Israelfɔ Ɩlʋ 77 - Bulu Ntam Pɔpwɛ mʋ́a Israel Ɩlʋ

Bulu Ɔkpa Lɔwankɩ

Asaf kanfʋ-ɩlʋ ha ɩlʋ osunapʋ Yedutun.

¹ Ntosu kpoli Bulu kʋklʋkʋʋ. Ntɔkplʋn kʋklʋkʋʋ mbɛɛ, ɔsɔ mɩ ɔnɔ.

² Ntodunka mɩ Wie mɩ ɔkplankɛ. Ntotsu ɩbɩ fʋa onye fɛ́ɛ́, ndɛ mpaɩ bɔ ha mʋ, tamɛ ɩklʋn mɛdɩ mɩ ɩwɩtɔ.

³ Ntɛkaɩn Bulusʋ, ahʋmɩtɩ tɛkɩta mɩ. Ntɔgywɩɩn mʋ ɩwɩ, ɔkla tɛsrɩ mɩ. Ɩya.

⁴ Fʋmɛha mmɛdɩdɩ onye fɛ́ɛ́. Asʋn ladʋn mɩ, mmɛtalɩ tɔɩ.

⁵ Nosusu nkɛá ɩlatsʋn ɩwɩ. Nɛkaɩn bɩmbɩ ɔpá nfiá ɩlatsʋnsʋ.

⁶ Nɛkaɩn onye ɩlʋá ntɔwasʋ. Nɔgywɩɩn mʋ́ ɩwɩ, fɩtɛ ɩwɩ mbɛɛ,

⁷ “Mɩ Wie obékina ɔha fɛ́ɛ́, ɔmɛ́ɛtra wun mʋ nwɛ ɛkɛkɛɛkɛ?

⁸ Mʋ ɔdwɛá ɩma ɔka laka itin fɛ́ɛ́? Ɔmɛ́ɛtra bwɛ tɔá ɔlɛhɩɛ brɛ fɛ́ɛ́?

⁹ Alatan mʋ nwewunsʋ? Ntɛ ɔblɔ lahɔ mʋ awɩtɔlɛ otsiakpa?” Ɩya.

¹⁰ Ɩnʋ nɛblɩ mbɛɛ, “Mʋ́á ɩdɛ mɩ han gyi, Ɔsʋsʋʋsʋ Mʋ Wie amʋ tumi latsɛ.”

¹¹ Oo Nana Bulu, nɛ́kaɩn fʋ atɔ bwɛhɛsʋ. Ee, nɛ́kaɩn fʋ ofula ánɩ́ fɔbwɛ bɩmbɩsʋ.

¹² Nɔ́gywɩɩn fʋ atɔ bwɛhɛ fɛ́ɛ́ ɩwɩ, gywɩɩn atɔ akpɔnkpɔntɩá fabwɛ ɩwɩ.

¹³ Oo Bulu, fʋ ɔkpa lɔwankɩ. Ɔkpɩ ɔmɔmʋ lomoni fɛ anɩ Bulu?

¹⁴ Fʋgyi Buluá fʋtɔbwɛ ofula. Falɛ fʋ tumi suna ɔmá-ɔmátɔ.

¹⁵ Fʋlɔpʋ fʋ tumi ka lɛ fʋ aha, Yakob mʋa Yosef abi-aná. Ɩya.

¹⁶ Ɔpʋ lowun fʋ. Oo Bulu, brɛá ɔpʋ lowun fʋ a, olekikini. Ee, mʋ́ okluklukpa lɛkpɩnkɩ.

¹⁷ Agyinde lotswie ntsu, ɔprada lɔpʋtɩ nwʋlʋtasʋ. Ɩlɛkpa ogya yɔ ɔtɩnɛgyiɔtɩnɛ.

¹⁸ Fʋ ɔprada lotsula wa kpankpantrudutɔ. Ɔyɩtɔ fɛ́ɛ́ lɛkpa ogya, ɔsʋlʋ lɛkpɩnkɩ kpakpakpa.

¹⁹ Fʋ ɔkpa ɩna ɔpʋtɔ. Fɛnatɩ tsʋn ntsu akpɔnkpɔntɩtɔ, tamɛ bʋmowun fʋ ɔtsakpa.

²⁰ Fɔtsʋn Mose mʋa Aaronsʋ kpa fʋ aha fɛ akufa.