Israelfɔ Ɩlʋ 55 - Bulu Ntam Pɔpwɛ mʋ́a Israel Ɩlʋ

Mɩ Ɩwɩ Ɔblɔ Laha Bʋdɛ Mɩ Lu

Dawid ɩlʋ ha ɩlʋ osunapʋ. Bɔ́pʋ ɔsankuo da mʋ́.

¹ Oo Bulu, yaa asʋ afʋnu mɩ mpaɩ. Mákina mɩ kokoli.

² Yaa asʋ nu mɩ isu, afʋsɔ mɩ ɔnɔ. Mɩ asʋn wunhɛ ladʋn mɩ. Nagyigya,

³ mɩ alupʋ asʋn blɩhɛ pʋ́ aha lalahɛ asɩá bʋdɛ mɩ ba sʋ. Tsufɛ bapʋ ipian dɩnka mɩsʋ, mɩ ɩwɩ ɔblɔ laha bʋdɛ mɩ lu.

⁴ Mɩ ɩklʋn mɛdɩ mɩ asɩ. Opuni dɛ mɩ tsii, ndekle anwu.

⁵ Ifu dɛ mɩ, ndɛkpɩnkɩ kpakpakpakpa. Ɩwɩ mesi mɩ kpɩnkɩ.

⁶ Ao! Tɛkɩ nɩ mbʋ atɛ fɛ lɔpɔ a, tɛkɩ nófuli yɛda ɔkpʋnʋ ɔtɩnɛkʋ.

⁷ Ee, tɛkɩ nɔ́yɔ tsutsuutsu, ɔsʋlʋkpansʋ ɔtɩnɛkʋ. Ɩya.

⁸ Tɛkɩ nɔ́kɔsɩ dunka oŋainkpa ha ɩwɩ, si afu mʋ́a alankpla anfɩ.

⁹ Mɩ Wie, ha amʋ́ abʋgyigya, amʋ́ ɔdandʋ imlimli, tsufɛ owuntɔlɩn mʋ́a ɩkɔ́ gyi tɔá ndewun wulu amʋtɔ.

¹⁰ Bʋtobomli wulu amʋ ɔpa-onye, lalahɛbwɛ mʋ́a asʋn wunhɛ sɔɔn bʋ mʋ́tɔ.

¹¹ Asʋkpangyi bʋ wulu amʋtɔ. Ahamlɛ pʋ́ ahasisi tamakpa mʋ́ dɩnsʋ.

¹² Nɩ mɩ olupʋ dɛ mɩ sʋpa a, tɛkɩ nótomi. Nɩ mɩ olupʋ dɛ ɩwɩ tsu suna mɩ a, tɛkɩ nódunka ɩwɩ ɔwakpa.

¹³ Tamɛ fʋ mɩ ba, mɩ nyawie pʋ́ mɩ ɔbɩsʋfɛá nhɩɛ nyin fʋ, dɛpʋ ɩnɩ gyi mɩ.

¹⁴ Tɛkɩ mɩa fʋnyɔ tɛbla aba anɩ awuntɔsʋ, natɩ buo ɔdɔm yɔ Bulu woyitɔ.

¹⁵ Mɩ alupʋ lowu ifwie amʋ́tɔ. Bʋyɔ afulitɔ amʋ́ ansɩ bʋya, tsufɛ lalahɛ labʋla amʋ́ woyi pʋ́ amʋ́ klʋntɔ.

¹⁶ Mɩ mʋ́ nósu kpoli Bulu. Nana Bulu ɔbɔ́hɔ mɩ.

¹⁷ Nyankɩ, ɔpa, ntʋpwɛ fɛ́ɛ́ nósu kʋklʋkʋʋ bla mʋ mɩ asʋn, obónu mɩ ɔmɛ.

¹⁸ Aha tsɔtsɔɔtsɔ bʋdɛ mɩ ɩsa kɔ, tamɛ ɔbɛ́lɛ mɩ lɛ amʋ́ ɩbɩ. Tɔtɔɔtɔ mɔ́ɔbwɛ mɩ.

¹⁹ Bulu dɛ iwiegyi tsu bɩmbɩ ɔpá. Ɩya. Obónu mɩ isu, ba amʋ́ asɩ. Tsufɛ mɩ alupʋ amʋ bʋtamatsɛ, bʋtamanya Bulu ifu.

²⁰ Mɩ nyawie lakpa mʋ nyawie ɔma. Alatʋn mɩa mʋnyɔ ntam.

²¹ Mʋ asʋn blɩhɛ bʋ ɔdwɛ dʋn ɔkwɛn, tamɛ ɩsakɔ asʋn bʋ mʋ ɩklʋntɔ. Mʋ asʋn lɔpɔn dʋn adɔmpɔ, tamɛ igyi fɛ ɔdayiá bapio mʋ́ lɛ.

²² Pʋ fʋ asʋn fɛ́ɛ́ wa Nana Bulu ɩbɩtɔ, ɔbɛ́kpa fʋ. Ɔmɛ́ɛha ɔha yile mɛ́ɛdɩda.

²³ Tamɛ fʋ Bulu, fɔ́tswɩ aha lalahɛ amʋ wa ɔbɔ kluklu amʋtɔ dodoodo, asa amʋ́ nkɛ ɩbɛ́ta fʋn. Tsufɛ fɛ́kpa aha amɔpʋ pʋ́ afunupʋ tsitsa, tamɛ mɩ mʋ́ nɔ́pʋ ansɩ dɩnka fʋsʋ.