Israelfɔ Ɩlʋ 76 - Bulu Ntam Pɔpwɛ mʋ́a Israel Ɩlʋ

Ma Ɔbɛ́talɩ Lɩɩ Bulu Ɔblɔ Ɔnɔ?

Asaf kanfʋ-ɩlʋá bɔ́pʋha ɩlʋ osunapʋ. Bɔ́pʋ ɔsankuo da mʋ́.

¹ Bʋyin Bulu Yuda ɔmátɔ, bʋtobu mʋ ɩda Israel ɔmátɔ fɛ́ɛ́.

² Mʋ woyi bʋ Salem, Sionbʋsʋ.

³ Ɩnʋ olebiabia mʋ alupʋ mbɩn pɩɔnpɩɔn, amʋ́ akʋtʋ, ndayi pʋ́ amʋ́ akɔtɔ nɩ. Ɩya.

⁴ Oo Bulu, fɛhɩɛ wankɩ. Fʋbʋ numnyam dʋn ɩbʋá mbwɩ bʋbʋ mʋsʋ bregyibrɛ.

⁵ Faswɩɩ amʋ́ ɩsa akɔpʋ akinkin atɔ, bawu yɔɩ. Amʋ́tɔ ɔkʋkʋ mɛ́talɩ tsu ɩbɩ.

⁶ Oo Yakob Bulu, fʋ ɩyɩn sʋ mpɔnkɔ mʋ́a amʋ́sʋ adɩnkapʋ bawu si bʋda.

⁷ Tamɛ fʋ mʋ́ a, fʋ ɩwɩ bʋ ifu! Ma ɔbɛ́talɩ lɩɩ fʋ ɔblɔ ɔnɔ?

⁸ Fobua amʋ́ asʋn tsu ɔsʋsʋ. Ɔyɩtɔ aha fɛ́ɛ́ benya ifu, kpa ɔnɔ bun mwɩ.

⁹ Brɛá fɔkʋsʋ fóbua amʋ́ asʋn a, fɔhɔ ɔsʋlʋsʋ ahianfɔ fɛ́ɛ́ nkpa. Ɩya.

¹⁰ Lɛlɛ, nyankpʋsa ɔblɔ tɔwa fʋ numnyam, fʋtɔpʋ ɔblɔ amʋ trahɛ dɩda.

¹¹ Mlɩtsula ɩkɔ Nana Bulu, mlɩ Bulu ansɩtɔ, amlɩgyi mʋ́sʋ. Mlɩha nsɩnɛ ɩnʋ ɔmá fɛ́ɛ́ abʋpʋ atokiehɛ ba ɔha anfɩ mʋ ɩwɩ bʋ ifu anfɩ.

¹² Ɔtɛha ɔmásʋ agyipʋ ɔkla tɛsrɩ amʋ́, ɔtɔpʋ ifu wa ɔyɩtɔ awietɔ.