Israelfɔ Ɩlʋ 85 - Bulu Ntam Pɔpwɛ mʋ́a Israel Ɩlʋ

Nkpa Ɔhɔpʋ Bulu, Yinkia Anɩ Ba Fʋ Wa

Kora abi kanfʋ-ɩlʋ ha ɩlʋ osunapʋ.

¹ Oo Nana Bulu, fagyi fʋ ɔsʋlʋ bʋalɛ. Fʋlalɛ Yakob abi-aná ndountɔ.

² Fesi fʋ aha lalahɛ kie amʋ́, bun ansibi amʋ́ lakpan fɛ́ɛ́sʋ. Ɩya.

³ Fesi ɔblɔ fɛ́ɛ́, si fʋ ɔblɔ kinkiinkin ɔmagya.

⁴ Anɩ nkpa ɔhɔpʋ Bulu, yinkia anɩ ba fʋ wa, afʋtswɩ anɩ ɩwɩ ɔblɔ tsalɩfwɩ.

⁵ Fénya ɔblɔ anɩsʋ alɩɩ yɔ? Fɛ́ha ɔblɔ bɛ́kɩta fʋ yɛtʋ anɩ abi-aná fɛ́ɛ́?

⁶ Fʋmɛ́ɛlawa anɩ ɔwʋnlɩn, mɛnɩ fʋ aha bénya fʋ ɩwɩ ansigyi?

⁷ Oo Nana Bulu, ha fʋ ɔdwɛá ɩma ɔka ɩba anɩsʋ, afʋhɔ anɩ nkpa.

⁸ Ha mɩ annu asʋn ánɩ́ Nana Bulu ɔbɛ́blɩ, tsufɛ ɔbɛ́bla mʋ aha ánɩ́ bʋtamakpa ɔma ha mʋ iwilwii asʋn, tamɛ máha amʋ́ abʋtra bwɛ mimlala.

⁹ Lɛlɛ, mʋ nkpahɔ ɩma ɩfɔ aha ánɩ́ bʋtenya mʋ ifu wa, fówun mʋ numnyam bétsia anɩ ɔsʋlʋsʋ.

¹⁰ Bulu ɔdwɛá ɩma ɔka mʋ́a mʋ aha ɔnɔkwalɩwa béfia aba. Aha yilebwɛ mʋ́a Bulu iwilwii ɛ bɛ́lata aba puta.

¹¹ Aha bɔ́wa ɔnɔkwalɩ ha Bulu ɔsʋlʋsʋ, yile Ɔbwɛpʋ Bulu ɔbɛ́kɩ amʋ́ tsu ɔsʋsʋ.

¹² Ee, Nana Bulu ɔbɔ́pʋ atoyile sɩsɩ, anɩ ɔsʋlʋsʋ atɔ bɔ́wa alɛ.

¹³ Yilebwɛ bégya mʋ nkpa, ɩbɔ́tɔ ɔkpa ha mʋ yabi ɔtsakpa.