Israelfɔ Ɩlʋ 97 - Bulu Ntam Pɔpwɛ mʋ́a Israel Ɩlʋ

Bulu Lɔfʋa Dʋn Ɔyɩ Fɛ́ɛ́

¹ Nana Bulu gyi Owie. Ɔyɩtɔ aha fɛ́ɛ́ bʋnya ansigyi, ɩwɩ ɩsankɩ ɔpʋ gbemgbesʋ awulu fɛ́ɛ́.

² Agyinde mʋ́a oklun tuun lobomli mʋ. Yilebwɛ mʋ́a asʋngyi ɔnɔkwalɩsʋ ɔlɔpʋwa mʋ obia.

³ Ogya igya mʋ nkpa, ɩdɛ mʋ alupʋ hɔ fia.

⁴ Mʋ nyankpʋ ɔfwɩ ɩbɩ a, ɩtɔwankɩ nsaɩntɔ fɛ́ɛ́. Ɔsʋlʋ towun mʋ́ kpɩnkɩ.

⁵ Abʋ tɛŋlaɩn fɛ okpin Nana Bulu ansɩtɔ, ɔyɩ fɛ́ɛ́ Owie amʋ ansɩtɔ.

⁶ Ɔsʋsʋ tɛlɛ mʋ ɔnɔkwalɩ ɔwan, aha fɛ́ɛ́ bʋtowun mʋ numnyam.

⁷ Bawa ɩkpɩ asumpʋá bʋtɔpʋ ɩkpɩ tsu ɩwɩ fɛ́ɛ́ pɛlɩtɔ. Atunku fɛ́ɛ́, mlɩba ɩwɩasɩ ha mʋ!

⁸ Oo Nana Bulu, Sionfɔ bonu a, ansɩ tegyi amʋ́. Yudafɔ ɛ bʋtenya ansigyi, fʋ asʋnbua sʋ,

⁹ tsufɛ fʋ Nana Bulu fɔfʋa dʋn ɔyɩ fɛ́ɛ́. Fʋdʋn ɔkpɩgyiɔkpɩ.

¹⁰ Mlɩ aha ánɩ́ mlɩtɔdwɛ Nana Bulu, mlɩkisi lalahɛ. Ɔtɛkɩ aha ánɩ́ bʋtamakpa mʋ ɔmasʋ, lɛ amʋ́ lalahɛ abwɛpʋ ɩbɩ.

¹¹ Wankɩ ladalɩ ha yile abwɛpʋ. Ansigyi labʋla aha ánɩ́ amʋ́ asʋn da ɔkpa ɩklʋntɔ.

¹² Aha yile, mlɩ ansɩ igyi Nana Bulu ɩwɩ, amlɩkanfʋ mʋ ɩda wankɩhɛ!