Israelfɔ Ɩlʋ 90 - Bulu Ntam Pɔpwɛ mʋ́a Israel Ɩlʋ

Ɔwʋlʋ 4sɩ ( Israelfɔ Ɩlʋ 90--106 ) Bulu, Ha Fʋ Awɩtɔlɛ Ibuo Anɩ

Bulu ɔha Mose mpaɩ.

¹ Oo anɩ Wie, tsu ɔyɩ ɔpá fʋgyi otsiakpa ha anɩ otuntufla fɛ́ɛ́.

² Asa fɛlɛ abʋ, lɛ ɔyɩ a, fʋgyi Bulu tsu brɛá ɔyɩ mɔkʋlɩn yɛfʋn brɛá ɩtamata.

³ Fʋteyinkia anɩ anyankpʋsa ya ɩsɩtɔ, fʋtɛblɩ fɛɛ, “Anyankpʋsa, mlɩyinki.”

⁴ Nfi ɔpɩm (1,000) igyi fɛ igye ɔyɩkɛhɛá ɩlɔtsʋn fʋ wa, ntɛ onye itinbi.

⁵ Fʋtɛha amʋ́ nkpa tɔmɔ ɔnɔ, fɛ okude. Bʋgyi fɛ ɩfa, ɩtɔbwɛ mlɔɔ nyankɩ.

⁶ Nyankɩ ɩtɔwa ntswɩtswɩ bwɛ mlɔɔ, tamɛ ntʋpwɛsʋ ɩtɔbʋ, kpada.

⁷ Fʋ ɔblɔ tɔmɔ anɩ, fʋ ɩyɩn ɛ bʋ anɩ ifu.

⁸ Faha anɩ lakpan fɛ́ɛ́ ɩda fʋ ansɩtɔ. Fʋyin mʋ́á anɩlabwɛ ŋain kʋraa.

⁹ Fʋ ɔblɔ laka anɩ nkpa itin. Anɩ nkɛ tɛta fɛ ɔŋɛ lʋn fʋhɛ.

¹⁰ Anɩ nkɛ fɛ́ɛ́ igyi nfi aduesienɔ (70), nɩ anɩlɔwa ɔwʋnlɩn a, nfi adukwe (80). Mʋ́ o a, asʋn wunhɛ mʋ́a ipian sɔɔn bʋ mʋ́tɔ. Ɩtɔtsʋn, anɩtɔfwɩ.

¹¹ Ma yin alɩá fʋ ɔblɔ ɔnɔ ɩbʋ ɔnlɩn, pʋ́ ɩyɩn ánɩ́ fʋbʋ, mɛnɩ obénya fʋ ifu?

¹² Mʋ́ sʋ suna alɩá abɛ́kla anɩ nkɛ, mɛnɩ abénya nyansa.

¹³ Nana Bulu, kokoli damli kɩ anɩ. Ɔmɛnkɛ fési ɔblɔ tswɩ? Wun fʋ asumbi nwɛ!

¹⁴ Ha fʋ ɔdwɛá ɩma ɔka ɩbʋla anɩ nyankɩ, mɛnɩ abɔ́wa ɩlʋ nya ansigyi anɩ nkpatɔ fɛ́ɛ́.

¹⁵ Faha ɩlapian anɩ wa ɔpá. Ha ansɩ igyi anɩ nfi tsɔtsɔɔtsɔá anɩlatsia ɩkplantɔ fɛ́ɛ́ ɔnɔ.

¹⁶ Pʋ fʋ agyʋma suna fʋ asumpʋ, afʋha amʋ́ abi abʋwun fʋ numnyam.

¹⁷ Anɩ Wie Bulu, fʋ awɩtɔlɛ ibuo anɩ, anɩ gyumagyihɛ ɩwa alɛ ha anɩ. Ee! Ɩwa alɛ ha anɩ.