Atɔ Lɛsunahɛ 13 - Bulu Ntam Pɔpwɛ mʋ́a Israel Ɩlʋ

Mbwɩkɩta-atɔ Anyɔ Akʋ

¹ Ɩnɩ ɔma a, nowun ánɩ́ ɔbwɩkɩta-atɔ kpɔnkpɔntɩ ɔkʋ dɛdalɩ tsu ɔpʋ amʋtɔ ɔba. Ɔbʋ nwun asienɔ pʋ́ nsiebi du. Owiepa bun nsiebi amʋ kugyikʋsʋ. Bɔwanlɩn ɩda ánɩ́ ɩlɔkʋsʋ lɩɩ Bulusʋ dɩnka nwun amʋ kugyikʋsʋ.

² Ɔbwɩ amʋ gyi fɛ dundu, tamɛ mʋ ayabi lomoni, mʋ akuti bʋ ɩswɩ fɛ osisre ayabi, mʋ ɔnɔ ɛ igyi fɛ gyata ɔnɔ. Bʋtɩ amʋ lɔpʋ mʋ tumi, iwiegyi pʋ́ ɔwʋnlɩn kʋ ha ɔbwɩ anfɩ.

³ Nowun ánɩ́ ɔlɔ kpɔnkpɔntɩ kʋ ɩdɩn ɔbwɩ amʋ nwun asienɔ amʋtɔ kʋlɛsʋ. Ɔlɔ amʋ lomoni, ɩbɛ́talɩ mɔ mʋ, tamɛ ɩlɛta, omowu. Ɩlɔwa ɔyɩtɔ aha fɛ́ɛ́ wanwan, bɛkpla buo mʋ.

⁴ Bosum bʋtɩ amʋ, tsufɛ alapʋ mʋ tumi ha ɔbwɩ amʋ. Bosum ɔbwɩ amʋ ɛ, fɩtɛ bɛɛ, “Ma lɔfʋn ɔbwɩ anfɩ? Ma ɔbɛ́talɩ lɩɩ kɔ mʋ?”

⁵ Bulu lɛha ɔbwɩ amʋ ɔkpa ánɩ́ ɔblɩ abususʋ akpɔnkpɔntɩ pʋkʋsʋ lɩɩ mʋsʋ. Ɔlɛha mʋ ɔkpa ánɩ́ ɔbwɛ tumila kugyikʋá odekle tsra adʋana-nyɔ (42), igyi nfinsa mʋ́a ɩfʋn amʋtɔ.

⁶ Ɔbwɩ amʋ lobwii ɔnɔ, blɩ abususʋ pʋkpɔɩ Bulu mʋa mʋ ɩda pʋ́ aha amʋʋ bʋbʋ ɔsʋsʋ, igyi mʋ otsiakpa amʋ.

⁷ Bulu lɛha mʋ ɔkpa ánɩ́ ɔkɔ Bulu aha, ogyi amʋ́sʋ. Ɔlɛha mʋ ɔkpa ánɩ́ ogyi iwie abusuangyiabusuan, ɔblɩgyiɔblɩ, ɔmágyiɔmá pʋ́ ɔsʋlʋsʋ aha ɔtsan-ɔtsan fɛ́ɛ́sʋ.

⁸ Ɔyɩtɔ aha fɛ́ɛ́ bósum ɔbwɩ amʋ. Aha ánɩ́ bʋmóosum mʋ gyi aha ánɩ́ bɔwanlɩn amʋ́ ada wa Okufabi amʋʋ bɔpʋha igyi asa ɔyɩ lɛbɛlɩn amʋ nkpa ɔwʋlʋtɔ.

⁹ Ɔha ánɩ́ ɔbʋ asʋ onu.

¹⁰ Ɔha ánɩ́ ɩda yaɩ ánɩ́ bɛ́kɩta mʋ ndoun ɩsatɔ a, bɛ́kɩta mʋ ɩsatɔ, kpa mʋ natɩ. Nɩ ɩda yaɩ ánɩ́ ɔkʋ obésin ɔdayi ɔnɔ ɛ a, ɔdayi ɔnɔ obésin. Ɩnɩ sʋ Bulu aha bʋtomi, abʋlɩɩ kinkin amʋ́ hogyitɔ.

¹¹ Ɩnʋ nɛtra wun ɔbwɩ ɔkʋ ɛ lɔwɔ dalɩ ɔsʋlʋtɔ. Ɔbʋ nsiebi anyɔ fɛ okufabi, tamɛ ɔlɔtɔɩ fɛ bʋtɩ.

¹² Ɔbwɩ anfɩ lɩɩ ɔbwɩ gyankpapʋ amʋ ansɩtɔ, ɔlɔyɔ mʋ agyʋma kugyikʋ ɔbwɩ gyankpapʋ amʋ tumitɔ. Ɩnɩ lɛha ɔsʋlʋsʋ atsiapʋ fɛ́ɛ́ bosum ɔbwɩ gyankpapʋ amʋʋ ɔlɔ lɛdɩnka mʋ, ɩlɛta, omowu amʋ.

¹³ Ɔbwɩ nyɔsɩ amʋ lɔbwɛ osuna akpɔnkpɔntɩ. Ɔlɛha ogya lɛkpa tsu ɔsʋsʋ bɛda, aha fɛ́ɛ́ bowun.

¹⁴ Ɔlɔpʋ osuna amʋʋ ɔlɔbwɛ ɔbwɩ gyankpapʋ amʋ ansɩtɔ amʋ mlɛ ɔyɩtɔ aha ɔbɛɛ, bʋpwɛ ɔkpɩ, ogyi fɛ ɔbwɩ gyankpapʋ amʋʋ bɔwɔ mʋ ɔdayi ɩya anyɔ, omowu, ɔtra otsie nkpa amʋ.

¹⁵ Bulu lɛha ɔbwɩ nyɔsɩ anfɩ ɔkpa ánɩ́ ɔwa ɔkpɩ amʋ ɔŋɛ, fówun ɩbɛ́talɩ tɔɩ. Ɩnʋ ɔkpɩ amʋ lɛha ɔbɛɛ, bʋmɔ aha ánɩ́ bʋmóosum mʋ.

¹⁶ Ɔlɛha ánɩ́ bʋhɩɛ aha fɛ́ɛ́ nsʋ, amʋ́ gyɔpɩ ɩbɩsʋ ntɛ amʋ́ ɔsʋkpɩ; nyebi ahandɛ, ahianfɔ mʋ́a asikafɔ, nkpábi mʋ́a ɩwɩ agyipʋ.

¹⁷ Ɔhaa mɛ́ɛtalɩ fɛ tɔtɔ ntɛ hɔ tɔtɔ, nkɛtɩ ɔha ánɩ́ ɔbwɩ amʋ nsʋhɩɛtɔ, igyi mʋ ɩda ntɛ ibiá ɩlɩɩ ha mʋ ɩda dɩn mʋsʋ.

¹⁸ Ɩnɩ lehian nyansa, mɛnɩ fɛ́talɩ nu ibi amʋ asɩ. Ibi amʋ ɩlɩɩ ha ɔbwɩ gyankpapʋ amʋ, igyi oyin ɔkʋ ɩda. Ibi amʋ gyi lafasie aduesie-sie (666).