Atɔ Lɛsunahɛ 14 - Bulu Ntam Pɔpwɛ mʋ́a Israel Ɩlʋ

Okufabi Amʋ Mʋa Mʋ Aha

¹ Ɩnʋ nɛlawun Okufabi amʋ lɩɩ Sionbʋsʋ. Aha mpɩm lafakʋlɛ adʋana-na (144,000) bʋlɩɩ mʋ wa. Okufabi amʋ mʋa mʋ Sɩ ɩda dɩn amʋ́ ɔsʋkpɩ.

² Ɩnʋ nonu ɔmɛ kʋ tsu ɔsʋsʋ fɛ ntsu labʋla, ɩdɛkpa yi, ntɛ ɔprada dɛpʋtɩ, ntɛ fɛ nsankuo tsɔtsɔɔtsɔ bʋdɛda.

³ Bʋdɛ ɩlʋ pɔpwɛ kʋ wa owie obia amʋ, akɩankpapʋ ana amʋ pʋ́ ahandɛ adʋanyɔ-na amʋ ansɩtɔ. Ɔhaa má ɩnʋá ɔbɛ́talɩ suan ɩlʋ amʋ ɔsʋlʋ anfɩsʋ, nkɛtɩ aha mpɩm lafakʋlɛ adʋana-na (144,000) amʋʋ Bulu lahɔ amʋ́ nkpa tsu ɔsʋlʋsʋ amʋ nkʋlɛ pɛ.

⁴ Alɩ aha anfɩ gyi aha ánɩ́ amʋ́ ɩwɩ lɛtɩn, bʋmeyin ɔtsɩ, bʋtobuo Okufabi amʋ ɔtɩnɛgyiɔtɩnɛá ɔyɔ nɩ. Amʋ́ nwunsʋ ɩkɔ ɔlɛka anyankpʋsa fɛ́ɛ́tɔ, fɛ atɔ-abi gyankpapʋ ha Bulu mʋa Okufabi amʋ nɩ.

⁵ Bʋtamawa afunu, ɔlala kʋkʋ ɛ ɩma amʋ́ ɩwɩ.

Bulu-abɔpʋ Abasa Asʋn Blɩhɛ

⁶ Ɩnʋ nɛlawun Bulu-ɔbɔpʋ ɔkʋá ɔna afutɔ, ɔdɛ asʋn wanklaan amʋʋ ɩbʋ nʋ brɛ fɛ́ɛ́ amʋ. Ɔba bɛbla ɔyɩtɔ aha, abusuangyiabusuan, ɔblɩgyiɔblɩ ablɩpʋ, ɔmágyiɔmátɔ aha pʋ́ aha ɔtsan-ɔtsan.

⁷ Bulu-ɔbɔpʋ amʋ lɔkplʋn blɩ ɔbɛɛ, “Mlɩnya Bulu ifu, amlɩwa mʋ numnyam, tsufɛ mʋ asʋngyibɩ lafʋn. Mlɩsum mʋ. Mʋlɔbwɛ ɔsʋ mʋ́a asɩ, ɔpʋ mʋ́a ntsu fɛ́ɛ́!”

⁸ Bulu-ɔbɔpʋ onyɔsɩ ɛ lobuo mʋ, bɛblɩ ɔbɛɛ, “Babilon labwie. Wulu yile Babilon labwie. Tsufɛ Babilon laha ɔmá-ɔmá banu mʋ mbʋatɔ-nta ánɩ́ ɩtɛha Bulu ɔblɔ tɔkʋsʋ!”

⁹ Bulu-ɔbɔpʋ sasɩ ɛ buo amʋ́, ɔdɛblɩ ɔbɛɛ, “Nɩ ɔkʋ losum ɔbwɩ amʋ mʋa mʋ ɔkpɩ amʋ, ha bɔpʋ amʋ́ nsʋhɩɛtɔ hɩɛ mʋ ɔsʋkpɩ ntɛ mʋ ɩbɩ nsʋ a,

¹⁰ alɩ ɔha amʋ obónun Bulu ɔblɔ-nta, bʋmɛfra mʋ́ asa bɛtsɛɩ mʋ́ wa Bulu ɔblɔ-ɛwɛtɔ nɩ. Bulu ɔbɔ́pʋ ogya mʋ́a atonkodu bɩtɩ mʋ ɩsʋ, mʋ abɔpʋ wankɩhɛ pʋ́ Okufabi amʋ ansɩtɔ.

¹¹ Amʋ́ ɩsʋbɩtɩ ogya amʋ ogyasi bɔ́kʋsʋ yɔ ɔsʋsʋ brɛ fɛ́ɛ́. Alɩ aha amʋ gyi aha amʋʋ bosum ɔbwɩ amʋ pʋ́ mʋ ɔkpɩ, ɔbwɩ amʋ nsʋhɩɛtɔ dɩn amʋ́sʋ amʋ nɩ. Ɩwɩ móolwii amʋ́ ɛkɛkɛɛkɛ.”

¹² Ɩnɩ sʋ ilehian ánɩ́ Bulu aha bótomi lɩɩ kinkin, gyi Bulu mblasʋ, wa ɔnɔkwalɩ ha Yesu nɩ.

¹³ Ɩnʋ nonu ɔmɛ kʋ lotsu ɔsʋsʋ ɔbɛɛ, “Wanlɩn tswɩ fɛɛ, ‘Ansɩ bégyi aha ánɩ́ bówu anɩ Wie agyʋmatɔ tsu sei pʋya!> ” Bulu Ɔŋɛ amʋ ɔbɛɛ, “Ee, ɩbʋ mʋ́tɔ. Ansɩ bégyi amʋ́ lɛlɛ. Bɛ́da ɔkpʋnʋ tsu amʋ́ ipian fɛ́ɛ́tɔ, tsufɛ amʋ́ bwɛhɛ wanklaan bóbuo amʋ́.”

Bulu Asʋngyi Ɩwɩ Atowunhɛ

¹⁴ Ɩnʋ nɛlakɩ a, agyinde fututu kʋ nɩ. Ɔha ɔkʋá ogyi fɛ Nyankpʋsa-Mʋ-Bi amʋ tsie agyinde amʋsʋ. Obun sika pɛpɛ owiepa, ɔdɛ tsɩnɩ klakla kʋ.

¹⁵ Ɩnʋ Bulu-ɔbɔpʋ ɔkʋ ɛ lɛdalɩ tsu ɔsʋsʋ Bulu ɔtswɛkpa ɩnʋ ba. Mʋʋ ɔlɔkplʋn bla ɔha amʋʋ otsie agyindesʋ amʋ ɔbɛɛ, “Pʋ fʋ tsɩnɩ amʋ tɩn atɔ-abi, tsufɛ ɔsʋlʋsʋ atɔ-abi lapɛ yɔɩ. Mʋ́ tɩnbɩ lafʋn!”

¹⁶ Mʋ́ sʋ ɔha amʋʋ otsie agyindesʋ amʋ lɛtɩnkɩ mʋ tsɩnɩ amʋ, tɩn ɔsʋlʋsʋ atɔ-abi amʋ fɛ́ɛ́.

¹⁷ Bulu-ɔbɔpʋ ɔkʋ ɛ lɛdalɩ tsu ɔsʋsʋ Bulu ɔtswɛkpa obuto ɩnʋ. Mʋ ɛ ɔdɛ tsɩnɩ klakla kʋ.

¹⁸ Mʋʋ Bulu-ɔbɔpʋ ɔkʋá ɔbʋ tumi ogya amʋsʋ ɛ lɛdalɩ tsu afɔdɩɛ-ɔswɩ amʋ asɩ ba. Ɔlɔkplʋn bla Bulu-ɔbɔpʋ amʋʋ ɔdɛ tsɩnɩ amʋ ɔbɛɛ, “Pʋ fʋ tsɩnɩ amʋ ka waɩn-abi amʋ ɔkpɩtsa, tsufɛ abi amʋ ɩlapɛ.”

¹⁹ Mʋ́ sʋ Bulu-ɔbɔpʋ amʋ lɔtswɩ mʋ tsɩnɩ amʋ kaka ɔsʋlʋsʋ waɩn-abi ɔkpɩtsa fɛ́ɛ́, kpa waɩn-abi amʋ wa ɔtɩnɛá bʋtenyimɛ ntsu lɛ mʋ́tɔ. Ɩnɩ ɩlɩɩ ha Bulu ɔblɔ.

²⁰ Wulu amʋ mmuatse benyimɛ waɩn-abi amʋ. Obugya lɛdalɩ mʋ́tɔ, ɩdɛtsʋn waa fɛ ntsu tsʋnhɛ. Mʋ́ ɩswɩtɔ bɔ́bwɛ maɩlɩ lafakʋlɛ adukwe (180). Mʋ́ oklu ɛ bɔ́bwɛ ayabi anu.