Israelfɔ Ɩlʋ 71 - Bulu Ntam Pɔpwɛ mʋ́a Israel Ɩlʋ

Bulu, Mási Mɩ Wa Ɔkpa

¹ Nana Bulu, fʋ nasrɩ tanʋ. Máha pɛlɩ ɩkɩta mɩ ɛkɛkɛɛkɛ.

² Fʋ yilebwɛ sʋ lɛ mɩ. Yaa asʋ, afʋhɔ mɩ nkpa!

³ Bwɛ mɩ ɩbʋta ánɩ́ nɛ́talɩ srɩ beŋain fʋ alʋntɔ bregyibrɛ. Fʋlɛblɩ fɛɛ, fɔ́hɔ mɩ nkpa, tsufɛ fʋgyi mɩ ɩbʋta pʋ́ mɩ oŋainkpa kpikpli.

⁴ Oo mɩ Bulu, hɔ mɩ tsu aha lalahɛ ɩbɩtɔ; tsu owuntɔlɩnpʋ pʋ́ lalahɛ ɔbwɛpʋ ɩbɩtɔ.

⁵ Tsufɛ mɩ Wie Nana Bulu, fʋ ɔkpa ndɛkɩ. Fʋsʋ mɩ ansɩ dɩn tsu mɩ nyebitɔ bɩmbɩ ɔpá.

⁶ Fʋsʋ nkpɛn tsu mɩ ɔkwɩɩkɛ. Fʋlɛlɛ mɩ tsu mɩ yin ɩwɩtɔ. Fʋ nɛ́kanfʋ bregyibrɛ.

⁷ Mɩ ɩwɩ bʋ aha tsɔtsɔɔtsɔ wanwan, tsufɛ fʋgyi mɩ okpikplikpa.

⁸ Mʋ́ sʋ mméesi fʋ kanfʋ, si fʋ numnyam wa ekekegyiɛkɛ ɔyɩkɛhɛtɔ fɛ́ɛ́.

⁹ Mátswɛ mɩ kpʋkpʋ, brɛ anfɩ nadan. Mási mɩ wa ɔkpa, brɛ anfɩ napɔn;

¹⁰ tsufɛ mɩ alupʋ bʋdɛ mɩ ɩwɩ asʋn blɩ. Aha ánɩ́ bʋdekleá bɔ́mɔ mɩ bakan mɩsʋ.

¹¹ Bʋdɛblɩ bɛɛ, “Mlɩsrɩ gya mʋ, amlɩkɩta mʋ. Bulu lakpa mʋ ɔma, ɔma ɔhɔpʋ.”

¹² Oo Bulu, máwa ɩfɔ mɩ ɩwɩ. Mɩ Bulu, kokoli wa ɔsa bɔhɔ mɩ!

¹³ Ha pɛlɩ ɩkɩta aha ánɩ́ bʋdɛ mɩ ɩla lɛ, abʋfwɩ. Pɛlɩ ɩkɩta aha ánɩ́ bʋdɛ mɩ lalahɛ dunka fɛ́ɛ́, abʋsʋpa.

¹⁴ Nɛ́kɩ fʋ ɔkpa brɛ fɛ́ɛ́. Nɛ́kanfʋ fʋ, lakanfʋ fʋ.

¹⁵ Nɛ́blɩ yileá fʋdɛbwɛ, pʋhɔ aha nkpa ekekegyiɛkɛ, tsufɛ tɔá fabwɛ lɔdʋbɩ, mmɛ́ɛtalɩ blɩ mʋ́ fɛ́ɛ́.

¹⁶ Nɛ́ba bɛkanfʋ anɩ Wie Nana Bulu gyumagyihɛ akpɔnkpɔntɩ. Nɛ́kanfʋ mʋ ɔnɔkwalɩ. Mʋ nkʋlɛ klɛ nɛ́kanfʋ.

¹⁷ Oo Bulu, fasuna mɩ atɔ tsu mɩ nyebitɔ. Ntɛbla aha ofula ánɩ́ fabwɛ bɔfʋn ndɛ.

¹⁸ Oo Bulu, ɩnɩá nadan, mɩ nwun lafuli o a, mási mɩ wa ɔkpa. Yɔfʋn brɛá nada fʋ tumi ɔkan suna abi-aná, pʋ́ aha ánɩ́ bɛ́tra bɛlɩn fɛ́ɛ́.

¹⁹ Oo Bulu, fʋ yilebwɛ lɔfʋa da nwʋlʋta ɩfa. Fʋ atɔ bwɛhɛ lɔdʋbɩ. Mɩ Bulu, ma lɔfʋn fʋ.

²⁰ Faha nawun ipian dʋbɩ. Fʋ ɔbɛ́lawa mɩ ɔwʋnlɩn, lɛ mɩ tsu afulitɔ.

²¹ Fɛ́lawa mɩ numnyam dʋn, lalwii mɩ klʋn.

²² Mɩ Bulu, mɩ ɛ nɛ́da akwɛ kanfʋ fʋ, fʋ ɔnɔkwalɩwa sʋ. Israel Ɔha Wankɩhɛ, nɔ́wa ɩlʋ da ɔsankuo ha fʋ.

²³ Nɔ́kplʋn wa ɩlʋ ansigyisʋ ha fʋ. Faka lɛ mɩ ɔkla, mɩ ɛ nɔ́wa ɩlʋ kanfʋ fʋ.

²⁴ Nɛ́da yileá fʋdɛbwɛ ha mɩ ɔkan ekekegyiɛkɛ. Tsufɛ pɛlɩ lakɩta aha ánɩ́ bʋdɛ mɩ lalahɛ dunka, basʋpa.