Israelfɔ Ɩlʋ 89 - Bulu Ntam Pɔpwɛ mʋ́a Israel Ɩlʋ

Bulu Mʋa Dawid Nsɩnɛ Ntam

Esrayin Etan atosuna ɩlʋ.

¹ Nana Bulu, nɔ́wa fʋ ɔdwɛá ɩma ɔka ɩwɩ ɩlʋ brɛ fɛ́ɛ́. Nɛ́da fʋ ɔnɔkwalɩwa ɩwɩ ɔkan suna otuntufla fɛ́ɛ́.

² Nablɩ mbɛɛ, fʋ ɔdwɛá ɩma ɔka ibétsia brɛ fɛ́ɛ́. Fʋ ɔnɔkwalɩ ibétsia brɛ fɛ́ɛ́, fɛ ɔsʋsʋ ɩnʋ.

³ Fʋlɛblɩ fɛɛ, “Naka ntam ha mɩ osumbi Dawid amʋʋ nalɛ amʋ. Ntam ánɩ́ naka ha mʋ gyi:

⁴ ‘Nɛ́ha fʋ abi-aná bégyi iwie brɛ fɛ́ɛ́. Nɛha fʋ owie-obia ibétsia ha fʋ abi-aná ánɩ́ bɛlɩn fɛ́ɛ́.> ” Ɩya.

⁵ “Oo Nana Bulu, fʋ abɔpʋ bʋkanfʋ fʋ ofula, mʋ́a fʋ ɔnɔkwalɩ amʋ́ ɔpasuatɔ.

⁶ Ma bʋ ɔsʋsʋ ɩnʋá bɔ́pʋ mʋ kapʋ fʋ? Fʋ abɔpʋtɔ ɔmɔmʋ lɔfʋn fʋ?

⁷ Fʋ abɔpʋ ɔpasua bʋtenya fʋ ifu. Fʋdʋn ɔsʋsʋ atumipʋá bobomli fʋ fɛ́ɛ́.

⁸ Oo Ɩsa Ɔnɔ Ɔlɩɩpʋ Bulu, Nana Bulu, ma bʋ tumi fɛ fʋ? Ɔnɔkwalɩ labomli fʋ.

⁹ Fʋdɛ ɔpʋá ɩdɛdasʋ gyi. Nɩ ɩdɛda alɩágyialɩá a, fʋtɛha mʋ́ ɩtɔlʋa.

¹⁰ Fʋlɛda ntsutso-ɔbwɩ lalahɛ Rahab amʋ mɔ, fɔpʋ tumi da fʋ alupʋ saɩn.

¹¹ Fʋbʋ ɔsʋsʋ, fʋbʋ asɩ. Fʋlotsua ɔyɩ pʋ́ mʋ́tɔ atɔ fɛ́ɛ́ asɩ.

¹² Fʋlɔbwɛ gyɔpɩ mʋ́a bɩnasʋ fɛ́ɛ́. Tabor pʋ́ Hermon abʋ bʋdɛ ɩlʋ wa kanfʋ fʋ ɩda.

¹³ Fʋ ɩbɩ bʋ tumi, ɩbʋ ɔwʋnlɩn. Fʋ gyɔpɩ ɩbɩ lɔfʋa.

¹⁴ Yilebwɛ mʋ́a asʋngyi ɔnɔkwalɩsʋ fɔpʋwa fʋ obia. Ɔdwɛá ɩma ɔka mʋ́a ɔnɔkwalɩ tegya fʋ nkpa.”

¹⁵ “Oo Nana Bulu, aha ánɩ́ bʋyin ope tswɩ, bʋna fʋ ansɩtɔ wankɩ amʋtɔ bʋnya ansigyi.

¹⁶ Ansɩ bégyi amʋ́ fʋ ɩdatɔ ɔyɩkɛhɛtɔ fɛ́ɛ́. Fʋ yilebwɛ sʋ fatsu amʋ́ fʋa,

¹⁷ tsufɛ fʋgyi amʋ́ ɔwʋnlɩn numnyam. Fʋ awɩtɔlɛ tɛha anɩ tumi.

¹⁸ Tsufɛ fʋ Nana Bulu bʋ anɩ kʋtʋ. Fʋ Israel ɔha Wankɩhɛ bʋ anɩ owie.”

¹⁹ Ɛkɛ ɔkʋ fɔtɔɩ tsʋn atowunhɛtɔ, suna aha ánɩ́ bʋtamadalɩ fʋ ɔma fɛɛ, “Nawa ɩsa ɔkɔpʋ ɔkʋ ɔwʋnlɩn. Nalɛ mʋ tsu aha amʋtɔ, tsu mʋ fʋa.

²⁰ Nawun mɩ osumbi Dawid anfɩ. Napʋ mɩ ofobi kpa mʋ, pʋda mʋ ofuli.

²¹ Mɩ tumi bɛ́lɩɩ mʋ ɔma, mɩ ɩbɩ ɛ bɔ́wa mʋ ɔwʋnlɩn.

²² Mʋ olupʋ ɔkʋkʋ mɛ́ɛtalɩ gyi mʋsʋ ɩsatɔ. Ɔha lalahɛ ɔkʋkʋ mɛ́ɛtalɩ ba mʋ asɩ.

²³ Nɔ́mɔ adʋn lɛ mʋ ansɩtɔ, da mʋ alupʋ lɛ da.

²⁴ Mɩ ɔnɔkwalɩ pʋ́ mɩ ɔdwɛá ɩma ɔka bóbuo mʋ. Mɩ ɩda sʋ obénya ɔwʋnlɩn.

²⁵ Nɛ́ha mʋ iwie ogyikpa bótsu ɔpʋ ɔnɔ yɔwɔ ntsu bʋnkpa.

²⁶ Ɔbɛ́bla mɩ ɔbɛɛ, ‘Fʋgyi mɩ Sɩ, mɩ Bulu pʋ́ mɩ nkpahɔ bʋta!>

²⁷ Nɔ́bwɛ mʋ mɩ bitɩ, ɔbɔ́bwɛ ɔsʋlʋsʋ awie fɛ́ɛ́ nwun.

²⁸ Mɩ ɔdwɛá ɩma ɔka ibétsia mʋsʋ brɛ fɛ́ɛ́. Mɩa mʋnyɔ nsɩnɛ ntam bɛ́lɩɩ kinkiinkin.

²⁹ Iwiegyi mɛ́ɛdalɩ mʋ woyitɔ ɛkɛkɛɛkɛ. Alɩ amʋʋ ɔsʋsʋ bʋ ɩnʋ brɛ fɛ́ɛ́ amʋ a, alɩ mʋ owie-obia ɛ ibétsia nɩ.”

³⁰ “Tamɛ nɩ mʋ abi bekina mɩ atosunahɛ, bʋmɛnatɩ mɩ amandɩɛ ɔkpasʋ,

³¹ bʋmobu mɩ amandɩɛ, bʋmɛkɩta mɩ mblatɔ a,

³² mʋmʋ nɛ́hɩɛ pɩtɩ amʋ́ oyibibi amʋ́ lakpan sʋ, wɛn amʋ́ mplɩ amʋ́ lalahɛ sʋ.

³³ Tamɛ mmɛ́ɛdɩnkɩ mɩ ɔdwɛá ɩma ɔka lɛ mʋsʋ, ntɛ kina ɔnɔkwalɩwa ha mʋ.

³⁴ Mmɔ́ɔtʋn mɩ ntam ánɩ́ nɛka ha mʋ, ntɛ tsɛ mɩ asʋn blɩhɛ ha mʋ.

³⁵ Naka mɩ ɩda ntam ɔtsawʋlɛ pɛ, ánɩ́ mmɔ́ɔwa afunu suna Dawid ɛkɛkɛɛkɛ.

³⁶ Iwiegyi bétsia mʋ woyitɔ brɛ fɛ́ɛ́. Mʋ owie-obia bétsia mɩ ansɩtɔ brɛ fɛ́ɛ́, fɛ owi.

³⁷ Ibétsiá fɛ ɔtsra, mʋ́gyi ɔdansɩyin ɔnɔkwalɩpʋá ɔbʋ nwʋlʋtasʋ nɩ.” Ɩya.

³⁸ “Oo Bulu, tamɛ fakina mʋ, gya mʋ. Ɔblɔ ɩhɩɛ dɛ fʋ ɔha anfɩ fada ofuli anfɩsʋ.

³⁹ Fatʋn ntam amʋʋ fɛka ha fʋ osumbi amʋ, falɛ ntʋkʋta mʋ yabitɔ.

⁴⁰ Fabwiebwie mʋ abunti fɛ́ɛ́ bun, fayinta mʋ oŋainkpa fɛ́ɛ́.

⁴¹ Ɩnʋ atsʋnpʋ bʋdɛ mʋ atɔ wi. Ɔmá bambasʋfɔ bʋdɛ mʋ ɔblɔla bwɛ.

⁴² Faha mʋ anyaba banya ɔwʋnlɩn mʋsʋ, ansɩ dɛ mʋ alupʋ fɛ́ɛ́ gyi.

⁴³ Faha mʋ ɔdayi ɔnɔ lawu, fʋmɛha mʋ ɔtalɩ lɩɩ ɩsa ɔnɔ.

⁴⁴ Faswɩɩ mʋ mʋ akɔnfra, kpa mʋ owie-obia da.

⁴⁵ Faka mʋ nkpa itin, pʋ́ pɛlɩ dɩda mʋ.” Ɩya.

⁴⁶ “Oo Nana Bulu, ɔmɛnkɛ? Féŋain ɩwɩ brɛ fɛ́ɛ́? Ɔmɛnkɛ fʋ ɩklʋn bési ogya tsii?

⁴⁷ Kaɩn ánɩ́ mɩ nkpa igyi ɔbɩlɔ pɛ. Mʋ́ sʋ kpalɩ fɔbwɛ nyankpʋsa?

⁴⁸ Ma ɔbɛ́talɩ tsia nkpa, lowu mɔ́ɔpʋ mʋ ɛkɛkɛɛkɛ? Ma ɔbɛ́talɩ srɩ si lowu?” Ɩya.

⁴⁹ Anɩ Wie, bɩmbɩ ɔpá fɔpʋ ɔnɔkwalɩ ka fʋ ɔdwɛá ɩma ɔka ɩwɩ ntam ha Dawid. Nkʋnʋ ɩbʋ?

⁵⁰ Mátan ɔblɔla ánɩ́ bʋdɛ fʋ asumbi bwɛsʋ, alɩá nahɔ ɔmá bambasʋfɔ asiabi dɩnka mɩ klʋnsʋ.

⁵¹ Nana Bulu, fʋ alupʋ bʋdɛ owieá fɛda mʋ ofuli ɔblɔla bwɛ. Ɔtɩnɛgyiɔtɩnɛá ɔyɔ a, bʋdɛ mʋ ɔblɔla bwɛ.

⁵² Mlɩkanfʋ Nana Bulu brɛ fɛ́ɛ́! Ɩbá mʋ́tɔ, ɩtra laba mʋ́tɔ.