Israelfɔ Ɩlʋ 94 - Bulu Ntam Pɔpwɛ mʋ́a Israel Ɩlʋ

Ɩkɔ Ɔkapʋ Bulu

¹ Oo ɩkɔ Ɔkapʋ Nana Bulu, ɩkɔ Ɔkapʋ Bulu, kʋsʋ lɛ ɩwɩ ɔwan!

² Ɔyɩtɔ asʋn Ogyipʋ, kʋsʋ. Kʋsʋ, afʋka ɩwɩ atsupʋ ɩkɔá ɩlɛkana.

³ Oo Nana Bulu, ɔmɛnkɛ? Ɔmɛnkɛ aha lalahɛ bési ansigyi nya?

⁴ Bʋdɛ ɔnɔtɔ ka, lalahɛ abwɛpʋ fɛ́ɛ́ bʋdɛ ɩwɩ tsu.

⁵ Oo Nana Bulu, bʋdɛ fʋ aha mɔ, bʋdɛ fʋ ogyikpa ɩtɔ sɩnsɩn bwɛ.

⁶ Bʋdɛ asʋrapʋ mʋ́a afɔɔ tɩn, mɔ awumbi.

⁷ Bʋdɛblɩ bɛɛ, “Nana Bulu médewun, Yakob Bulu mɛ́dɛbɩ.”

⁸ Ɔmá amʋtɔ aha ánɩ́ amʋ́ agywɩɩn ɩma ɔsa, aha mimlahɛ, ɔmɛnkɛ mlɛ́tɩn ansɩ?

⁹ Buluá ɔlɔbwɛ asʋ, nkalɩ omóonu asʋn? Mʋá ɔlɔbwɛ ansibi, nkalɩ omóowun atɔ?

¹⁰ Mʋtotswii ɔmá fɛ́ɛ́, nkalɩ ɔmɛ́ɛbɩtɩ amʋ́ ɩsʋ? Mʋá otosuna aha atɔ, nkalɩ ɔmɛ́ɛbɩ asʋn?

¹¹ Nana Bulu yin nyankpʋsa asʋn susuhɛ, ánɩ́ itepi ma labi.

¹² Oo Nana Bulu, ansɩ igyi ɔha ánɩ́ fabɩtɩ mʋ ɩsʋ, pʋ fʋ atosunahɛ suna mʋ.

¹³ Fótsu ipian kʋsʋ mʋsʋ ipian owunkɛ amʋ, yɛfʋn brɛá bakwi ɔbɔ tswɩ ha aha lalahɛ.

¹⁴ Nana Bulu méekina mʋ aha, tswɩ mʋ ogyikpa anfɩ tsitsa,

¹⁵ tsufɛ bɛ́lagyi asʋn ɔnɔkwalɩsʋ, aha ánɩ́ amʋ́ asʋn da ɔkpa fɛ́ɛ́ bóbuo mʋ́.

¹⁶ Ma ɔbɛ́lɩɩ mɩ ɔma nɩ aha lalahɛ bɔkʋsʋ lɩɩ mɩsʋ? Ma ɔbɔ́kʋsʋ lɩɩ lalahɛ abwɛpʋsʋ ha mɩ?

¹⁷ Nɩ megyi Nana Bulu gyi mɩ bʋalɛ ogyipʋ a, tɛkɩ nayɔ nda ɔtɩnɛá ɔhaa tamatɔɩ.

¹⁸ Brɛá mbɛɛ ansrɛɩ a, oo Nana Bulu, fʋ ɔdwɛá ɩma ɔka tɛkɩta mɩ lɩɩ.

¹⁹ Nɩ asʋn ɩdʋn mɩ a, fʋteyia mɩ ɩklʋn, ansɩ tɛlagyi mɩ.

²⁰ Iwie ogyikpa ánɩ́ bʋtotsula asʋkpan, wa amandɩɛ lalahɛ a, fʋa amʋ́nyɔ mlɛ́talɩ bwɛ ɩkʋlɛ?

²¹ Babwɛ ɔnɔ-ɔkʋlɛ, kɩklɩ yile ɔbwɛpʋ nwunsʋ. Bʋtɛha aha ánɩ́ ɔlala ɩma amʋ́ ɩwɩ lowu ɩpɔn.

²² Tamɛ Nana Bulu gyi mɩ ɔtanʋkpa kinkin. Mɩ Bulu gyi mɩ ɩbʋta kpikpli.

²³ Ɔbɛ́ka amʋ́ owuntɔlɩn amʋsʋ ɩkɔ. Ɔbɔ́mɔ amʋ́ amʋ́ lalahɛ amʋ sʋ. Nana Bulu anɩ Bulu amʋ ɔbɔ́mɔ amʋ́.