Israelfɔ Ɩlʋ 83 - Bulu Ntam Pɔpwɛ mʋ́a Israel Ɩlʋ

Bulu, Mákpa Ɔnɔ Bun

Asaf kanfʋ-ɩlʋ mʋ́a ɩlʋ wahɛ.

¹ Oo Bulu, mákpa ɔnɔ bun. Mábwɛ diin, si tsia kɩ!

² Kɩ, kpokiti lada fʋ alupʋtɔ. Aha amʋʋ bʋtamabu fʋ amʋ ansɩ lapɛ fʋsʋ.

³ Baŋain bʋdɛ agywɩɩn lalahɛ bwɛ fʋ ahasʋ. Bafia kɩta agywɩɩn aha amʋʋ fapʋwa ikpu amʋsʋ.

⁴ Bʋdɛblɩ bɛɛ, “Mlɩba abwie ɔmá anfɩ, fówun bʋmɛ́ɛtra kaɩn Israel ɩdasʋ ɛkɛkɛɛkɛ.”

⁵ Babwɛ ɩkʋlɛ, bwɛ agywɩɩn fʋsʋ, ka fʋ ɩwɩ ntam.

⁶ Amʋ́gyi Edomfɔ, Ismael abi-aná, Moabfɔ pʋ́ Hagar abi-aná,

⁷ Gebalfɔ, Amonfɔ, Amalekfɔ, Filistifɔ pʋ́ Tiro wulutɔ atsiapʋ.

⁸ Asiriafɔ ɛ bayɛmanta amʋ́sʋ. Amʋ́gyi Lot abi-aná ɔwʋnlɩn nɩ. Ɩya.

⁹ Bwɛ amʋ́ fɛ alɩ amʋʋ fɔbwɛ Midianfɔ, pʋ́ alɩ amʋʋ fɔbwɛ Sisera mʋa Yabin, Kison ntsu ɔnɔ amʋ.

¹⁰ Fɔmɔ amʋ́ En-dor, amʋ́ afuli bɔplɔ bun ɔsʋlʋ amʋsʋ, fɛ wuna.

¹¹ Ha amʋ́ aha titriu abʋwu fɛ Oreb mʋa Seeb, afʋha amʋ́ ɔnɔ alɩɩpʋ abʋbwɛ fɛ Seba mʋa Salmuna.

¹² Amʋ́lɛblɩ bɛɛ, “Mlɩha apʋ Bulu ɔsʋlʋ bwɛ anɩ klɛ.”

¹³ Mɩ Bulu, ha amʋ́ abʋdasaɩn fɛ alɩá kpankpantrudu totsu ɩsɩ, ntɛ fɛ alɩá afu tɔtsʋan ntɛtɛ.

¹⁴ Bʋhɔ fɛ alɩá ɩpʋ tetsii ogya, hɔ abʋ.

¹⁵ Alɩ fʋha atsufu ɩsrɩ gya amʋ́, afʋpʋ alankpla wa amʋ́ ifu nɩ.

¹⁶ Oo Nana Bulu, ha pɛlɩ ɩkɩta amʋ́, abʋdunka fʋ ɔkpa.

¹⁷ Pɛlɩ ɩkɩta amʋ́, abʋnya ifu brɛ fɛ́ɛ́. Bʋsʋpa, abʋwu.

¹⁸ Ha amʋ́ abʋbɩá fʋ nkʋlɛ gyi Nana Bulu, Ɔsʋsʋʋsʋ Mʋ Wieá fʋdɛ ɔsʋlʋ fɛ́ɛ́sʋ gyi.