Israelfɔ Ɩlʋ 84 - Bulu Ntam Pɔpwɛ mʋ́a Israel Ɩlʋ

Bulu Otsiakpa Wunsɩnɛsʋ Tsia Ɛkɛwʋlɛ

Kora abi kanfʋ-ɩlʋ ha ɩlʋ osunapʋ. Bɔ́pʋ Gatfɔ ɔmɛ da mʋ́.

¹ Oo ɩsa ɔnɔ Ɔlɩɩpʋ Nana Bulu, fʋ otsiakpa ɩhɩɛ bʋ mɩ ansigyi o!

² Fʋ otsiakpa wunsɩnɛsʋ yɔ ɩhɩɛ dɩn mɩ ɔwɔlɩ. Mɩ nyankpʋsa-oyi amʋ fɛ́ɛ́ ndɛ ɩlʋ wa kanfʋ Bulu Ɔkɩankpapʋ.

³ Ɩsa ɔnɔ Ɔlɩɩpʋ Nana Bulu, mɩ Owie pʋ́ mɩ Bulu, akensire kʋraa babwɛ asia, anampesekie babwɛ amʋ́ ɔkakpa fʋ afɔdɩɛ-ɩswɩasɩ.

⁴ Ansɩ lagyi aha ánɩ́ bʋtsie fʋ woyitɔ, bʋdɛ ɩlʋ wa kanfʋ fʋ bregyibrɛ. Ɩya.

⁵ Ansɩ igyi aha ánɩ́ amʋ́ ɔwʋnlɩn itsu fʋtɔ, amʋ́ ansɩ dɩn Sion ɔkpasʋ.

⁶ Brɛá bʋna Baka tsonkolitɔ a, ntsu lɔwɩ dalɩ, nyankpʋ gyankpapʋ ɛ lɛha ntsu letitii ɩnʋ.

⁷ Fʋ aha bɔ́wa ɔwʋnlɩn, lawa ɔwʋnlɩn dɩnka. Bówun Buluá ɔdʋn ɩkpɩ fɛ́ɛ́ Sion.

⁸ Ɩsa Ɔnɔ Ɔlɩɩpʋ Bulu, Nana Bulu, nu mɩ isu. Yakob Bulu, nu mɩ mpaɩ! Ɩya.

⁹ Oo Bulu, kɩ anɩ kʋtʋ. Ogyi ɔha anfɩ fada mʋ ofuli anfɩ, afʋwun mʋ nwɛ.

¹⁰ Fʋ otsiakpa wunsɩnɛsʋ tsia ɛkɛwʋlɛ bʋ alɛ dʋn ɔtɩnɛgyiɔtɩnɛ tsia nfi ɔpɩm (1,000). Ɩbʋ mɩ alɛá nɔ́bwɛ fʋ woyi ɔnɔ ogyopʋ, dʋn ánɩ́ nétsia lalahɛ abwɛpʋ otsiakpa.

¹¹ Nana Bulu, fʋgyi fɛ owi mʋ́a kʋtʋ. Fʋtɔpʋ awɩtɔlɛ mʋ́a numnyam kpa anɩ. Fʋtamakina yile bwɛ ha aha ánɩ́ amʋ́ asʋn da ɔkpa.

¹² Oo Ɩsa Ɔnɔ Ɔlɩɩpʋ Nana Bulu, ansɩ dɛ ɔhagyiɔha ánɩ́ mʋ ansɩ dɩn fʋsʋ gyi.