Israelfɔ Ɩlʋ 72 - Bulu Ntam Pɔpwɛ mʋ́a Israel Ɩlʋ

Bulu Ha Fʋ Yilebwɛ Itsia Owiesʋ

Salomo ɩlʋ.

¹ Oo Bulu, ha owie fʋ asʋngyi ɔnɔkwalɩsʋ, afʋha fʋ yilebwɛ itsia mʋsʋ.

² Ha mʋ ɔpʋ ɔnɔkwalɩ gyi fʋ ɔmá asʋn, ogyi ahianfɔ asʋn wanklaan ha amʋ́.

³ Atɔ ɩkwɛ abwisʋ, ɩkwɛ ayintisʋ; yile ɩba ɔmá amʋtɔ.

⁴ Ogyi ɔmá amʋtɔ ahianfɔ asʋn wanklaan ha amʋ́. Ɔlɛ aha ánɩ́ bʋma tɔtɔ, ɔkwɛ nuna aha asisipʋ.

⁵ Ɩnɩá owi mɔkʋsi lɩn, ɔtsra ɛ mɔkʋsi fɛɩ anfɩ mʋ́ a, amʋ́a amʋ́ abi-aná bʋmási fʋ ifu nya ɛkɛkɛɛkɛ.

⁶ Ha owie iwiegyi ɩbwɛ fɛ nyankpʋ latswie wʋlɩ ɔsʋlʋá badɔ tswɩsʋ. Fɛ nyankpʋ latswie pʋtɔɔ kɩta ɔsʋlʋ.

⁷ Ɩwa alɛ ha yile abwɛpʋ mʋ bɩsʋ. Iwilwii ɩhɩɛ tsia yɛfʋn brɛá ɔtsra obési fɛɩ.

⁸ Ogyi iwie tsu ɔpʋ ɔnɔ yɛfʋn ɔpʋ ɔnɔ. Tsu Eufrate bʋnkpa ɔnɔ yɛfʋn ɔsʋlʋ amʋ ɔka.

⁹ Dimbisʋ atsiapʋ fɛ́ɛ́ bʋba ɩwɩasɩ ha mʋ, mʋ alupʋ abʋwɩ ɩsɩ mʋ ansɩtɔ.

¹⁰ Tarsis awie pʋ́ ntsu agbemgbesʋ awie bʋsʋra atokiehɛ ba mʋ. Saba mʋ́a Seba awie bʋkie mʋ atɔ.

¹¹ Awie fɛ́ɛ́ bʋda akpawunu ha mʋ, ɔmá fɛ́ɛ́ abʋsum mʋ,

¹² tsufɛ ɔtɛlɛ aha ánɩ́ bʋma tɔtɔ, bʋdesu kpoli mʋ, pʋ́ ahianfɔá bʋma ɔhaa.

¹³ Otowun ipian owunpʋ pʋ́ ɔha ánɩ́ ɔma tɔtɔ nwɛ, ɔtɔhɔ aha ánɩ́ bʋma tɔtɔ nkpa.

¹⁴ Ɔtɛlɛ amʋ́ ɔkla lɛ awuntɔlɩnpʋ mʋ́a asisipʋ ɩbɩtɔ, tsufɛ amʋ́ nkpa bʋ ibia mʋ ansɩtɔ.

¹⁵ Ɔdan fuli nwun fututuutu, abʋpʋ sika pɛpɛ tsua Seba ba mʋ. Aha bʋbɔ mpaɩ ha mʋ brɛ fɛ́ɛ́, abʋkʋlɩ oyula ha mʋ ekekegyiɛkɛ.

¹⁶ Ɔsʋlʋ amʋsʋ atɔ ɩhɩɛ wa alɛ, ɩbʋla abʋsʋ. Iswie wanklaan fɛ alɩá itoswie Lebanon ɔsʋlʋsʋ, awulu amʋtɔ atsiapʋ abʋklɛɩ fɛ ɩfa.

¹⁷ Ɩnɩá owi mɔkʋsi lɩn anfɩ mʋ́ a, bʋmási mʋ ɩda tɩ. Ɔbwɛ oyula ha ɔmá fɛ́ɛ́, abʋkʋlɩ oyula ha mʋ.

¹⁸ Bʋkanfʋ Nana Bulu, Israel Bulu amʋ. Mʋ nkʋlɛ tɔbwɛ ofula.

¹⁹ Bʋkanfʋ mʋ numnyam ɩda brɛ fɛ́ɛ́. Mʋ numnyam ɩbʋla ɔyɩtɔ fɛ́ɛ́. Ɩbá mʋ́tɔ, ɩtra laba mʋ́tɔ.

²⁰ Alɩ Yisai mʋ bi Dawid lɔpʋmɔ mʋ mpaɩ ɔnɔ nɩ.