Israelfɔ Ɩlʋ 5 - Bulu Ntam Pɔpwɛ mʋ́a Israel Ɩlʋ

Nana Bulu Toyula Yile Abwɛpʋ

Dawid kanfʋ-ɩlʋ ha ɩlʋ osunapʋ. Bɔ́pʋ ɔtɛntɛ fʋlɩ mʋ́.

¹ Oo Nana Bulu, yaa asʋ. Nu mɩ asʋn, afʋnu mɩ isu.

² Mɩ Wie pʋ́ mɩ Bulu, nu mɩ isu, afʋgyi mɩ bʋalɛ, tsufɛ fʋ ndesu kpoli.

³ Oo Nana Bulu, bakɛ fónu mɩ ɔmɛ. Nɔ́pʋ mɩ asʋn tswɩ fʋ ansɩtɔ nyankɩ, si ntsie ndɛ fʋ ansɩtɔ kɩ.

⁴ Oo Bulu, lalahɛbwɛ tamagyi fʋ ansɩ. Fʋtamafia lalahɛ abwɛpʋ.

⁵ Fʋtamakleá fówun ɩwɩ atsupʋ. Fʋtekisi lalahɛ abwɛpʋ fɛ́ɛ́.

⁶ Fʋteyinta afunupʋ, fʋtekisi aha amɔpʋ pʋ́ aha amlɛpʋ.

⁷ Tamɛ fʋ ɔdwɛá ɩma ɔka sʋ, nébitiwie fʋ woyitɔ. Nɔ́pʋ ifu bun sum fʋ fʋ ɔtswɛkpa ɩnʋ.

⁸ Oo Nana Bulu, fʋ asʋn da ɔkpa. Mɩ alupʋ bɔdʋbɩ. Mʋ́ sʋ kpa mɩ, ambwɛ fʋ ɔdwɛla. Suna mɩ fʋ ɔkpa, antsʋn mʋ́sʋ.

⁹ Bʋtamablɩ ɔnɔkwalɩ kʋkʋ. Lalahɛ pɛ bʋ amʋ́ ɩklʋntɔ. Amʋ́ ɔnɔtɔ asʋn blɩhɛ tobon fɛ fuli ɔbɔtɔ. Bʋtɔpʋ amʋ́ ɔnɔ mlɛ aha.

¹⁰ Oo Bulu, ha amʋ́ ɩpɔn! Amʋ́ onuto agywɩɩn lalahɛ ɩtɩ lowu ha amʋ́. Amʋ́ lakpan tsɔtsɔɔtsɔ pʋ́ alɩá bakʋsʋ lɩɩ fʋsʋ, sʋ gya amʋ́ lɛ fʋ ansɩsʋ.

¹¹ Tamɛ ha aha ánɩ́ bʋtɛsrɩ tanʋ fʋ fɛ́ɛ́ abʋnya ansigyi. Ha amʋ́ abʋwa ansigyi ɩlʋ. Bun amʋ́sʋ, mɛnɩ ansɩ bégyi fʋ adwɛpʋ fɛ́ɛ́.

¹² Tsufɛ Nana Bulu, fʋtoyula yile abwɛpʋ. Fʋ awɩtɔlɛ legyi ɩban bomli amʋ́.