Israelfɔ Ɩlʋ 73 - Bulu Ntam Pɔpwɛ mʋ́a Israel Ɩlʋ

Ɔwʋlʋ 3sɩ Israel Ɩlʋ 73-89 Bulu Gyi Mɩ Ɔwʋnlɩn

Asaf kanfʋ-ɩlʋ.

¹ Lɛlɛ, Bulu bʋ awɩtɔlɛ ha Israelfɔ, ha aha ánɩ́ amʋ́ ɩklʋntɔ lɛtɩn.

² Tamɛ mɩ mʋ́ a, ɩlasi hlɛ tɛkɩ natsa pan. Ɩlasi tukuriibi, tɛkɩ nasrɛɩ dɩda.

³ Tsufɛ ɩwɩ atsupʋ asʋn lɛpɛ mɩ ansɩ, brɛá nowun ánɩ́ amʋ́ lalahɛ ɔma o, ɩdɛ alɛ wa ha amʋ́.

⁴ Bʋmɛdɛ ipian kʋkʋ wun. Awútɔ bʋ amʋ́ alɛ, bʋbʋ ɔwʋnlɩn.

⁵ Asʋn tamatʋ amʋ́, fɛ aha atrahɛ. Ɩkplan tamatʋ amʋ́ wa aba, fɛ aha bamba.

⁶ Ɩwɩtsu gyi amʋ́ ɔmɛtɔ-atɔ, owuntɔlɩn gyi amʋ́ tati dɩdahɛ.

⁷ Bawa nfɔ, ha amʋ́ ansibi-aklambi ladalɩ hlɔtɩɩ. Mimlala labʋla amʋ́ ɩklʋn.

⁸ Bʋtɔbwɛ ɔblɔla, blɩ nyanyala. Bʋtotsu ɩwɩ, sisi aha.

⁹ Bʋtɛblɩ Bulu ɩwɩ abususʋ. Amʋ́ asʋn blɩhɛ labʋla ɔsʋlʋsʋ.

¹⁰ Mʋ́ sʋ Bulu aha bakpla buo amʋ́, bʋmɛdɛ lalahɛ kʋkʋ wun amʋ́ ɩwɩ.

¹¹ Bʋdɛblɩ bɛɛ, “Bulu mɛ́ɛbɩ. Ɔsʋsʋʋsʋ Mʋ Wie móowun.”

¹² Tamɛ kɩ, ɩwɩ lalwii aha lalahɛ anfɩ. Togyitɔ ɩdɛ alɛ wa ha amʋ́.

¹³ Kʋkʋ kpalɩ nawankɩ mɩ klʋntɔ, fwɩ ɩbɩ lɛ lalahɛtɔ,

¹⁴ tsufɛ faha ndɛ ipian wun ɔyɩkɛhɛtɔ fɛ́ɛ́. Fʋtɛbɩtɩ mɩ ɩsʋ nyankɩgyinyankɩ.

¹⁵ Nɩ mɩ ɛ ntɛblɩ asʋn lalahɛ alɩ a, tɛkɩ mmɔwa ɔnɔkwalɩ ha fʋ abi-aná.

¹⁶ Nɔbɔ mbɔdɩá nónu asʋn anfɩ asɩ, tamɛ ɩlɛhɩɛ wa ɔnlɩn wa mɩ!

¹⁷ Yɔfʋn ɛkɛá nɔyɔ fʋ otsiakpa, asa nɛbɩ tɔá ɩbɔ́tʋ aha lalahɛ.

¹⁸ Lɛlɛ, ɔsrɛɩkpa fɔpʋ amʋ́ lɩɩ. Fʋtɛha bʋtɛdɩda, kʋsʋ ma amʋ́ ɩnʋ.

¹⁹ Bʋtɔkɔsɩ ta, ifu tɛkpa amʋ́ natɩ!

²⁰ Bʋgyi fɛ okudeá ɔha lakun tan mʋ́sʋ ɔyɩkɛhɛ nyankɩ. O mɩ Wie, fɔkʋsʋ fʋtamakaɩn amʋ́sʋ.

²¹ Brɛá mɩ klʋn lɔtɔ mɩ, ɩlɔhɔ mɩ ɔsɩn a,

²² nemimla, mmeyin tɔtɔ. Nemli fɛ ɔbwɩ fʋ ansɩtɔ.

²³ Tamɛ fʋmɔkʋdamli ɔma ha mɩ kɩ. Fʋdɛ mɩ gyɔpɩ ɩbɩ.

²⁴ Fʋtɔpʋ fʋ atosunahɛ kpa mɩ. Mʋ́ ɔma a, fɔ́hɔ mɩ wa numnyamtɔ.

²⁵ Mma ɔhaa ɔsʋsʋ ɩnʋ dʋn fʋ. Mmehian tɔtɔ ɔsʋlʋ anfɩsʋ tsɩa fʋtɔ.

²⁶ Nɩ nɔpɔn, ɔyɩtɔ ɩkpɔn mɩ o a, Bulu gyi mɩ ɔwʋnlɩn pʋ́ mɩ ogyikpa brɛ fɛ́ɛ́tɔ.

²⁷ Lɛlɛ, aha ánɩ́ bawa ɩfɔ fʋ ɩwɩ bɔ́fwɩ. Kɩ, fɛ́lɛ aha ánɩ́ badalɩ fʋ ɔma fɛ́ɛ́ ɩnʋ.

²⁸ Tamɛ ɩbʋ mɩ alɛá nétsia Bulu wa. Mɩ Wie Nana Bulu napʋbwɛ mɩ ɔtanʋkpa. Nɛ́bla aha mʋ gyumagyihɛ fɛ́ɛ́.