Israelfɔ Ɩlʋ 78 - Bulu Ntam Pɔpwɛ mʋ́a Israel Ɩlʋ

Bulu, Aha Nwɛ Owunpʋ Mʋ́a Lakpan Osikiepʋ

Asaf atosuna ɩlʋ.

¹ Oo mɩ ɔmá, mlɩyaa asʋ amlɩnu mɩ atosunahɛ. Mlɩnu mɩ ɔnɔtɔ asʋn!

² Nɔ́tɔɩ ayebisʋ, pʋlɛ bɩmbɩ asʋn ŋaɩnhɛ ɔwan.

³ Asʋn ánɩ́ anɩ anain bɛbla anɩ, anɩlanu, anɩlabɩ.

⁴ Anɩméesi ŋain amʋ́ abi-aná. Abɛ́bla abi-aná ánɩ́ bɛ́ba bɛlɩn Nana Bulu tumi, mʋ ofula akpɔnkpɔntɩ pʋ́ mʋ bwɛhɛ.

⁵ Bulu lɛlɛ ɔnɔ suna Yakob abi-aná. Ɔlɔpʋ mʋ atosunahɛ ha Israelfɔ, ɔlɛbla anɩ anain ɔbɛɛ, bʋpʋsuna amʋ́ abi.

⁶ Mɛnɩ otuntufla pɔpwɛ abi ɛ bɛ́bɩ mʋ́, pʋsuna amʋ́ abi,

⁷ abʋpʋ ansɩ dɩnka Bulusʋ. Bʋmátan mʋ atɔ bwɛhɛsʋ, bʋgyi mʋ mblasʋ.

⁸ Mɛnɩ bʋmɔ́ɔbwɛ fɛ amʋ́ anain ánɩ́ bɔwa asʋtɔ-ɔnlɩn, kʋsʋ lɩɩ Bulusʋ. Bʋmɔpʋ amʋ́ ɩklʋn dɩnka mʋsʋ, bʋmɔwa ɔnɔkwalɩ ɛ ha mʋ.

⁹ Efraim mbɩn atswɩpʋ bɛdɩda atɔ, tamɛ bɔkɔ srɩ ɩsa ɔkɔkɛ.

¹⁰ Bʋmegyi amʋ́a Bulu nsɩnɛ ntamsʋ, bekina mʋ atosunahɛsʋ gyi.

¹¹ Bɛtan mʋ bwɛhɛ pʋ́ ofula akpɔnkpɔntɩá ɔlɔbwɛ suna amʋ́sʋ.

¹² Bɛtan mʋ́á ɔlɔbwɛ ha amʋ́ anain Soan ɔsʋlʋsʋ, Egyipte ɔmátɔ kʋraasʋ.

¹³ Oleye ɔpʋtɔ anyɔ ha amʋ́ bɔtsʋn, ɔlɛha ɔpʋ ntsu lɔkʋsʋ lɩɩ fɛ bunti.

¹⁴ Ɔlɛha agyinde legya amʋ́ nkpa, kpa amʋ́ ɔyɩkɛhɛtɔ, ogya plɛnplɛn lɛkpa amʋ́ onye fɛ́ɛ́.

¹⁵ Ɔlɛmaɩn abʋta ɔsʋlʋkpan amʋtɔ, ntsu kpɔnkpɔntɩ lɛdalɩ, bonun.

¹⁶ Ɔlɛha ntsu kpɔnkpɔntɩ lɛdalɩ tsu bʋta amʋtɔ, bʋla, ɩdɛtsʋn.

¹⁷ Mʋ́ ɔma oo, bɛtra tsia bwɛ lakpan pʋkʋsʋ lɩɩ Ɔsʋsʋʋsʋ Mʋ Wiesʋ ɔsʋlʋkpan amʋsʋ.

¹⁸ Bɔsɔ Bulu kɩ amʋ́ ɩklʋntɔ bɛɛ, ɔha amʋ́ atogyihɛá amʋ́ onuto bʋdekle.

¹⁹ Bɔtɔɩ Bulusʋ bɛɛ, “Bulu ɔbɛ́talɩ tswɩ ɔpʋnʋ ha anɩ ɔsʋlʋkpansʋ nfɩ?

²⁰ Ɔlɔpʋ oyi pɩtɩ bʋta, ntsu lɛfɛn dalɩ, bʋla, ɩhɩɛ dɛtsʋn. Ɔbɛ́talɩ nya iye mʋ́a atogyihɛ ɛ ha mʋ aha?”

²¹ Brɛá Nana Bulu lonu asʋn anfɩ a, ɔblɔ lɛhɩɛ kɩta mʋ. Ɔlɛha ogya letsii wa Yakob abi-anátɔ. Olenya ɔblɔ kɩtakɩta Israelfɔsʋ,

²² tsufɛ bʋmɔhɔ mʋ gyi, bʋmɔpʋ ansɩ dɩnka mʋ nkpahɔ tumisʋ.

²³ Tamɛ mʋ́ o a, ɔlɛlɛ ɔnɔ wa nwʋlʋta, ɔsʋsʋ lefinki.

²⁴ Ɔlɛha mana lotswie bun amʋ́ begyi, ɔlɛha amʋ́ ɔsʋsʋ atogyihɛ.

²⁵ Anyankpʋsa begyi Bulu-abɔpʋ atogyihɛ. Ɔlɛha amʋ́ atogyihɛ, begyi alɩá bɛ́talɩ.

²⁶ Ɔlɛha owi ɔdalɩkpa afu lɔtsʋn ɔsʋsʋ, ɔlɔpʋ mʋ tumi bɩtɩa ɔsasɩ afu ba.

²⁷ Ɔlɛkpakpa mbubwi bun amʋ́, benya aye tsɔtsɔɔtsɔ fɛ ɔpʋ ɔnɔ ɩsɩ.

²⁸ Ɔlɛha bɛkpakpa bun amʋ́ ɔswɩɩkpa, bomli amʋ́ otsiakpa.

²⁹ Ɔlɛha amʋ́ tɔá bʋdekle. Mʋ́ sʋ amʋ́tɔ okugyiɔkʋ legyi mwɛ.

³⁰ Tamɛ botsutsua abʋgyi amʋ́ awɔlɩtɔ amʋ ta, atogyihɛ amʋ mɛta amʋ́ ɔnɔtɔ,

³¹ Bulu lenya ɔblɔ amʋ́sʋ, mɔ amʋ́tɔ nyasubi awʋnlɩnpʋ, ba Israel asɩ.

³² Tamɛ ɩnɩ fɛ́ɛ́ ɔma a, bʋmesi lakpan bwɛ. Bowun ofula ánɩ́ ɔdɛbwɛ, tamɛ bʋmɔhɔ mʋ gyi.

³³ Mʋ́ sʋ ɔlɛha amʋ́ nkɛ lɛta fɛ ɔŋɛ fʋhɛ. Betsia tɩn wu amʋ́ nkpatɔ.

³⁴ Brɛá ɔdɛ amʋ́ mɔ a, bodunka mʋ ɔkpa. Bɛdamli ɩklʋntɔ, dunka mʋ ɔkpa kinkiinkin.

³⁵ Bɛkaɩn ánɩ́ Bulu gyi amʋ́ ɩbʋta. Ɔsʋsʋʋsʋ Mʋ Wie Bulu gyi amʋ́ Ɔkalɛpʋ.

³⁶ Tamɛ mlɛ bɛmlɛ mʋ, wa afunu suna mʋ.

³⁷ Bʋmɛhɩɛ pʋ amʋ́ ɩklʋn dɩnka mʋsʋ. Bʋmegyi mʋa amʋ́nyɔ nsɩnɛ ntamsʋ.

³⁸ Tamɛ ɔbʋ nwewun. Mʋ́ sʋ olesi amʋ́ lakpan kie, ɔmɔmɔ amʋ́. Oletsia kɩta ɩwɩ, ɔmɛlɛ mʋ ɔblɔ fɛ́ɛ́ ɔwan.

³⁹ Ɔlɛkaɩn ánɩ́ ɔyʋlʋ bʋgyi. Bʋtɔkɔsɩ wu, fɛ afuá ɩtsʋn ɩtamayinki ba.

⁴⁰ Betsia kʋsʋ lɩɩ mʋsʋ ɔsʋlʋkpansʋ ɩnʋ, ahʋmɩtɩ lɛkɩta Bulu!

⁴¹ Bɔsɔ mʋ kɩ, lasɔ mʋ kɩ, pʋwa Israel Ɔha Wankɩhɛ amʋ ɔblɔ.

⁴² Bʋmɛkaɩn mʋ tumi, ntɛ ɛkɛá ɔlɛlɛ amʋ́ tsu adʋn ɩbɩsʋ.

⁴³ Nkɛá ɔlɛlɛ mʋ osuna ɔwan Egyipte pʋ́ ofula ánɩ́ ɔlɔbwɛ Soan ɔsʋlʋsʋ.

⁴⁴ Ɔlɛha amʋ́ ntsu abʋnkpa lɛdamli obugya, bʋmɛtalɩ tra nun ntsu.

⁴⁵ Ɔlɛlɛ awʋlʋ wa amʋ́tɔ, bodundun amʋ́, lɛ nkle bʋla amʋ́ ɔsʋlʋsʋ, beyinta atɔ.

⁴⁶ Ɔlɛha adumpu bɔwɩ amʋ́ ndɔtɔ-atɔ, atsantsankʋ beyinta amʋ́ atɔ-abi fɛ́ɛ́.

⁴⁷ Ɔlɛha atsufolibi lɛkpa tɩntɩn amʋ́ waɩn-afla. Ɔlɛha ɔsʋlʋtɔ lolwii tsʋn, amʋ́ apɔntɔ lowu.

⁴⁸ Ɔlɛha atsufolibi lɛda amʋ́ mbwɩ yaɩhɛ mɔ, ɔprada lɔtswɩ mɔmɔ amʋ́ nnantswie.

⁴⁹ Ɔlɛha mʋ ɔblɔ kpitii lɛba amʋ́sʋ, mʋ ansɩpɛpɛ, mʋ ɩyɩn pʋ́ mʋ asʋn wunhɛ, bʋgyi atoyinta-abɔpʋ ɔdɔm bɛba.

⁵⁰ Ɔlɛlɛ mʋ ɔblɔ ɔkpa. Ometin amʋ́ lowu ɔkpa. Ɔlɛha ɩlɔ lalahɛ lɛda amʋ́sʋ.

⁵¹ Ɔlɔmɔ Egyiptefɔ woyigyiwoyitɔ bitɩ. Amʋ́ yasʋtɔ abi gyankpapʋ, igyi Ham abi-aná ɔsʋlʋsʋ.

⁵² Ɔlɛkpa mʋ aha dalɩ fɛ akufa. Ologyo amʋ́ ɩwɩ, kpa amʋ́ ɔsʋlʋkpan amʋtɔ.

⁵³ Ɔlɛkpa amʋ́ kɔnkɔn, bʋmenya ifu, tamɛ ɔpʋ lɛkɩta amʋ́ alupʋ mʋ́.

⁵⁴ Ɔlɛkpa amʋ́ bowie mʋ onuto ɔsʋlʋ ɔnɔ. Abʋ ɔsʋlʋá ɔlɔpʋ mʋ tumi nyasʋ.

⁵⁵ Brɛá mʋ aha bɛba a, olegya ɔsʋlʋ amʋsʋ atsiapʋ. Oleye ɔsʋlʋ amʋ pʋbwɛ ogyikpa ha Israel abusuan-abusuan amʋ. Ɔlɔhɔ amʋ́ yaɩ, ɩnʋ lɔbwɛ amʋ́ otsiakpa.

⁵⁶ Tamɛ mʋ́ oo bɔsɔ Ɔsʋsʋʋsʋ Mʋ Wie Bulu kɩ, kʋsʋ lɩɩ mʋsʋ, bʋmegyi mʋ ɔnɔá ɔlɛlɛsʋ.

⁵⁷ Bɛdamli ɔma ha mʋ, kina ɔnɔkwalɩwa ha mʋ fɛ amʋ́ anain. Amʋ́ ɔkpa lɔnɔ fɛ ɩta wɔɩhɛá bʋtamapʋ ansɩ dɩnka mʋ́sʋ.

⁵⁸ Bɔpʋ amʋ́ ɩkpɩ ɔtswɛkpa wa mʋ ɔblɔ. Ɩlɛha ɔlɔwa nunklun amʋ́ atunkusʋ.

⁵⁹ Brɛá Bulu lowun mʋ́ alɩ a, ɔlɛhɩɛ nya ɔblɔ, wuna kina Israelfɔ plɩplɩplɩ.

⁶⁰ Ɩnʋ olesi mʋ otsiakpa ánɩ́ ɩbʋ Silo tswɩ. Mʋ ɔtɩnɛá oletsia anyankpʋsatɔ.

⁶¹ Ɔlɛha bɛkɩta mʋ Ntam-daka ndoun. Alupʋ bɔhɔ mʋ numnyam anfɩ lɛ amʋ́ ɩbɩ.

⁶² Ɔlɛha mʋ ɔmá lesin ɔdayi ɔnɔ, ɔlɛhɩɛ nya ɔblɔ mʋ ogyikpa anfɩsʋ.

⁶³ Ogya lɔhɔ amʋ́ nyasubi fɛ́ɛ́, amʋ́ mbitebi bʋmenya aklu tsia.

⁶⁴ Amʋ́ igyi ahapʋ besin ɔdayi ɔnɔ, amʋ́ aka bʋmɛtalɩ su.

⁶⁵ Anɩ Wie lɔkʋsʋ fɛ ɔha ánɩ́ alawan tsinki, fɛ ɔwʋnlɩnpʋ labʋ, ɔdɛkplʋn.

⁶⁶ Ɔlɛda mʋ alupʋ saɩn, sʋpa amʋ́ fɛ́ɛ́.

⁶⁷ Olekina Yosef abi-aná, ɔmɛlɛ mʋ bi Efraim abusuan ɛ.

⁶⁸ Yuda abusuan mboun ɔlɛlɛ, tsu ɩnʋ ɔlɛlɛ Sionbʋá ɔtɔdwɛ.

⁶⁹ Ɔlɔpwɛ mʋ otsiakpa fʋa fɛ ɔsʋsʋ. Ɩlɩɩ kinkin fɛ ɔsʋlʋ, ibétsia brɛ fɛ́ɛ́.

⁷⁰ Ɔlɛlɛ mʋ osumbi Dawid, ɔlɛkpa mʋ tsu akufa ɩbantɔ.

⁷¹ Akufa mʋ́a amʋ́ abi ɔkpakpa ɔlɛlɛ mʋ tsu ɔbɛɛ, ɔbɛkpa mʋ aha Yakob abi-aná Israelfɔ, bʋgyi mʋ ogyikpa.

⁷² Dawid lɔpʋ ɩklʋn wanklaan kpa amʋ́, damli ɩbɩ amʋ́sʋ.