Atɔ Lɛsunahɛ 10 - Bulu Ntam Pɔpwɛ mʋ́a Israel Ɩlʋ

Bulu-ɔbɔpʋ Mʋa Ɔwʋlʋ Tukuriibi

¹ Ɩnʋ nɛlawun Bulu-ɔbɔpʋ ɔwʋnlɩnpʋ bamba ɔkʋá otsu ɔsʋsʋ. Agyinde lobomli mʋ, nyankpʋtaa ɩlan mʋ awunsʋ. Mʋ ansɩtɔ lɔwankɩ fɛ owi, mʋ ayabi igyi fɛ ɔsɔtɩá ogya bʋ mʋ́tɔ.

² Ɔdɛ ɔwʋlʋ tukuriibi kʋá ɔlɛtɛɩ mʋ́tɔ. Mʋ gyɔpɩ yabi iyi ɔpʋsʋ, mʋ bɩna yabi ɛ iyi ɔsʋlʋsʋ.

³ Ɔlɔkplʋn kʋklʋkʋʋ fɛ gyata dekpoun, ɔprada asienɔ amʋ lɔpʋtɩ.

⁴ Brɛá ɔprada asienɔ amʋ lɔpʋtɩ, mbɛɛ anwanlɩn asʋn amʋʋ ɩlɛblɩ amʋ a, nonu ɔmɛ bamba tsu ɔsʋsʋ. Ɔmɛ amʋ dɛblɩ ɔbɛɛ, “Máwanlɩn asʋn amʋʋ ɔprada asienɔ amʋ ɩlablɩ amʋ. Pʋwa fʋ kpawunutɔ.”

⁵ Mʋʋ Bulu-ɔbɔpʋ amʋʋ nowun, ɔlɩɩ ɔpʋ mʋ́a ɔsʋlʋsʋ amʋ lotsu mʋ gyɔpɩ ɩbɩ fʋa yɔ ɔsʋsʋ.

⁶ Ɩnʋ ɔlɛka ɔha amʋʋ ɔbʋ nkpa brɛ fɛ́ɛ́ amʋ ntam. Mʋlɔbwɛ ɔsʋ mʋ́a asɩ, ɔpʋ mʋ́a mʋ́tɔ atɔ fɛ́ɛ́, ɔlɛblɩ ɔbɛɛ, “Bʋmɛ́ɛtra si tsia!

⁷ Tamɛ brɛá Bulu-ɔbɔpʋ sienɔsɩ amʋ ɔbɔ́fʋlɩ mʋ ɔkpɛ a, alɩ brɛ amʋtɔ Bulu asʋn ŋainhɛ amʋʋ ɔlɛhɩɛ yaɩ ɔbɛɛ, mɔ́bwɛ amʋ ɩbɛ́ba mʋ́tɔ nɩ. Ɩbɛ́ba mʋ́tɔ fɛ alɩá ɔlɛbla mʋ asumpʋ, bʋgyi mʋ ɔnɔsʋ atɔɩpʋ amʋ.”

⁸ Ɩnʋ ɔmɛ amʋʋ ɩdɛ mɩ asʋn bla tsu ɔsʋsʋ amʋ lɛtra bla mɩ ɔbɛɛ, “Yɔhɔ ɔwʋlʋ amʋʋ ɩlafinki amʋ lɛ Bulu-ɔbɔpʋ amʋʋ ɔlɩɩ ɔpʋ mʋ́a ɔsʋlʋsʋ amʋ ɩbɩtɔ.”

⁹ Mʋ́ sʋ nɔyɔ Bulu-ɔbɔpʋ amʋ wa mbɛɛ, ɔpʋ ɔwʋlʋbi amʋ ha mɩ. Mʋʋ ɔlɛbla mɩ ɔbɛɛ, “Hɔ, afʋwɩ mʋ́! Ɩbɔ́wa fʋ ɔdwɛ debidebi fɛ ɔkwɛn, tamɛ ɩmɛ́ɛkana fʋ iputɔ.”

¹⁰ Ɩnʋ nɔhɔ ɔwʋlʋbi amʋ lɛ mʋ ɩbɩtɔ, nɔwɩ mʋ́. Ɩlɔwa mɩ ɔdwɛ debidebi fɛ ɔkwɛn, tamɛ imetepi kana mɩ iputɔ.

¹¹ Mʋʋ ɔlɛtra bla mɩ ɔbɛɛ, “Ilehian ánɩ́ fɛ́lablɩ asʋn amʋʋ ɩbɛ́ba aha fɛ́ɛ́sʋ amʋ. Ɩbɛ́ba ɔmá fɛ́ɛ́, ɔblɩ ɔtsan-ɔtsan ablɩpʋ pʋ́ awie fɛ́ɛ́sʋ, fɛ alɩ amʋʋ Bulu lalɛ suna fʋ amʋ!”