Israelfɔ Ɩlʋ 68 - Bulu Ntam Pɔpwɛ mʋ́a Israel Ɩlʋ

Bulu Kʋsʋ, Fʋ Alupʋ Abʋdasaɩn

Dawid kanfʋ-ɩlʋ ha ɩlʋ osunapʋ.

¹ Bulu kʋsʋ, fʋ alupʋ abʋdasaɩn. Ha fʋ alupʋ abʋsrɩ dalɩ fʋ ansɩtɔ.

² Fɛ alɩá afu tɔtsʋan ogyasi natɩ a, alɩ fʋgya amʋ́ nɩ. Fɛ alɩá ogya tɛŋlaɩn okpin a, alɩ aha lalahɛ bʋhɔ fʋ ansɩtɔ nɩ.

³ Tamɛ ha aha yile abʋgyi ɔdwɛ. Bʋfuli kpayi ansigyisʋ fʋ ansɩtɔ, hɩɛ nya ansigyi.

⁴ Mlɩwa ɩlʋ ha Bulu. Mlɩwa ɩlʋ kanfʋ mʋ ɩda. Mlɩtswɩ ɩlʋ ha ɔha amʋʋ ɔna nwʋlʋtasʋ amʋ. Mʋ ɩda gyi Nana Bulu. Mlɩtswɩ ope mʋ ansɩtɔ.

⁵ Bulu tsie mʋ onuto otsiakpa. Mʋgyi awumbi ɔsɩ, otegyi bʋa asʋrapʋ.

⁶ Ɔtɛha ɔha ánɩ́ ɔma ɔhaa tenya abusuan. Ɔtɛlɛ obu adɩpʋ, ha bʋtegyi ɩwɩ. Tamɛ ɔtɛha mʋsʋ akʋsʋlɩɩpʋ bʋtetsia ɔsʋlʋ wʋlɩhɛsʋ.

⁷ Oo Bulu, brɛá fʋgya fʋ aha nkpa, mlɩna ɔsʋlʋkpan amʋsʋ a, Ɩya.

⁸ fɛha ɔsʋlʋ lɛkpɩnkɩ, nyankpʋ lotswie tsu ɔsʋsʋ, Sinai Bulu ansɩtɔ, Israel Bulu ansɩtɔ.

⁹ Fɛha nyankpʋ lɛhɩɛ tswie, latsinki fʋ siadɩɛá idewu.

¹⁰ Fʋ aha bɔpʋ ɩnʋ bwɛ otsiakpa. Oo Bulu, fʋ awɩtɔlɛ sʋ fɔbʋla ahianfɔ.

¹¹ Anɩ Wie lɛlɛ ɔnɔ, atsɩ tsɔtsɔɔtsɔ bɛblɩ asʋn wanklaan amʋ.

¹² Bɛblɩ bɛɛ, “Ɩsa ɔnɔ alɩɩpʋ fɛ́ɛ́ bɛsrɩ!” Atsɩá bʋbʋ ɩnʋ beye atɔá besi bun.

¹³ Aha ánɩ́ bʋda akufa ɩbantɔ kʋraa bʋgyi fɛ lɔpɔá sika fututu bun mʋ abambasʋ, sika pɛpɛ ɩdɛ ogya kpa mʋ ɩwɩ.

¹⁴ Brɛá Bulu Otumipʋ amʋ lɛda awie saɩn a, Salmonbʋsʋ lofuli fɛ dantapu.

¹⁵ Basanbʋ lɛhɩɛ fʋa, ɩbʋ nsiebi tsɔtsɔɔtsɔ!

¹⁶ Basanbʋá fʋbʋ nsiebi tsɔtsɔɔtsɔ, ntogyi sʋ fʋdɛ Sionbʋá Bulu lalɛ, otsie mʋ́sʋ lu? Kɩ, ɩnʋ Nana Bulu onuto obétsia brɛ fɛ́ɛ́ nɩ!

¹⁷ Bulu akeke akinkin ɩdʋn mpɩm-du lafa. Mʋ́ anɩ Wie lɔpʋtsua Sinai ba mʋ otsiakpa nɩ.

¹⁸ Brɛá ɔlɔdʋ ɩbʋ fʋahɛ amʋ a, ɔlɛkpa ndoun buo ɩwɩ. Aha bekie mʋ atɔ. Mʋsʋ akʋsʋlɩɩpʋ kʋraa bekie mʋ atɔ. Nana Bulu obétsia ɩnʋ.

¹⁹ Mlɩkanfʋ anɩ Wie. Mʋtɔsʋra anɩ atɔ sʋrahɛ ekekegyiɛkɛ. Bulu gyi anɩ nkpa ɔhɔpʋ. Ɩya.

²⁰ Nkpa ɔhɔpʋ anɩ Bulu gyi. Anɩ Wie Nana Bulu tɛlɛ anɩ tsu lowutɔ.

²¹ Tamɛ obésisri mʋ alupʋ nwun. Amʋ́ na bʋdɛ ɩpɔngyila bwɛ nɩ.

²² Anɩ Wie ɔbɛɛ, “Nɛ́lakpa mlɩ alupʋ tsu Basan ba. Nɛ́lɛ amʋ́ tsu ɔpʋ-ibuntɔ ba.

²³ Mɛnɩ mlɛ́tsatsa mlɩ alupʋ amʋ obugyatɔ, mlɩ akɩaɩ ɛ béyinta amʋ́ obugya.”

²⁴ Oo Bulu, bawun fʋa fʋ ɔdɔm amʋ ɔnatɩ. Alɩá mɩ Bulu pʋ́ mɩ Wie, fɔpʋ fʋna fɔyɔ fʋ otsiakpa ɩnʋ.

²⁵ Ɩlʋ awapʋ bʋgyankpa, nkpɛ afʋlɩpʋ bʋgya ɔma, mbitebi bʋbʋ amʋ́ nsɩnɛ bʋdɛ akatsa kpɩnkɩ.

²⁶ Bʋdɛ ɩlʋ wa bɛɛ, “Mlɩkanfʋ Bulu mʋ ɔmá amʋ fɛ́ɛ́ ofiakpa. Mlɩ Israel abi-aná, mlɩkanfʋ Nana Bulu!”

²⁷ Amʋ́tɔ ɔtrahɛ Benyamin abusuan igyankpa, Yuda abusuan ahandɛ pʋ́ amʋ́ aha tsɔtsɔɔtsɔ bʋbuo, Sebulon mʋa Naftali abusuan ahandɛ ɛ bʋgya ɔma.

²⁸ Oo Bulu, suna fʋ ɔwʋnlɩn. Suna fʋ ɔwʋnlɩn, fɛ alɩá fɔbwɛ ha anɩ brɛ amʋ.

²⁹ Fʋ ɔtswɛkpa ánɩ́ ɩbʋ Yerusalem sʋ awie bʋtekie fʋ atɔ.

³⁰ Wa ɩyɩn wa Egyipte, ogyi fɛ ntsu-ɔnɔ ɔbwɩ mʋ́a ɔmá-ɔmá ánɩ́ bʋgyi fɛ nnantswie yinhɛá bʋbʋ amʋ́ abitɔ anfɩ. Tsatsa aha anfɩ bʋtekle dutɛ hɔ anfɩsʋ, afʋda ɔmá anfɩ bʋtekle ɩsa kɔ anfɩ saɩn.

³¹ Ha abʋpʋ kɔɔbrɩ tsua Egyipte ba. Etiopiafɔ abʋba ɩwɩasɩ ha fʋ Bulu.

³² Mlɩ ɔsʋlʋsʋ iwie ogyikpa, mlɩwa ɩlʋ ha Bulu. Mlɩwa ɩlʋ kanfʋ anɩ Wie, Ɩya.

³³ bɩmbɩ ɔpá ɔsʋsʋsʋ ɔdɩnkapʋ amʋ. Kɩ, mʋ ɔmɛ lalɩn. Mʋ ɔmɛ kpɔnkpɔntɩ amʋ lalɩn.

³⁴ Mlɩbla aha alɩá Bulu tumi gyi. Mʋ numnyam ibun Israelsʋ, mʋ ɔwʋnlɩn ɩlɛlɩn ɔwan nwʋlʋtatɔ.

³⁵ Bulu ɩwɩ bʋ ifu mʋ otsiakpa ɩnʋ. Israel Bulu tɔpʋ mʋ tumi mʋ́a ɔwʋnlɩn ha amʋ́. Mlɩkanfʋ Bulu!