Israelfɔ Ɩlʋ 92 - Bulu Ntam Pɔpwɛ mʋ́a Israel Ɩlʋ

Ɩbʋ Alɛá Bɛ́da Bulu Ɩpan

Ɔkpʋnʋ ɔdakɛ kanfʋ-ɩlʋ.

¹ Oo! Nana Bulu, Ɔsʋsʋʋsʋ Mʋ Wie, ɩbʋ alɛá bɛ́da fʋ ɩpan, wa ɩlʋ kanfʋ fʋ ɩda.

² Ɩbʋ alɛá bɛ́da fʋ ɔdwɛá ɩma ɔka ɩwɩ ɔkan nyankɩ, pʋ́ fʋ ɔnɔkwalɩ ɔkan onye,

³ da nsankuo pʋ́ akwɛ ɔtsan-ɔtsan, wa ɩlʋ dɛdɛ tsɩa mʋ́tɔ.

⁴ tsufɛ Nana Bulu, fʋ gyumagyihɛ lawa mɩ ansigyi. Mʋ́ sʋ ndɛ ɩlʋ wa ansigyisʋ.

⁵ Oo Nana Bulu, fʋ gyumagyihɛ lomoni. Fʋ agywɩɩntɔ bʋ oklu.

⁶ Ɔha ánɩ́ mʋ agywɩɩn mɔfʋn mɛ́ɛbɩ ɩnɩ. Ɔha mimlahɛ ɛ móonu ɩnɩ asɩ.

⁷ Aha lalahɛ bʋtɔpɔɩ fɛ ɩfa, ɩtɔwa alɛ ha lalahɛ abwɛpʋ, tamɛ amʋ́ fɛ́ɛ́ bɛ́ta plɩplɩplɩ.

⁸ Nana Bulu, fɔfʋa brɛ fɛ́ɛ́.

⁹ Oo Nana Bulu, fʋ alupʋ bɛ́ta, fɛ́da lalahɛ abwɛpʋ fɛ́ɛ́ saɩn,

¹⁰ tsufɛ fawa mɩ ɔwʋnlɩn fɛ kpʋkpʋ, faklɩ mɩ aba.

¹¹ Nawun mɩ alupʋ ɔdɩdakpa. Nanu alɩá aha lalahɛá bɔkʋsʋ lɩɩ mɩsʋ bata.

¹² Yile ɔbwɛpʋ tɔwa alɛ fɛ mpute. Ɔtɛdan, wa ɔwʋnlɩn fɛ Lebanon odum.

¹³ Baswie mʋ Nana Bulu woyitɔ. Ɔtɛdan wa akɩlɛ anɩ Bulu wunsɩnɛsʋ.

¹⁴ Nɩ ɔdan kʋraa a, otoswie abi. Mʋ atɛtɔ tebi, ntsu tetsia mʋtɔ,

¹⁵ pʋsuna ánɩ́ Nana Bulu asʋn da ɔkpa. Mɩ bʋta ogyi, lalahɛ kʋkʋ ɩma mʋtɔ.