Israelfɔ Ɩlʋ 65 - Bulu Ntam Pɔpwɛ mʋ́a Israel Ɩlʋ

Ansɩ Igyi Ɔha Ánɩ́ Bulu Lalɛ, Kpɩa Mʋ Manta Ɩwɩ

Dawid kanfʋ-ɩlʋ ha ɩlʋ osunapʋ, ɩlʋ wahɛ.

¹ Oo Bulu, ɩbʋ alɛá bɛ́kanfʋ fʋ Sion wulutɔ. Bɛ́ka ɩkɔá botsula ha fʋ ɩnʋ.

² Mpaɩ onupʋ, fʋ wa anyankpʋsa fɛ́ɛ́ bɛ́ba.

³ Anɩ lalahɛ legyi anɩsʋ, tamɛ fesikie anɩ.

⁴ Ansɩ igyi ɔha ánɩ́ falɛ, kpɩa mʋ manta ɩwɩ, otsie fʋ wunsɩnɛsʋ. Fʋ woyitɔ, igyi fʋ onuto ɔtswɛkpa ɩnʋ atɔ wanklaan ɩbɔ́mwɛ anɩ.

⁵ Oo anɩ nkpa ɔhɔpʋ Bulu, fɔsɔ anɩ ɔnɔ, bwɛ ofula lɛ anɩ. Fʋ ɔkpa ɔyɩtɔ aha bʋdɛkɩ. Amʋ́á bʋbʋ ɔpʋ ɔbɩn kʋraa.

⁶ Fʋ ɔwʋnlɩn fɔpʋha abʋ lɛlɩɩ kinkiinkin, fɔpʋ ɔwʋnlɩn saba.

⁷ Fʋtɛha ɔpʋ mʋ́a atsufuá mʋ́ ɔnɔ bʋ ɔnlɩn pʋ́ ɔmá-ɔmá okitikiti tɔlʋa.

⁸ Aha ánɩ́ bʋbʋ ɔyɩ ɔka fɛ́ɛ́ bʋtenya fʋ osuna ifu. Fʋtɛha aha ánɩ́ bʋbʋ owi ɔdalɩkpa yɛdalɩ owi ɔkplɩwiekpa fɛ́ɛ́ bʋtɔkplʋn ansigyisʋ.

⁹ Fʋtɛbɛkɩ ɔsʋlʋ, wʋlɩ ntsu mʋ́sʋ, ha mʋ́ ɩtɔwa nfɔ. Fʋtɛha ntsu tɔbʋla fʋ abʋnkpa, ɩtɛha amʋ́ atɔ-abi tɔwa alɛ. Tsufɛ alɩ fɛhɩɛ mʋ́ nɩ.

¹⁰ Fʋtɔwʋlɩ ntsu amʋ́ flɛsʋ, ha mʋ́ ɩtɔwɔɩ. Fʋtɛha nyankpʋntsubi tɔwɔɩ mʋ́tɔ aklun. Fʋtoyula amʋ́ atɔ-abi, ɩtɔkɔsɩ dan.

¹¹ Atɔ-abi tsɔtsɔɔtsɔ fʋtɔpʋmɔ ofi ɔnɔ. Fʋ oyula tɔwʋlɩ fʋ ɔtsʋnkpa, ɩnʋ atɔ tɔwa alɛ.

¹² Mbwɩ ogyikpa ánɩ́ ɩbʋ ɔsʋlʋkpansʋ kʋraa bʋ nfɔ, ansigyi tɛba nkukusʋ.

¹³ Akufa baklɛɩ bʋla amʋ́ atɔ ogyikpa. Atɔ-abi lahɩɛ wa alɛ ntsu ɔtɩakpa. Ansɩ ɩdɛ amʋ́ fɛ́ɛ́ gyi, bʋdɛkplʋn wa ɩlʋ.