Israelfɔ Ɩlʋ 69 - Bulu Ntam Pɔpwɛ mʋ́a Israel Ɩlʋ

Bulu, Hɔ Mɩ, Ndɛmɛ Wie Ɔdɩba Kluklutɔ

Dawid ɩlʋ ha ɩlʋ osunapʋ. Dimbisʋ-saprada ɔmɛ bɔ́pʋwa mʋ́.

¹ Oo Bulu, hɔ mɩ. Ntsu labʋla wie mɩ ɔmɛtɔ.

² Ndɛmɛ wie ɔfrɔdɔtɔ, mmenya yabi oyikpa. Nakpawie ntsu-ibuntɔ, ntsu lamuna mɩ.

³ Nasu kpoli alɩɩ, ɩlapian mɩ. Mɩ ɔmɛ lapin. Nakɩ mɩ Bulu ɔkpa alɩɩ, mɩ ansibi lawu mɩ.

⁴ Aha ánɩ́ bʋdɛ mɩ lu kʋkʋ kpalɩ bʋtsɔ dʋn mɩ nwunsʋ-imi. Alupʋá bʋdɛ ofunu wa dɩnka, abʋmɔ mɩ bʋhɩɛ bʋdʋn mɩ. Bʋdɛ mɩ ka hɩɛ bɛɛ, mpʋ tɔá mmɔkʋtsu ba.

⁵ Oo Bulu, fʋyin mɩ mimlatɔ. Mɩ lakpan meŋain fʋ.

⁶ Oo anɩ Wie, Ɩsa Ɔnɔ Ɔlɩɩpʋ, Nana Bulu, mɩ sʋ máha pɛlɩ ɩkɩta fʋ ɔkpa akɩpʋ. Oo Israel Bulu, mɩ sʋ máha fʋ adunkapʋ abʋsʋpa.

⁷ Tsufɛ fʋ sʋ besia mɩ, pɛlɩ lɛkɩta mɩ.

⁸ Namli ɔfɔɔ mɩ apiotɔ. Nabwɛ fɛ ɔha ánɩ́ bʋmeyin mɩ mɩ yin abitɔ.

⁹ Fʋ otsiakpa ɩnʋ asʋn ɩhɩɛ bʋ mɩ ogya. Fʋ asiabi fɛ́ɛ́ lɛbɛdɩnka mɩsʋ.

¹⁰ Brɛá nɛklɩ ɔnɔ su kpoli fʋ Nana Bulu a, besia mɩ.

¹¹ Brɛá nɔpʋ kpekpe bwɛ mɩ tati dɩdahɛ a, nemli blɩbi dɩnka amʋ́ ɔnɔsʋ.

¹² Mɩ ɩwɩ asʋn sɔɔn betsia blɩ dɩnsʋ. Nta abʋpʋ bɔwa mɩ ɩlʋtɔ.

¹³ Tamɛ mɩ mʋ́ fʋ Nana Bulu netsia su kpoli. Oo Bulu, brɛá iletsia fʋ a, pʋ fʋ ɔdwɛá ɩma ɔka pʋ́ fʋ nkpahɔá igyi ɔnɔkwalɩ sɔ mɩ ɔnɔ.

¹⁴ Lɛ mɩ lɛ ɔfrɔdɔ anfɩtɔ, mási mɩ ammɛ. Lɛ mɩ lɛ mɩ alupʋ anfɩ ɩbɩ. Bɩtɩa mɩ lɛ ntsu-ibun anfɩtɔ.

¹⁵ Máha ntsu anfɩ ɩbʋla kɩta mɩ, ankpada wie ntsu-ibuntɔ, ntɛ lowu ɩpʋ mɩ.

¹⁶ Nana Bulu, sɔ mɩ ɔnɔ, tsufɛ fʋ ɔdwɛá ɩma ɔka bʋ alɛ. Fʋ nwewun kpɔnkpɔntɩ amʋ sʋ damli kɩ mɩ.

¹⁷ Mápʋ ansɩtɔ ŋain fʋ osumbi. Ɩladʋn mɩ, wa ɔsa sɔ mɩ ɔnɔ.

¹⁸ Kpʋkpɛ ba bɛka lɛ mɩ. Ka mɩ lɛ mɩ alupʋ ɩbɩtɔ.

¹⁹ Fʋyin mɩ asiabi, fʋyin mɩ pɛlɩ pʋ́ mɩ nsʋpa. Fawun mɩ adʋn fɛ́ɛ́.

²⁰ Amʋ́ asiabi labwiebwie mɩ, ɩlatu mɩ awútɔ. Nkɩ mbɛɛ, ɔkʋ obówun mɩ nwɛ, ntɛ kɩta ɩklʋn wa mɩ ɩwɩtɔ, tamɛ mmenya ɔhaa.

²¹ Brɛa akʋn dɛ mɩ a, bɔwa atɔ atɔtɔ ha mɩ bɛɛ, ngyi. Brɛá ɔmɛwʋlɩ dɛ mɩ a, bɔpʋ nta-ɔdaɩ ha mɩ bɛɛ nnun.

²² Amʋ́ ɔpʋnʋ tswɩhɛ ɩbwɛ yibi, ɩkɩta amʋ́. Amʋ́ ɔdwɛ ogyikpa ɩbwɛ agbla, ɩkpa kɩta amʋ́.

²³ Ansɩtɔ iklun amʋ́, mɛnɩ bʋmɛ́ɛtra wun atɔ; amʋ́ osietɔ ɩkpa brɛ fɛ́ɛ́.

²⁴ Fʋ ɔblɔ ɩba amʋ́sʋ. Nya ɔblɔ kpitii amʋ́sʋ.

²⁵ Amʋ́ woyi ɩdɩ kpan, amʋ́ abuntisʋ ɩkwɛ ɩfa,

²⁶ tsufɛ bʋdɛ ɔha amʋʋ fɛda lɛ da amʋ sia. Bɛla bʋdɛ ɔha amʋʋ fepilan amʋ ɔyɩya kaɩn.

²⁷ Lɛ amʋ́ ɩla, afʋlalɛ amʋ́ ɩla. Bʋmánya ɔlɩɩkpa fʋ asʋn ogyikɛ.

²⁸ Tsitsi amʋ́ ada lɛ nkpa ɔwʋlʋtɔ. Amʋ́ ada mátsia yile abwɛpʋ ɔwʋlʋ anfɩtɔ.

²⁹ Mɩ mʋ́ a, nawa nwɛ, ɩwɩ dɛ mɩ ɔsɩn. Oo Bulu, ha fʋ nkpahɔ ɩbwɛ mɩ okpikplikpa.

³⁰ Nɔ́wa ɩlʋ kanfʋ Bulu ɩda. Nɔpʋ ɩpan tsu mʋ fʋa.

³¹ Ɩnɩ bégyi Nana Bulu ansɩ, dʋn ɔnantswie yinhɛá ɔbʋ nsiebi mʋ́a awatɛ.

³² Aha ánɩ́ bʋma tɔtɔ bʋwun mʋ́, nya ansigyi. Bulu adunkapʋ, ɩklʋn ɩdɩ mlɩ asɩ,

³³ tsufɛ Nana Bulu tɛyaa asʋ nu aha ánɩ́ bʋma tɔtɔ isu. Ɔtamakɩ mʋ aha ánɩ́ bʋda obu, ki nwun.

³⁴ Ɔsʋ mʋ́a asɩ, mlɩkanfʋ mʋ. Ɔpʋ mʋ́a mʋ́tɔ ntobiá bʋkɩ nkpa fɛ́ɛ́ bʋkanfʋ mʋ,

³⁵ tsufɛ Bulu ɔbɔ́hɔ Sion nkpa. Ɔbɛ́lada Yuda awulu. Mʋ aha bétsia ɩnʋ, gyi ɔsʋlʋ amʋ.

³⁶ Mʋ asumpʋ abi-aná obégyi ɔsʋlʋ amʋ, mʋ adwɛpʋ ɛ bétsia ɩnʋ.