Atɔ Lɛsunahɛ 16 - Bulu Ntam Pɔpwɛ mʋ́a Israel Ɩlʋ

Bulu Ɔblɔ Ablanwenbi

¹ Ɩnʋ nonu ɔmɛ kpɔnkpɔntɩ kʋá ɩlɛdalɩ tsu Bulu Ɔwankɩkpa ɩnʋ. Ɩdɛ abɔpʋ asienɔ amʋ bla ɔbɛɛ, “Mlɩyɔ, amlɩyɛtsɛɩ Bulu ɔblɔ ablanwenbi asienɔ amʋ wʋlɩ ɔsʋlʋsʋ.”

² Mʋ́ sʋ ɔbɔpʋ gyankpapʋ lɛdalɩ tsu Bulu ɔtswɛkpa ɩnʋ yɛtsɛɩ mʋ klɛ wʋlɩ ɔsʋlʋsʋ. Ɩnʋ aha amʋʋ ɔbwɩ amʋ nsʋhɩɛtɔ ɩdɩn amʋ́sʋ, bʋdɛ ɔkpɩ amʋ sum amʋ ɩwɩ letsitsi nlɔ akpɔnkpɔntɩ, ɩdɛ amʋ́ dwiin.

³ Ɔbɔpʋ nyɔsɩ lɛtsɛɩ mʋ klɛ wa ɔpʋtɔ. Ɔpʋ amʋ lemli fɛ fuli obugya. Togyitɔá ɔbʋ ɔpʋ amʋtɔ lowu.

⁴ Ɔbɔpʋ sasɩ lɛtsɛɩ mʋ klɛ wa ntsu tsʋnhɛ pʋ́ abʋnkpabi fɛ́ɛ́tɔ. Mʋ́ fɛ́ɛ́ ilemli obugya.

⁵ Ɩnʋ nonuá Bulu-ɔbɔpʋá ɔtɛkɩ ntsusʋ lɛbla Bulu ɔbɛɛ, “Oo Ɔwankɩpʋá fʋbʋ ɩnʋ brɛ fɛ́ɛ́. Fʋ asʋn da ɔkpa ánɩ́ fabɩtɩ amʋ́ ɩsʋ alɩ.

⁶ Tsufɛ bamɔ fʋ ɔnɔsʋ atɔɩpʋ pʋ́ fʋ aha, tsɛɩ amʋ́ obugya wʋlɩ ɔsʋlʋsʋ. Mʋ́ sʋ faha bapʋ obugya ha amʋ́ fɛɛ, bʋnun nɩ. Ɩnɩ lɛkana ha amʋ́ nɩ.”

⁷ Ɩnʋ nonu ɔmɛ kʋá ɩlɛdalɩ tsu afɔdɩɛ-ɔswɩ amʋ asɩ ɔbɛɛ, “Ee, anɩ Wie Bulu Otumipʋ, fʋ ɩsʋbɩtɩ igyi ɔnɔkwalɩ, ɩda ɔkpa.”

⁸ Mʋʋ ɔbɔpʋ nasɩ lɛtsɛɩ mʋ klɛ wʋlɩ owi. Mʋ́ sʋ owi ɔnɔ lɔwa ɔnlɩn, ɩlɛha mʋ́ ɩdɛ aha tɔ fɛ ogya.

⁹ Owi amʋ ɩlɔtɔ okugyiɔkʋ. Bulu bʋ tumi asʋn wunhɛ anfɩ fɛ́ɛ́sʋ, tamɛ bekina bʋmɛdamli klʋntɔ; pʋwa mʋ numnyam, mboun lwɩɩ bɔlwɩɩ mʋ.

¹⁰ Onusɩ lɛtsɛɩ mʋ klɛ wʋlɩ ɔbwɩ amʋ owie obiasʋ. Ɔbwɩ amʋ iwie ogyikpa fɛ́ɛ́ loklun. Ɩwɩɔsɩn sʋ mʋ abuopʋ amʋ bɔwɩ amʋ́ ɔdandʋ.

¹¹ Tamɛ bekina bʋmɛdamli klʋntɔ si amʋ́ lalahɛ amʋ fɛ́ɛ́ bwɛ. Mboun bɔlwɩɩ ɔsʋsʋ Bulu, ɩwɩɔsɩn amʋʋ bʋdewun amʋ sʋ.

¹² Osiesɩ lɛtsɛɩ mʋ klɛ wa ntsu yile Efratetɔ. Ntsu amʋ fɛ́ɛ́ lɛkpɩ lɛ mʋ́ ɔbʋntɔ. Ɩnɩ lɛla ɔkpa ha awieá botsu owi ɔdalɩkpa pʋ́ amʋ́ ɩsa akɔpʋ bɛtalɩ tsʋn ba ɩnʋ.

¹³ Ɩnʋ nowun ɔŋɛ lalahɛ asa akʋá bʋgyi fɛ agyongyo, bɛdalɩ tsu bʋtɩ amʋ ɔnɔtɔ, ɔbwɩ amʋ ɔnɔtɔ pʋ́ ɔnɔsʋ ɔtɔɩpʋ ofunupʋ amʋ ɔnɔtɔ.

¹⁴ Ɔŋɛ lalahɛ anfɩ bʋbʋ tumi bwɛ osuna akpɔnkpɔntɩ. Bɔtsʋn ɔsʋlʋsʋ awie fɛ́ɛ́sʋ, mɛnɩ bɛ́kpa amʋ́ fɛ́ɛ́ wa abatɔ, bɛ́ba bɔkɔ anɩ Wie Bulu Otumipʋ ɩsa ɛkɛ yile amʋʋ igyi mʋ asʋn ogyikɛ amʋ.

¹⁵ Anɩ Wie ɔbɛɛ, “Kɩ, nɛ́ba fɛ owikplu. Bulu obóyula ɔha ánɩ́ ɔlɛda ɩwɩsʋ, alala mʋ atadɩɛ yaɩ, mɛnɩ ɔmɛ́ɛnatɩ yaya, pɛlɩ mɛ́ɛkɩta mʋ.”

¹⁶ Mʋʋ ɔŋɛ lalahɛ amʋ bɛkpa awie amʋ yefia ɔtɩnɛkʋá bʋtɛtɩ ɩnʋ Hebrifɔ ɔblɩtɔ bɛɛ, “Harmagedon.”

¹⁷ Ɩnʋ Bulu-ɔbɔpʋ sienɔsɩ lɛtsɛɩ mʋ klɛ wa afutɔ. Ɔmɛ kʋklʋkʋʋ kʋ lɛdalɩ tsu Bulu ɔtswɛkpa ɩnʋ owie obia amʋtɔ ɔbɛɛ, “Ɩlata!”

¹⁸ Ɩnʋ nyankpʋ lɔwa ɩbɩ fwɩ bɩ. Odekpie, ɔprada dɛpʋtɩ. Ɔmɛ ɔtsan-ɔtsan lɛlɩn kʋklʋkʋʋ, ɔsʋlʋ lɛkpɩnkɩ kpɩnkɩ kʋá mʋ́ odu mɔkʋba kɩ tsu brɛá aha bɛlɩn ɔyɩtɔ ɔpá.

¹⁹ Wulu yile Babilontɔ leye asa. Awulu yileá ɩbʋ ɔyɩtɔ fɛ́ɛ́ ilobwiebwie. Ɩnʋ Bulu lɛkaɩn Babilon lakpan fɛ́ɛ́sʋ, ɔlɔpʋ mʋ ɔblɔ kpɔnkpɔntɩ ɛwɛtɔ-nta amʋ ha mʋ olonun.

²⁰ Ɔpʋ nsɩnɛ ɔsʋlʋ kugyikʋ lɔfwɩ, abʋ ɛ fɛ́ɛ́ lɛŋa.

²¹ Atsufolibi akpɔnkpɔntɩá mʋ́ odwintɔ bɔ́bwɛ fɛ kilo aduenu (50) lɛkpa tsu nwʋlʋtasʋ bɛda ahasʋ. Atsufolibi amʋ ɔnɔ ɔnlɩn sʋ bɔlwɩɩ Bulu.