Israelfɔ Ɩlʋ 91 - Bulu Ntam Pɔpwɛ mʋ́a Israel Ɩlʋ

Bulu, Gyi Mɩ Ɔtanʋkpa Pʋ́ Mɩ Oŋainkpa Kpikpli

¹ Ɔha ánɩ́ otsie Ɔsʋsʋʋsʋ Mʋ Wie amʋ oŋainkpa, Bulu Otumipʋ amʋ yiyi bun mʋsʋ,

² ɔbɛ́bla Nana Bulu ɔbɛɛ, “Bulu, fʋgyi mɩ ɔtanʋkpa pʋ́ mɩ oŋainkpa kpikpli, mɩ Buluá mɩ ansɩ dɩn fʋsʋ.”

³ Mʋ ɔbɛ́lɛ fʋ lɛ ɔfɩnɩpʋ yibi pʋ́ ɩlɔ lalahɛá ɩtɔmɔtɔ.

⁴ Ɔbɔ́pʋ mʋ atɛ bun fʋsʋ. Fénya ɔtanʋkpa mʋ abamba asɩ. Mʋ ɔnɔkwalɩ ɩbɔ́bwɛ fʋ kʋtʋ, ibégyi ɩban wa fʋ.

⁵ Fʋméenya atɔ lalahɛ kʋkʋ ifu onye, ntɛ mbɩn ánɩ́ bʋdɛtswɩ ɔyɩkɛhɛtɔ,

⁶ ɩlɔ tsankɩhɛá ɩna okluntɔ, ntɛ mʋ́á ɩtɔmɔ aha ɔpa gyein.

⁷ Ɔpɩm (1,000) bɛ́dɩda fʋ abɩntɔ, mpɩmdu (10,000) ɛ bɛ́dɩ fʋ gyɔpɩsʋ, tamɛ fʋ mʋ́ ɩbɔ́tsʋn fʋsʋ.

⁸ Ansibi wʋlɛ fɔ́pʋwun alɩá Bulu ɔbɛ́ka lalahɛ abwɛpʋ ɩkɔ.

⁹ Fapʋ Nana Bulu bwɛ fʋ ɔtanʋkpa, pʋ Ɔsʋsʋʋsʋ Mʋ Wie amʋ bwɛ fʋ otsiakpa.

¹⁰ Mʋ́ sʋ tɔtɔɔtɔ mɔ́ɔbwɛ fʋ, tsitsa kʋkʋ ɛ mɛ́ɛba fʋ woyisʋ,

¹¹ tsufɛ Bulu ɔbɛ́ha mʋ abɔpʋ bɛ́kpa fʋ, fʋ ɔtsʋnkpa fɛ́ɛ́.

¹² Bɛ́kpata fʋ ɩbɩtɔ, mɛnɩ fʋ yabi mɛ́ɛda ibwi.

¹³ Fɛ́tsatsa gyata mʋ́a sapasʋ, dʋ lɩɩ gyata ɔwʋnlɩnpʋ mʋa ɩwɔsʋ.

¹⁴ Bulu ɔbɛɛ, “Nɛ́lɛ mʋ, tsufɛ ɔtɛhɩɛ dwɛ mɩ. Nótsu mʋ lɩɩ ɔwanklaankpa, tsufɛ oyin mɩ ɩda.

¹⁵ Osu kpoli mɩ a, nɔ́sɔ mʋ ɔnɔ. Nétsia mʋ wa ɩkplanbɩ. Nɛ́lɛ mʋ, wa mʋ numnyam.

¹⁶ Nɛ́ha mʋ nkpa tɩntɩn, obówun mɩ nkpahɔ.”