Israelfɔ Ɩlʋ 51 - Bulu Ntam Pɔpwɛ mʋ́a Israel Ɩlʋ

Ɩwɩasɩnu Mpaɩ

Igyi kanfʋ-lʋ ha ɩlʋ osunapʋ. Ɩlʋá Dawid lɔwa brɛá Bulu ɔnɔsʋ ɔtɔɩpʋ Natan lɛba mʋ wa, mʋ Batseba kle ɔma.

¹ Oo Bulu, fʋ ɔdwɛá ɩma ɔka sʋ wa awɩtɔlɛ ha mɩ. Fʋ nwewun sʋ tsitsi mɩ lalahɛ.

² Fwɩ mɩ tsitsa lɛ mɩ ɩwɩ, afʋgyʋra mɩ lɛ mɩ lakpantɔ,

³ tsufɛ nyin lalahɛá nabwɛ. Mɩ ansɩ dɩn mɩ lakpansʋ bregyibrɛ.

⁴ Fʋ nkʋlɛ, fʋ nkʋlɛ pɛ napʋ ɩla gyi. Nabwɛ ɩtɔá igyi lalahɛ fʋ ansɩtɔ. Mʋ́ sʋ fʋbʋ ɔkpa ha mɩ ɩpɔn, ɔhaa mɛ́ɛlɛ fʋ ɩla.

⁵ Negyi ɩpɔn brɛá bɔkwɩɩ mɩ. Brɛá mɩ yin dɛ mɩ ɔmɛ kʋraa a, lakpan ɔbwɛpʋ ngyi.

⁶ Ɔnɔkwalɩá itsu ɩklʋn ɔtɔtɔ fʋtekle. Mʋ́ sʋ suna mɩ ɩklʋn ɔtɔtɔɔtɔ nyansa.

⁷ Pʋ ɔtsandɩ gyʋra mɩ, mɩ ɩwɩ ɩtɩn. Bie mɩ ntsu, mɩ anlɩn fɛ atsufolibi.

⁸ Ha mɩ annu asʋn ánɩ́ ɩbɛ́ha ansɩ bégyi mɩ. Ha ansɩ igyi mɩ awuá fabiabia.

⁹ Bun ansibi mɩ lakpansʋ, afʋtsitsi mɩ lalahɛ fɛ́ɛ́.

¹⁰ Oo Bulu, bwɛ ɩklʋn ánɩ́ mʋ́tɔ lɔwankɩ wa mɩtɔ, afʋlapʋ ɔŋɛ pɔpwɛá ɩbʋ ɔnɔkwalɩ wa mɩtɔ.

¹¹ Mátswɩ mɩ tsalɩfwɩ. Máhɔ fʋ Ɔŋɛ Wankɩhɛ lɛ mɩ ɩbɩ.

¹² Lapʋ ansigyiá ɩbʋ fʋ nkpahɔtɔ wa mɩtɔ. Ha fʋ asʋnsʋgyi ɩbwɛ mɩ ɔdwɛla.

¹³ Nósuna aha ánɩ́ bʋtamagyi fʋ mblasʋ fʋ ɔkpa, lakpan abwɛpʋ béyinki ba fʋ wa.

¹⁴ Oo Bulu, mɩ nkpa ɔhɔpʋ Bulu, natsitsa obugya, sikie mɩ. Mɛnɩ nɔ́wa fʋ nkpahɔ ɔkpayi.

¹⁵ Mɩ Wie, bwii mɩ ɔnɔ, mɩ antswɩ ope kanfʋ fʋ,

¹⁶ tsufɛ afɔdɩɛ tamagyi fʋ ansɩ. Nɩ nɔbɔ atɔtɔhɛ-afɔdɩɛ ha fʋ kʋraa a, fʋmedekle.

¹⁷ Afɔdɩɛá fʋtekle gyi ɩklʋn ánɩ́ ɩlanu ɩwɩasɩ. Oo Bulu, fʋtamakɩ ɔha ánɩ́ alanu ɩwɩasɩ si lakpan bwɛ, ki nwun.

¹⁸ Bwɛ yile ha Sion, afʋgyi mʋ bʋalɛ. Layinki yi Yerusalem abunti.

¹⁹ Mʋmʋ anɩ afɔdɩɛ yile ibégyi fʋ ansɩ, abɔ́bɔ atɔtɔhɛ-afɔdɩɛ pʋ́ atɔ ogya-afɔdɩɛ, labɔ nnantswie-afɔdɩɛ fʋ afɔdɩɛ-ɔswɩsʋ ha fʋ.