Israelfɔ Ɩlʋ 98 - Bulu Ntam Pɔpwɛ mʋ́a Israel Ɩlʋ

Bulu Ɔba Begyi Ɔyɩ Asʋn

Kanfʋ-ɩlʋ.

¹ Mlɩwa ɩlʋ pɔpwɛ ha Nana Bulu, tsufɛ alabwɛ ofula! Mʋ tumi pʋ́ mʋ ɔwʋnlɩn lagyi ɩsʋ ha mʋ.

² Nana Bulu laha babɩ mʋ nkpahɔ. Alalɛ mʋ yilebwɛ suna ɔmá-ɔmá.

³ Ɔmɛtan mʋ ɔdwɛá ɩma ɔka pʋ́ ɔnɔkwalɩá ɔbʋ ha Israel woyisʋ. Aha bawun anɩ Bulu ɩsʋgyi yewie ɔyɩ ɔka.

⁴ Ɔyɩtɔ aha fɛ́ɛ́, mlɩtswɩ ope ha Nana Bulu, amlɩkplʋn ansigyisʋ wa ɩlʋ kanfʋ mʋ.

⁵ Mlɩda ɔsankuo, wa ɩlʋ kanfʋ mʋ. Mlɩda ɔsankuo, amlɩpʋ ɔmɛ dɛdɛ wa ɩlʋ ha mʋ.

⁶ Mlɩfʋlɩ ɩkpɛ mʋ́a akufa-nsiebi, amlɩpʋ ansigyi tswɩ ope Owie Nana Bulu ansɩtɔ.

⁷ Ɔpʋ mʋ́a mʋ́tɔ atɔ ɩlɛ ɔnɔ. Ɔyɩ pʋ́ mʋ́tɔ atsiapʋ ɛ fɛ́ɛ́ abʋsʋra okitikiti.

⁸ Ntsu akpɔnkpɔntɩ bʋda apian, abʋ fɛ́ɛ́ ɩwa ɩlʋ wa abatɔ,

⁹ Nana Bulu ansɩtɔ, tsufɛ ɔba begyi ɔyɩ asʋn. Obégyi mʋ́ yilebwɛ ɔkpasʋ, gyi ɔmá-ɔmá asʋn kɛkɛ.