Israelfɔ Ɩlʋ 60 - Bulu Ntam Pɔpwɛ mʋ́a Israel Ɩlʋ

Bulu, Pʋ Fʋ Tumi Ha Anɩ Agyi Ɩsʋ

Dawid atosuna ɩlʋ ha ɩlʋ osunapʋ. Dimbisʋ-saprada ntam ɩlʋ. Ɔlɔwa mʋ́ brɛá mʋa Aram-Naharaim pʋ́ Aram-Sobafɔ bɔkɔ, Yoab leyinki bɔmɔ Edomfɔ ɩsa akɔpʋ mpɩm duanyɔ Nfɔlɩ Ɔpʋ bʋnkpatɔ.

¹ Ao Bulu, fasi anɩ wa ɔkpa, fabwii ɩbɩ anɩsʋ. Fanya ɔblɔ wa anɩ, lakpa anɩ wa.

² Fʋlɛha ɔsʋlʋ lɛkpɩnkɩ, ɩlɛbaba. Yinkia mʋ́ tsa aba, tsufɛ idekle ɩmaɩn-maɩn.

³ Faha fʋ aha bahɩɛ wun ipian. Faha anɩ nta anɩlanun bʋ, anɩna anɩdɛ ntinta bɔ.

⁴ Fʋlayi ɔfranka ha fʋ ifu anyapʋ, mɛnɩ bɛ́srɩ yɔ mʋ́ asɩ, amʋ́ alupʋ mbɩn mɛ́ɛda amʋ́. Ɩya.

⁵ Pʋ fʋ tumi ha anɩ agyi ɩsʋ, afʋsɔ anɩ ɔnɔ, mɛnɩ fɛ́lɛ fʋ adwɛpʋ.

⁶ Bulu latɔɩ tsu mʋ otsiakpa ɔbɛɛ, “Néye Sekem wulutɔ ansigyisʋ. Nósusu Sukot tsonkoli, ye mʋ́tɔ.

⁷ Mɩbʋ Gilead pʋ́ Manase. Efraim gyi mɩ kʋtʋpa. Yuda ɛ gyi mɩ akɔnfra.

⁸ Tamɛ Moab gyi mɩ atɔ ɔfwɩkpa. Edom gyi mɩ ntʋkʋta ɔwɔɩtswɩkpa. Filistifɔsʋ ntɔwa ɔkpayi.”

⁹ Oo Bulu, ma ɔbɛ́kpa mɩ ya wulu anfɩ bɔpwɛ abunti kpekple fʋahɛ wa mʋ́ anfɩtɔ? Ma ɔbɛ́kpa mɩ négyi Edomsʋ?

¹⁰ Bulu, megyi fʋlasi anɩ wa ɔkpa? Fasi anɩ akɔpʋ kpa.

¹¹ Tsa anɩ agyi anɩ alupʋsʋ. Nyankpʋsa mbʋa mʋ́ kpalɩ igyi.

¹² Anɩ hayinhɛbwɛ itsu Bulu wa, tsufɛ mʋ ɔbɛ́tsatsa anɩ alupʋsʋ.