Atɔ Lɛsunahɛ 15 - Bulu Ntam Pɔpwɛ mʋ́a Israel Ɩlʋ

Bulu-abɔpʋ Pʋ́ Asʋn Wunhɛ Asienɔ Trahɛ

¹ Ɩnʋ nowun osuna bamba kʋá ɩbʋ ifu, ɩbʋ wanwan ɔsʋsʋ. Nowun ánɩ́ Bulu-abɔpʋ asienɔ bʋdɛ asʋn wunhɛ asienɔá Bulu ɔbɔ́pʋbɩtɩ aha ɩsʋ asa ɩklʋntɔ bólwii mʋ.

² Ɩnʋ nowun ɔpʋ kʋá igyi fɛ ahʋhwɛ, ɩlɛpɛ fɛ ogya. Nowun ánɩ́ aha bʋlɩɩ mʋ́ ɔnɔ, bʋdɛ Bulu nsankuo. Alɩ aha anfɩ gyi aha ánɩ́ bakɔ gyi ɔbwɩ gyankpapʋ amʋ mʋa mʋ ɔkpɩ amʋ pʋ́ nsʋhɩɛ-ibi amʋʋ ɩlɩɩ ha mʋ ɩda amʋsʋ nɩ.

³ Bʋdɛ Bulu osumbi Mose mʋa Okufabi amʋ ɩlʋ wa bɛɛ, “Anɩ Wie Otumipʋ, fʋ bwɛhɛ bʋ ifu, ɩbʋ wanwan. Fʋ bwɛhɛ fɛ́ɛ́ igyi ɔnɔkwalɩ, ɩda ɔkpa. Owieá mʋ iwiegyi tamamɔ ɔnɔ.

⁴ Anɩ Wie, ma oméenya fʋ ifu, wa fʋ numnyam? Tsufɛ fʋ nkʋlɛ lɔwankɩ. Ɔmá fɛ́ɛ́ bɛ́ba bosum fʋ, tsufɛ falɛ fʋ yilebwɛ ɔwan.”

⁵ Ɩnɩ ɔma a, nɛkɩ ɔsʋsʋ, nowun ánɩ́ Bulu ɔtswɛkpa obu, igyi tati-obu amʋʋ itosuna ánɩ́ Bulu bʋ amʋ́ wa amʋ ɔnɔ ɩyaa. Nowun mʋ́tɔ Ɔwankɩkpa amʋ.

⁶ Nowun Bulu-abɔpʋ asienɔ amʋʋ bɔpʋ asʋn wunhɛ kpɔnkpɔntɩ asienɔ ba amʋ. Bɛdalɩ tsu Ɔwankɩkpa ɩnʋ. Bɔwa ɔhrada atadɩɛá ɩlɔwankɩ, ɩdɛ ogya kpa, bɔpʋ sika pɛpɛ ɔfɛ tsan.

⁷ Akɩankpapʋ ana amʋtɔ ɔkʋlɛ lɛha Bulu-abɔpʋ asienɔ amʋtɔ okugyiɔkʋ sika blanwebiá Buluá ɔbʋ ɩnʋ brɛ fɛ́ɛ́ ɔblɔ ɩbɔ mʋ́ dɛdɛdɛdɛ.

⁸ Bulu numnyam pʋ́ mʋ tumi lɛha ogyasi lɔbʋla Bulu Ɔwankɩkpa ɩnʋ fɛ́ɛ́. Ɔhaa mɛtalɩ bitiwie mʋ́tɔ, yɔfʋn brɛá Bulu-abɔpʋ asienɔ amʋ batsɛɩ asʋn wunhɛ asienɔ amʋ fɛ́ɛ́ wʋlɩ ɔsʋlʋsʋ.