Israelfɔ Ɩlʋ 50 - Bulu Ntam Pɔpwɛ mʋ́a Israel Ɩlʋ

Ɩpan Gyi Afɔdɩɛá Bulu Tekle

Asaf kanfʋ-ɩlʋ.

¹ Bulu, Otumipʋ, Nana Bulu dɛtɔɩ. Alatɔɩ tɩ ɔyɩtɔ aha fɛ́ɛ́, tsu owi ɔdalɩkpa yeyi mʋ́ ɔkplɩwiekpa.

² Bulu tɔwankɩ tsu Sion, wuluá ɩbʋ akɩlɛ ɔyɩtɔ fɛ́ɛ́.

³ Anɩ Bulu ɔba, ɔmɛ́ɛkpa ɔnɔ bun. Ogya plɛnplɛn gya mʋ nkpa, ɩdɛ ntobi hɔ. Afu kinkiinkin lɛkafia mʋ.

⁴ Alatɩ ɔsʋ mʋ́a asɩ befia ánɩ́ obégyi mʋ aha asʋn.

⁵ Ɔbɛɛ, “Mlɩkpa aha ánɩ́ bʋtamakpa mɩ ɔma wa abatɔ ha mɩ. Aha amʋʋ bʋtɔbɔ afɔdɩɛ, ka ntam ha mɩ amʋ!”

⁶ Ɔsʋsʋ ɩdɛ mʋ ɔnɔkwalɩ ɔwan lɛ, tsufɛ Bulu onuto amʋ gyi asʋn ogyipʋ. Ɩya.

⁷ “Oo! mɩ ɔmá, mlɩnu asʋn ánɩ́ nɛ́blɩ. Israelfɔ, nɛ́lɛ mlɩ ɩwɩ asʋn blɩ. Mɩ anfɩ gyi mlɩ Bulu nɩ.

⁸ Megyi afɔdɩɛá mlɩdɛbɔ ha mɩ ɩwɩ asʋn ndɛblɩ. Mlɩ atɔtɔhɛ-afɔdɩɛ ɩbʋ mɩ ansɩtɔ bregyibrɛ.

⁹ Tamɛ hɔ mmɔ́ɔhɔ mlɩ nnantswie mʋ́a mlɩ akpala,

¹⁰ tsufɛ pututɔ mʋ́a abʋsʋ mbwɩ fɛ́ɛ́ bʋgyi mɩ klɛ.

¹¹ Mɩbʋ afutɔ mbubwi pʋ́ mbwɩá bʋna ɔsʋlʋsʋ fɛ́ɛ́.”

¹² “Nɩ akʋn dɛ mɩ a, mmɛ́ɛbla mlɩ, tsufɛ mɩbʋ ɔyɩ mʋ́a mʋ́tɔ atɔ fɛ́ɛ́.

¹³ Ntamawɩ nnantswie aye, ntamanun akpala obugya.

¹⁴ Pʋ ɩpan bɔ afɔdɩɛ ha mɩ, afʋka akɔá fotsula ha mɩ Ɔsʋsʋʋsʋ Mʋ Wie.

¹⁵ Kpoli mɩ fʋ ɔkplankɛ, nɛ́lɛ fʋ; afʋwa mɩ numnyam.”

¹⁶ Tamɛ Bulu dɛ ɔha lalahɛ mʋ́ fɩtɛ ɔbɛɛ, “Ɔkpa ɔmɔmʋ sʋ fʋdɛ mɩ amandɩɛ blɩ, ntɛ pʋ mɩ ntam dɩnka fʋ ɔnɔsʋ?

¹⁷ Tsufɛ fʋ mʋ́ fʋtamakleá ntswii fʋ. Fʋtɔtswɩ mɩ asʋn ɛ tsalɩfwɩ.

¹⁸ Fowun owikplu fakpla buo mʋ. Fʋa mbʋa atɔpʋ bʋ mba.

¹⁹ Asʋkpan kugyikʋ tɛtalɩ dalɩ fʋ ɔnɔ. Fʋhɩɛ fʋbʋ afunu.

²⁰ Fʋtetsia asɩ blɩ fʋ pio ɩwɩ asʋn. Fʋtɛtalɩ kpɔɩ fʋ yin mʋ bi kʋraa.

²¹ Ɩnɩá fʋdɛ ntobi anfɩ fɛ́ɛ́ bwɛ mmɛkpla fʋ sʋ a, fʋkɩ fɛɛ, ngyi fɛ fʋ. Nɛ́lɛ mʋ́ fɛ́ɛ́ blɩ, wa ɩyɩn wa fʋ ngya.”

²² “Mɩsʋ atanpʋ, mlɩyi ɩnɩ oyibi. Nɩ megyi alɩ nɛ́tɩtɩ mlɩtɔ pransapransa, ɔhɔpʋ ɔkʋkʋ má ɩnʋá ɔbɔ́hɔ mlɩ.

²³ Ɔha ánɩ́ ɔtɔpʋ ɩpan bɔ afɔdɩɛ ha mɩ lawa mɩ numnyam. Ɔha ánɩ́ ɔna yilebwɛ ɔkpasʋ a, mʋ nɔ́hɔ nkpa.”