Atɔ Lɛsunahɛ 11 - Bulu Ntam Pɔpwɛ mʋ́a Israel Ɩlʋ

Adansɩfɔ Abanyɔ Amʋ

¹ Ɩnɩ ɔma a, bɛha mɩ oyiá bʋtɔpʋsusu atɔ. Mʋʋ Bulu-ɔbɔpʋ amʋ lɛbla mɩ ɔbɛɛ, “Kʋsʋ afʋyesusu Bulu ɔtswɛkpa obu amʋ pʋ́ afɔdɩɛ-ɔswɩ amʋ, afʋkla ɩnʋ asumpʋ amʋ.

^2-3 Tamɛ másusu nwunsɩnɛsʋ amʋ mʋ́. Si ɩnʋ tswɩ, tsufɛ Bulu lasi ɩnʋ ha aha ánɩ́ bʋmegyi Yudafɔ. Alɩ aha anfɩ bɛ́tsatsa wulu wankɩhɛ amʋsʋ tsra adʋana-nyɔ (42), igyi nkɛ ɔpɩm-ɔkʋlɛ lafanyɔ aduesie (1,260). Nɛ́ha mɩ adansɩfɔ abanyɔ bɛ́dɩda akpekpe, ha amʋ́ tumi bɛ́blɩ mɩ asʋn ánɩ́ nalɛ suna amʋ́ nkɛ amʋtɔ.”

⁴ Amʋ́gyi nfɔ-nyi anyɔ pʋ́ ɔkandɩɛ-nyi anyɔ amʋʋ ɩlɩɩ Bulu, ogyi ɔyɩ fɛ́ɛ́sʋ ogyipʋ amʋ ansɩtɔ nɩ.

⁵ Nɩ ɔkʋ ɔbwɛ agywɩɩn ánɩ́ obépilan amʋ́ a, ogya bɛ́dalɩ amʋ́ ɔnɔ, hɔ mʋ mɔ. Alɩ ɔha ánɩ́ odekleá obépilan amʋ́ obówu nɩ.

⁶ Bulu adansɩfɔ amʋ bʋbʋ tumiá bɛ́talɩ ha nyankpʋ omóotswie nkɛá bɔ́pʋblɩ Bulu asʋn amʋ fɛ́ɛ́. Bʋbʋ tumiá bɛ́talɩ ha ntsu kugyikʋ bɛ́damli obugya. Bɛ́talɩ lɛ asʋn wunhɛ kugyikʋ ɛ ba ɔsʋlʋsʋ bregyibrɛá bʋdekle.

⁷ Nɩ adansɩfɔ anfɩ bɛblɩ amʋ́ asʋn ta a, ɔbwɩkɩta-atɔ amʋʋ ɔtɛdalɩ tsu ɩlan klukluukluá ɩma ɔkatɔ amʋ ɔbɔ́kɔ amʋ́ ɩsa, gyi amʋ́sʋ, mɔ amʋ́.

⁸ Amʋ́ afuli bɛ́dɩ amʋ́ wulu yile brɔnʋsʋ. Bʋtɛtɩ wulu yile anfɩ bɛɛ, “Sodom mʋ́a Egyipte.” Ɩnʋ bɛda amʋ́ Wie Yesu manta oyikpalihɛsʋ, mɔ nɩ.

⁹ Aha bótsu abusuangyiabusuan, ɔblɩgyiɔblɩ, ɔmágyiɔmá pʋ́ ɔsʋlʋsʋ aha ɔtsan-ɔtsan fɛ́ɛ́tɔ ba bɛkɩ afuli amʋ nkɛnsa mʋ́a ɩfʋn. Bʋmɛ́ɛha ɔkpa abʋpula amʋ́ kʋraa.

¹⁰ Bulu ɔnɔsʋ atɔɩpʋ abanyɔ anfɩ bawu sʋ ansɩ bégyi ɔsʋlʋsʋ atsiapʋ. Bégyi nkɛ kpɔnkpɔntɩ, kie aba atɔ, tsufɛ Bulu ɔnɔsʋ atɔɩpʋ anfɩ bawa amʋ́ ipian kpɔnkpɔntɩtɔ kɩ.

¹¹ Tamɛ nkɛnsa mʋ́a ɩfʋn amʋ ɔma a, Bulu lɛha ɔŋɛ lɛlawie amʋ́tɔ, bɛlakʋsʋ lɩɩ ayabisʋ. Mʋ́ sʋ ifu lɛhɩɛ kɩta aha ánɩ́ bowun amʋ́.

¹² Ɩnʋ Bulu ɔnɔsʋ atɔɩpʋ abanyɔ amʋ bonu ɔmɛ kpɔnkpɔntɩ kʋ tsu ɔsʋsʋ, ɩlɛbla amʋ́ ɔbɛɛ, “Mlɩdʋ ba nfɩ!” Amʋ́ alupʋ amʋ bʋlɩɩ bʋdɛ amʋ́ kɩ, agyinde lotsu amʋ́ ya ɔsʋsʋ.

¹³ Ɔsʋlʋ lɛkpɩnkɩ kpukpukpukpu alɩ brɛ amʋtɔ kɛn. Nɩ beye wulu amʋtɔ idu a, iku-kʋlɛ fɛ́ɛ́ lobwie bun ɔsʋlʋtɔ gbloo. Aha mpɩm-sienɔ (7,000) bowu ɔsʋlʋkpɩnkɩ amʋtɔ. Ifu lɛhɩɛ kɩta atrahɛ amʋ. Mʋ́ sʋ bɔwa ɔsʋsʋ Bulu numnyam.

¹⁴ Asʋn wunhɛ nyɔsɩ latsʋn, sasɩ srɩ ɩba a.

Ɔkpɛ Sienɔsɩ

¹⁵ Mʋʋ Bulu-ɔbɔpʋ osienɔsɩ lɔfʋlɩ mʋ ɔkpɛ. Ɩnʋ ɔmɛ akpɔnkpɔntɩ lɛlɩn tsu ɔsʋsʋ bɛɛ, “Sei a, ɔyɩtɔ iwiegyi lamli anɩ Wie Bulu mʋa Kristo, (ɔha amʋʋ Bulu lada mʋ ofuli amʋ) klɛ. Obégyi iwie brɛ fɛ́ɛ́!”

¹⁶ Ɩnʋ ahandɛ adʋanyɔ-na amʋʋ bʋtsie amʋ́ mbiasʋ Bulu ansɩtɔ amʋ fɛ́ɛ́ bobun, sum mʋ,

¹⁷ blɩ bɛɛ, “Anɩ Wie Bulu Otumipʋ, ada fʋ ɩpan. Fʋletsia, fʋbʋ ɩnʋ brɛ fɛ́ɛ́. Tsufɛ fapʋ fʋ tumi kpɔnkpɔntɩ amʋ fi fʋ iwiegyi asɩ!

¹⁸ Ɔmá-ɔmá benya ɔblɔ, brɛ lafʋn ánɩ́ fʋ ɛ fénya ɔblɔ. Brɛ lafʋn ánɩ́ fégyi awupʋ asʋn. Brɛ lafʋn ánɩ́ fɔ́bwɛ yile ha fʋ asumbi, bʋgyi fʋ ɔnɔsʋ atɔɩpʋ amʋ, pʋ́ Bulu aha ánɩ́ bʋtenya fʋ ifu, nyebi ahandɛ fɛ́ɛ́. Brɛ lafʋn ánɩ́ fɛ́hɩ aha ánɩ́ bamɔ aha ɔyɩtɔ fɛ́ɛ́.”

¹⁹ Ɩnʋ befinki Bulu ɔtswɛkpa kpɔnkpɔntɩ amʋʋ ɩbʋ ɔsʋsʋ amʋ, bowun mʋ Ntam-daka obu amʋtɔ. Ɩnʋ nyankpʋ lɔwa ɩbɩ fwɩ bɩ. Odekpie, ɔprada dɛpʋtɩ, ɔmɛ ɔtsan-ɔtsan lɛlɩn kʋklʋkʋʋ, ɔsʋlʋ lɛkpɩnkɩ; atsufolibiá igyi fɛ akwebi lɛhɩɛ kpa.