Israelfɔ Ɩlʋ 63 - Bulu Ntam Pɔpwɛ mʋ́a Israel Ɩlʋ

Bulu Ɩwɩ Ɔmɛwʋlɩ Dɛ Mɩ Ɔkla

Kanfʋ-ɩlʋá Dawid lɔwa brɛá ɔbʋ Yuda ɔsʋlʋkpansʋ.

¹ O Bulu, fʋgyi mɩ Bulu. Fʋ ndedunka. Fʋ ɩwɩ ɔmɛwʋlɩ dɛ mɩ ɔkla. Fʋ dunka laha ɩwɩ labwɛ mɩ yɔyɔɔyɔ, fɛ ɔsʋlʋ wʋlɩhɛ dɛ ntsu dunka.

² Brɛ ɩkʋtɔ nowun fʋ fʋ otsiakpa ɩnʋ, nowun fʋ tumi pʋ́ fʋ numnyam.

³ Fʋ ɔdwɛá ɩma ɔka bʋ alɛ dʋn nkpa. Mʋ́ sʋ nɛ́kanfʋ fʋ.

⁴ Nɛ́kanfʋ fʋ mɩ nkpatɔ fɛ́ɛ́, tsu ɩbɩ fʋa kpoli fʋ ɩda.

⁵ Mɩ ɔkla lagyi atɔ wanklaan mwɛ. Nɔ́wa ansigyi-ɩlʋ kanfʋ fʋ.

⁶ Nɩ nda ɔklansʋ oo ntɛkaɩn fʋsʋ. Ntɔgywɩɩn fʋ ɩwɩ onye fɛ́ɛ́,

⁷ tsufɛ fʋgyi mɩ ɔbʋapʋ. Fʋ abambasɩ olulukpa ntɔwa ansigyi-ɩlʋ.

⁸ Mɩ mʋ́ natrʋ kɩta fʋ. Fʋ gyɔpɩ dɛ mɩ kinkiinkin.

⁹ Tamɛ aha ánɩ́ bʋdɛ mɩ lowu kle bɔ́yɔ afulitɔ.

¹⁰ Bésin ɩsa, pututɔ-mbwɩ bɔ́wɩ amʋ́.

¹¹ Tamɛ Bulu sʋ owie ansɩ bégyi mʋ. Aha ánɩ́ bʋtɔpʋ Bulu ɩda ka ntam bɔ́pʋ mʋ tsu ɩwɩ, tsufɛ ɔbɛ́kpa afunupʋ ɔnɔ bun.