋ fɛ́ɛ́, mlɩnya ansigyi. Bulu aha, mʋ sumbi ayɔpʋ pʋ́ mʋ ɔnɔsʋ atɔɩpʋ fɛ́ɛ́, mlɩnya ansigyi. Tsufɛ Bulu lagyi mʋ asʋn, bɩtɩ mʋ ɩsʋ, ɩtɔ amʋʋ alapʋgyi mlɩ amʋ sʋ.

²¹ Ɩnʋ Bulu-ɔbɔpʋ ɔwʋnlɩnpʋ ɔkʋ lotsu ibwi kpɔnkpɔntɩ kʋ, tswɩ wa ɔpʋtɔ. Mʋʋ ɔlɛblɩ ɔbɛɛ, “Alɩ Bulu ɔbɔ́pʋ ɔblɔ bwie wulu yile Babilon, ɔhaa mɛ́ɛtra wun mʋ́ ɛkɛkɛɛkɛ nɩ.

²² Ɔhaa mɛ́ɛtra nu ɔsankuo adapʋ, ɩlʋ awapʋ, ɔtɛntɛ afʋlɩpʋ pʋ́ ɩkpɛ afʋlɩpʋ nka wulu amʋtɔ ɛkɛkɛɛkɛ. Ɩbɩ ɔnɔ agyʋma kʋkʋʋkʋ ɛ ɩmɛ́ɛtra tsia ɩnʋ. Bʋmɛ́ɛtra kwɛ nfuo ɩnʋ ɛkɛkɛɛkɛ.

²³ Ɔkandɩɛ kʋkʋ mɛ́ɛtra wankɩ wʋlɩ ɩnʋ, ɔhaa ɛ mɛ́ɛtra nu oklu mʋa ɔka pɔpwɛ ɔmɛ ɩnʋ ɛkɛkɛɛkɛ. Tsufɛ tɛkɩ mʋ ibia agyipʋ gyi aha kpɔnkpɔntɩ ɔyɩtɔ nɩ. Alapʋ mʋ atɔla mlɛ ɔyɩtɔ aha fɛ́ɛ́, ha bafwɩ!

²⁴ “Babilon brɔnʋsʋ Bulu ɔnɔsʋ atɔɩpʋ amʋ obugya ibun. Mʋlɔmɔ Bulu aha ɔyɩtɔ fɛ́ɛ́ nɩ.”