Israelfɔ Ɩlʋ 52 - Bulu Ntam Pɔpwɛ mʋ́a Israel Ɩlʋ

Bulu Asʋngyi Pʋ́ Mʋ Awɩtɔlɛ

Dawid atosuna ɩlʋ ha ɩlʋ osunapʋ. Ɔlɔwa mʋ́ brɛá Edomyin Doeg lɛyɛbla Saul ánɩ́ ɔbʋ Ahimelek woyitɔ.

¹ Ɔha yinhɛ, ntogyi sʋ fʋdɛ ɩwɩ adabi da, lalahɛá fʋdɛpʋgyi Bulu aha sʋ? Ekekegyiɛkɛ ɔyɩkɛhɛ fɛ́ɛ́,

² fʋdɛ lalahɛ susu. Ofunupʋ olembiapʋ, fʋ ɔdandʋ bʋ ogya fɛ ɔdayibi.

³ Fʋtekle lalahɛ dʋn yile, fʋtekle afunu ɛ dʋn ɔnɔkwalɩ. Ɩya.

⁴ Ofunupʋ, asʋkpan ánɩ́ ɩbɛ́tɩ lowu ha fʋ aba fʋtekle.

⁵ Tamɛ Bulu ɔbɛ́da fʋ lɛ da, fʋmɛ́ɛtra kʋsʋ ɛkɛkɛɛkɛ. Ɔbɛ́lɛ fʋ lɛ fʋ tati-obuto, puli fʋ lɛ akɩankpapʋ ɔsʋlʋsʋ. Ɩya.

⁶ Aha yile bówun, nya ifu. Bɔ́mɔsɩ fʋ blɩ bɛɛ,

⁷ “Kɩ, ntɔ dɛ ɔha yinhɛ anfɩ bwɛ? Ɔtamasrɩ tanʋ Bulu, ɩnyasʋ ɔlɔpʋ ansɩ dɩnka, pʋ atonyahɛ bwɛ mʋ ɔtanʋkpa.”

⁸ Tamɛ mɩ mʋ́ ngyi fɛ olif-oyiá ɩlayɛyɛɩ, ɩlɩɩ Bulu woyitɔ. Mɩ ansɩ dɩn Bulu ɔdwɛá ɩma ɔkasʋ brɛ fɛ́ɛ́.

⁹ Oo Bulu, nɛ́kanfʋ fʋ brɛ fɛ́ɛ́, fʋ bwɛhɛ sʋ. Nɛ́da fʋ ɩda ɔkan aha ánɩ́ bʋtamakpa fʋ ɔma ansɩtɔ, tsufɛ fʋbʋ alɛ.