Israelfɔ Ɩlʋ 62 - Bulu Ntam Pɔpwɛ mʋ́a Israel Ɩlʋ

Ɔdwɛá Ɩma Ɔka Igyi Bulu Klɛ

Dawid kanfʋ-ɩlʋ ha ɩlʋ osunapʋ Yedutun.

¹ Mɩ ɔkla labwɛ diin, ɔdɛ Bulu ansɩtɔ kɩ wʋlɛ, tsufɛ mʋ ɩbɩtɔ nénya nkpahɔ tsu.

² Mʋ nkʋlɛ gyi mɩ ɩbʋta, mɩ nkpa ɔhɔpʋ pʋ́ mɩ okpikplikpa. Mʋ́ sʋ mmɛ́ɛdɩda ɛkɛkɛɛkɛ.

³ Ɔmɛnkɛ mlési mɩ nkʋlɛ han? Mlɩ fɛ́ɛ́ mlɩdekleá mlɛ́lɛ mɩ ɩnʋ, fɛ bunti ntɛ ɩban bwiehɛ?

⁴ Lɛlɛ, mlɩlabwɛ agywɩɩn kʋlɛ, mlɛ́kplɩ mɩ obiasʋ. Afunuwa bʋ mlɩ ɔdwɛ. Mlɩtɔpʋ ɔnɔ yula mɩ, tamɛ mlɩ ɩklʋntɔ mʋ́ lwɩɩ mlɩdɛ mɩ. Ɩya.

⁵ Mɩ ɔkla, tsia diin afʋkɩ Bulu ansɩtɔ; tsufɛ mʋ ɔkpa ndɛkɩ.

⁶ Mʋ nkʋlɛ gyi mɩ ɩbʋta, mɩ nkpa ɔhɔpʋ pʋ́ mɩ ɔtanʋkpa kinkin. Mʋ́ sʋ mmɛ́ɛdɩda.

⁷ Mɩ nkpahɔ pʋ́ mɩ numnyam itsu Bulu wa. Mʋgyi mɩ ɩbʋta kpekple pʋ́ mɩ okpikplikpa.

⁸ Anyankpʋsa, mlɩpʋ ansɩ dɩnka mʋsʋ bregyibrɛ. Mlɩlɛ mlɩ ɩkplan fɛ́ɛ́ bla mʋ, tsufɛ mʋgyi anɩ okpikplikpa. Ɩya.

⁹ Lɛlɛ, nyebi-ahandɛ bʋgyi fɛ afu. Ɩwɩ anyapʋ ɛ bʋmegyi tɔtɔ. Kali amʋ́ afʋkɩ. Amʋ́ aku anyɔ anfɩ fɛ́ɛ́ bʋgyi fɛ dantapu.

¹⁰ Mápʋ ansɩ dɩnka adufudɩɛ atɔsʋ. Másusuá fénya tɔkʋ tsu owitɔ. Nɩ fʋ atɔ ɩklɛɩ kʋraa a, mápʋ ansɩ dɩnka mʋ́sʋ.

¹¹ Bulu latɔɩ, nanu mʋ́ lanu ánɩ́ mʋbʋ tumi.

¹² Mɩ Wie, ɔdwɛá ɩma ɔka igyi fʋ klɛ, tsufɛ fʋtɛka nyankpʋsa ɩkɔ mʋ bwɛhɛ ɔnɔ.