Atɔ Lɛsunahɛ 17 - Bulu Ntam Pɔpwɛ mʋ́a Israel Ɩlʋ

Obu-ɔnɔ Otsiapʋ Kpɔnkpɔntɩ Amʋ

¹ Ɩnʋ Bulu-abɔpʋ abasienɔ amʋʋ bɛkɩta ablanwenbi amʋtɔ ɔkʋlɛ lɛba bɛbla mɩ ɔbɛɛ, “Ba, ansuna fʋ alɩá brɛá Bulu ɔbɛ́bɩtɩ obu-ɔnɔ otsiapʋ kpɔnkpɔntɩ amʋʋ otsie ntsu tsɔtsɔɔtsɔsʋ amʋ ɩsʋ.

² Mʋa ɔyɩtɔ awie fɛ́ɛ́ batɔ mbʋa. Ɔyɩtɔ aha fɛ́ɛ́ banun mʋ mbʋatɔ-nta bʋ.”

³ Ɩnʋ Ɔŋɛ amʋ lɛba mɩsʋ, Bulu-ɔbɔpʋ amʋ lotsu mɩ ya ɔsʋlʋkpansʋ. Nowun ɔtsɩ ɔkʋ tsie ɔbwɩkɩta-atɔ pɛpɛ ɔkʋsʋ ɩnʋ. Ɔbwɩ amʋ bʋ nwun asienɔ pʋ́ nsiebi idu. Bɔwanlɩn ada ánɩ́ ɩlɔkʋsʋ lɩɩ Bulusʋ dɩnka mʋ ɩwɩ fɛ́ɛ́.

⁴ Ɔtsɩ amʋ lɔwa atadɩɛá igyi faasɩ-ntsu mʋ́a pɛpɛ. Ɔlɔwa abuto wʋlɩhɛ ɔtsan-ɔtsan, ɔdɛ sika pɛpɛ owebi mʋ gyɔpɩtɔ. Akisitɔ pʋ́ mʋ obu-ɔnɔtsia ifin lɔbʋla mʋ́ dɛdɛɛdɛ.

⁵ Bɔwanlɩn ɩda kʋá mʋ́ asɩ leŋain dɩnka mʋ ɔsʋkpɩ bɛɛ, “Wulu yile Babilon, obu-ɔnɔ atsiapʋ fɛ́ɛ́ oyin. Ɔsʋlʋsʋ akisitɔ fɛ́ɛ́ owie.”

⁶ Nowun ánɩ́ ɔtsɩ amʋ lanun Bulu aha obugya bʋ. Aha anfɩ bɔmɔ Yesu ɩwɩ adansɩɛgyi sʋ nɩ. Brɛá nowun mʋ a, ɔnɔ lobwie mɩ.

⁷ Mʋʋ Bulu-ɔbɔpʋ amʋ lɛfɩtɛ mɩ ɔbɛɛ, “Ntogyi ɔnɔ labwie fʋ alɩ? Nɛ́lɛ asʋn ŋainhɛá ɩbʋ ɔtsɩ amʋ mʋa ɔbwɩkɩta-atɔ amʋʋ ɔbʋ nwun asienɔ mʋ́a nsiebi du amʋ asɩ suna fʋ.

⁸ Ɔbwɩ amʋʋ fowun amʋ latsia kɩ. Ɔtra ɔma ɩnʋ sei, ɔbɛ́laba. Tamɛ ɩmɔ́ɔwa ɔpá ɔbɛ́dalɩ tsu ɩlan klukluuklu amʋʋ ɩma ɔka amʋtɔ yɔ ɔhɩkpa. Ɔsʋlʋsʋ atsiapʋ amʋʋ Bulu mɔwanlɩn amʋ́ ada wa nkpa ɔwʋlʋ amʋtɔ tsu brɛá ɔyɩ lefi asɩ amʋ ɔnɔ bóbwie amʋ́, tsufɛ bowun ánɩ́ ɔbwɩ amʋʋ oletsia, ɔtra ɔma ɩnʋ amʋ lala ba.

⁹ “Ɩnɩ lehian nyansa ánɩ́ bɔ́pʋnu mʋ́ asɩ. Nwun asienɔ amʋ igyi abʋ asienɔá ɔtsɩ amʋ dɛ iwie gyi mʋ́sʋ.

¹⁰ Nwun asienɔ amʋ ɩlɩɩ ha awie asienɔ ɛ. Abanu bawu bɔtsʋn, osiesɩ tsie obiasʋ sei a. Osienɔsɩ mɔkʋnya ba. Ɔba a, brɛ kpalobi kʋ pɛ obétsia.

¹¹ Owie okwesɩ gyi ɔbwɩ amʋʋ oletsia, ɔtra ɔma ɩnʋ sei amʋ. Abasienɔ amʋtɔ ɔkʋlɛ ogyi. Mʋ ɛ ɔbɛ́hɩ fɛ mʋ aba amʋ.

¹² “Nsiebi du amʋʋ fowun amʋ igyi awie iduá bʋmɔkʋnya tsia obiasʋ. Tamɛ bɛ́yaɩ amʋ́ mbiasʋ amʋ́ iwie ogyikpa. Amʋ́a ɔbwɩ amʋ bégyi iwie brɛ itinbi.

¹³ Amʋ́ fɛ́ɛ́ bɔ́bwɛ agywɩɩn kʋlɛ, pʋ amʋ́ tumi ha ɔbwɩ amʋ.

¹⁴ Amʋ́a ɔbwɩ amʋ bɔ́kɔ Okufabi amʋ, tamɛ Okufabi amʋ obégyi amʋ́sʋ, tsufɛ mʋgyi asɩtɔ Ɔsɩ pʋ́ awietɔ Owie nɩ. Mʋ abuopʋ gyi aha amʋʋ Bulu latɩ amʋ́, lɛ amʋ́, bʋbʋ ɔnɔkwalɩ ha mʋ amʋ.”

¹⁵ Ɩnʋ Bulu-ɔbɔpʋ amʋ lɛbla mɩ ɔbɛɛ, “Ntsu tsɔtsɔɔtsɔ amʋʋ fowun ánɩ́ obu-ɔnɔ otsiapʋ amʋ tsie mʋ́sʋ amʋ ɩlɩɩ ha ɔmá-ɔmá pʋ́ ɔblɩ ɔtsan-ɔtsantɔ aha.

¹⁶ Nsiebi du amʋʋ fowun ɔbwɩ amʋ nwunsʋ amʋ ɛ ɩlɩɩ ha awie iduá mʋa amʋ́nyɔ bégyi iwie. Amʋ́ fɛ́ɛ́ bólu obu-ɔnɔ otsiapʋ amʋ, swɩɩ mʋ atɔ fɛ́ɛ́, lɛ mʋ yaya, wɩ mʋ aye, wa trahɛ ogya, ɩbɔ́hɔ plɩplɩplɩplɩ.

¹⁷ Tsufɛ Bulu lɔpʋ agywɩɩn anfɩ wa amʋ́ fɛ́ɛ́ nwuntɔ, mɛnɩ bɔ́bwɛ mʋ apɛ. Amʋ́ fɛ́ɛ́ bɔ́pʋ amʋ́ tumi ha ɔbwɩ amʋ, yɔfʋn brɛá Bulu asʋn amʋ fɛ́ɛ́ ɩbɛ́ba mʋ́tɔ.”

¹⁸ Ɩnʋ Bulu-ɔbɔpʋ amʋ lɛtra bla mɩ ɔbɛɛ, “Ɔtsɩ amʋʋ fowun atowunhɛ amʋtɔ amʋ gyi wulu yileá ɩdɛ ɔsʋlʋsʋ awie fɛ́ɛ́sʋ gyi nɩ.”