Atɔ Lɛsunahɛ 12 - Bulu Ntam Pɔpwɛ mʋ́a Israel Ɩlʋ

Ɔtsɩ Amʋ Mʋa Bʋtɩ Amʋ

¹ Ɩnʋ osuna kpɔnkpɔntɩ kʋ lɛdalɩ ɔsʋsʋ. Nowun ɔtsɩ ɔkʋá ɔdɩdɩ owi, mʋ ayabi yi ɔtsrasʋ. Obun owiepa, ntsrakpabi duanyɔ ɩpan mʋ́sʋ.

² Ɔtsɩ amʋ dɛ ɔmɛ, ɩkwɩɩ dɛ mʋ dwiin, odekikini, ɔdɛ okitikiti ogyo obi amʋ kwɩɩ.

³ Ɩnʋ osuna bamba lɛtra dalɩ ɔsʋsʋ. Nowun bʋtɩ kpɔnkpɔɔnkpɔntɩ ɔkʋá ɔlɛpɛ, ɔbʋ nwun asienɔ pʋ́ nsiebi du. Owiepa asienɔ bun nwun asienɔ amʋsʋ.

⁴ Nɩ beye ntsrakpabi fɛ́ɛ́tɔ aku asa a, bʋtɩ amʋ lɔpʋ mʋ odu kiki mla iku-kʋlɛ, ɔlɛbɩtɩa mʋ́ kpa bɛda ɔsʋlʋsʋ. Ɔlɩɩ ɔtsɩ amʋʋ ɔmɛ dɛ mʋ dwiin amʋ ansɩtɔ, mɛnɩ ɔtsɩ amʋ onya kwɩɩ pɛ a, obótsu mʋ bi amʋ mɛ.

⁵ Ɔtsɩ amʋ lɔkwɩɩ obiyimbiá ɔbɛ́kpa ɔmá fɛ́ɛ́ owuntɔlɩnsʋ. Botsu kebi amʋ ya Bulu wa, yɛyaɩ mʋ obiasʋ.

⁶ Ɩnʋ ɔtsɩ amʋ lɛsrɩ yɔ ɔsʋlʋkpansʋ ɔtɩnɛá Bulu lɛla yaɩ ha mʋ. Bɛkɩ mʋsʋ nkɛ ɔpɩm-ɔkʋlɛ lafanyɔ aduesie (1,260).

⁷ Ɩnʋ ɩsa lɛda ɔsʋsʋ. Bulu-ɔbɔpʋ dɛhɛn Mikael mʋa mʋ aba abɔpʋ bɔkɔ bʋtɩ amʋ mʋa mʋ aba abɔpʋ.

⁸ Tamɛ bʋtɩ amʋ mʋa mʋ abuopʋ bʋmɛtalɩ lɩɩ amʋ́ ɔnɔ, begya amʋ́ lɛ ɔsʋsʋ ɩnʋ.

⁹ Ɩnʋ bɛkpa bʋtɩ amʋʋ bʋtɛtɩ mʋ ɩwɔ dada amʋ mʋa mʋ abɔpʋ bɛda ɔsʋlʋsʋ. Mʋ bʋtɛtra tɩ Bulu olupʋ ntɛ Satan pʋ́ ɔyɩtɔ aha fɛ́ɛ́ ɔmlɛpʋ nɩ.

¹⁰ Ɩnʋ nonu ɔmɛ kʋklʋkʋʋ kʋ lɛlɩn ɔsʋsʋ. Ɩlɛblɩ ɔbɛɛ, “Sei gyi brɛá Bulu ɔbɔ́hɔ mʋ aha nkpa nɩ! Bulu ɔbɔ́pʋ mʋ tumi gyi iwie. Mʋ Kristo, (ɔha amʋʋ Bulu lada mʋ ofuli amʋ) ɛ ɔbɛ́lɛ mʋ tumi ɔwan. Tsufɛ bakpa ɔha amʋʋ oletsia lɛ anɩ Akristofɔ ɩla amʋ da ɔsʋlʋsʋ. Ɔbʋnsam mɛ́ɛtra ka asʋn dɩnka anɩ apiosʋ, anɩ Bulu ansɩtɔ ɛ.

¹¹ Bapʋ Okufabi amʋ obugya pʋ́ mʋ ɩwɩ adansɩɛ amʋʋ begyi amʋ gyi mʋsʋ. Bʋmɔdwɛ amʋ́ ɩwɩ dʋbɩdʋbɩ, sʋ bʋmenya amʋ́ lowu kʋraa ifu.

¹² Ɩnɩ sʋ ɔsʋsʋ pʋ́ mlɩa mlɩbʋ ɩnʋ fɛ́ɛ́, mlɩnya ansigyi. Tamɛ ɔsʋlʋ mʋ́a ɔpʋ, mlɩgyɔwɩ nɩ. Ɔbʋnsam laba mlɩ wa ɔblɔsʋ, tsufɛ alawun ánɩ́ mʋ nkɛ ɩtra mɔtsɔ.”

¹³ Brɛá bʋtɩ amʋ lowun ánɩ́ bafɩn mʋ da ɔsʋlʋsʋ a, ɔlɔkʋsʋ kpla gya ɔtsɩ amʋʋ ɔlɔkwɩɩ obi amʋ.

¹⁴ Tamɛ bɛha ɔtsɩ amʋ oyitsu kpɔnkpɔɔnkpɔntɩ abamba anyɔ, mɛnɩ ɔbɛ́talɩ fuli si bʋtɩ amʋ yɔ mʋ otsiakpa ɔsʋlʋkpansʋ ɩnʋ. Bulu ɔbɛ́kɩ mʋsʋ ɩnʋ nfinsa mʋ́a ɩfʋn.

¹⁵ Ɩnʋ bʋtɩ amʋ lɛfɛn ntsu tsʋnhɛ dalɩ mʋ ɔnɔtɔ wʋlɩ ɔtsɩ amʋ ɔma, mɛnɩ ɩbɛ́kɩta mʋ natɩ.

¹⁶ Tamɛ ɔsʋlʋ legyi ɔtsɩ amʋ bʋalɛ. Ntsu amʋʋ bʋtɩ amʋ lɛfɛn tsu mʋ ɔnɔtɔ amʋ fɛ́ɛ́ lɛmɛ wie ɔsʋlʋtɔ.

¹⁷ Ɩnʋ bʋtɩ amʋ lenya ɔblɔ ɔtsɩ amʋsʋ, pʋ mʋ ɔblɔ gya mʋ abi atrahɛsʋ. Amʋ́gyi aha ánɩ́ bʋtegyi Bulu mblasʋ, bʋdɛ Yesu ɩwɩ adansɩɛ gyi a.

¹⁸ Ɩnʋ bʋtɩ amʋ lesi ɔda ɔpʋ amʋ ɔnɔ.