Israelfɔ Ɩlʋ 49 - Bulu Ntam Pɔpwɛ mʋ́a Israel Ɩlʋ

Nyankpʋsa Onya Atɔ Alɩágyialɩá Oméetsia Nkpa Yɔ

Kora abi kanfʋ-ɩlʋ ha ɩlʋ osunapʋ.

¹ Mlɩ ɔmá fɛ́ɛ́, mlɩnu asʋn anfɩ! Ɔyɩtɔ atsiapʋ fɛ́ɛ́, mlɩyaa asʋ.

² Nyebi-ahandɛ, ɩwɩ anyapʋ pʋ́ ahianfɔ fɛ́ɛ́!

³ Tsufɛ nɛba bɛblɩ nyansala, mɩ nwuntɔ asʋn ɩbɛ́ha asʋn-asɩnu.

⁴ Nɛ́yaa asʋ nu ayebi. Nɔ́pʋ ɔsankuo lɛ ɔtɛ kutuklu asɩ.

⁵ Nɩ nowie ɩkplantɔ, mɩ amlɛpʋ bɛkafia mɩ a, ntogyi sʋ nénya ifu?

⁶ Ɩwɩ anyapʋ anfɩ bapʋ ansɩ dɩnka amʋ́ ɩnyasʋ, bʋdɛpʋ amʋ́ atɔ tsɔtsɔɔtsɔ tsu ɩwɩ.

⁷ Ɔhaa mɛ́ɛtalɩ ka lɛ mʋ pio. Ɔhaa mɛ́ɛtalɩ ka Bulu ɩkɔ, pʋhɔ mʋ pio nkpa.

⁸ Tsufɛ ɔha ka lɛ ibia mɛda asɩ. Mátepi bwɛ mʋ́ ɩwɩ agywɩɩn,

⁹ fɛɛ, ilehian ánɩ́ ɔha obétsia nkpa brɛ fɛ́ɛ́, ɔmɔ́ɔyɔ fuli-ɔbɔtɔ ɛkɛkɛɛkɛ.

¹⁰ Ɔhagyiɔha towun ánɩ́ anyansapʋ bʋtowu. Aha mimlahɛ pʋ́ aha gyɩmɩhɛ ɛ bʋtowu, si amʋ́ atɔ ha aha bamba.

¹¹ Ɩbʋ mʋ́tɔá bʋtɔpʋ amʋ́ ada dɩnka amʋ́ ɔsʋlʋsʋ, tamɛ ntsantɔ gyi amʋ́ otsiakpa brɛ fɛ́ɛ́.

¹² Nyankpʋsa ɔhɩhɩɛ ɩwɩ alɩágyialɩá a, oméetsia nkpa yɔ. Ogyi fɛ ɔbwɩ, ɔtɔkɔsɩ wu.

¹³ Alɩ ɩtɛba ha aha mimlahɛ anfɩ, pʋ́ aha ánɩ́ bʋtegyi amʋ́ asʋnsʋ nɩ. Ɩya.

¹⁴ Bʋgyi fɛ akufa. Amʋ́ ɔyɔkpa gyi afulitɔ. Lowu ɔbɔ́bwɛ amʋ́ ɔkpapʋ. Aha ánɩ́ amʋ́ asʋn da ɔkpa bégyi amʋ́sʋ nyankɩ. Amʋ́ ɔyʋlʋ bɔ́plɔ fɛ́ɛ́, ɩmɛ́ɛtra dɩ amʋ́ ɔsʋlʋsʋ. Afulitɔ ɔbɔ́bwɛ amʋ́ woyi.

¹⁵ Tamɛ mɩ mʋ́ a, Bulu ɔbɛ́ka lɛ mɩ afulitɔ, tsufɛ ɔbɔ́hɔ mɩ. Ɩya.

¹⁶ Nɩ ɔkʋ atonyahɛ imoni, numnyam ɩba mʋ woyisʋ alɩágyialɩá a, ɩmáhan fʋ.

¹⁷ Tsufɛ nɩ owu a, omóotsu kʋkʋ natɩ. Mʋ numnyam ɛ ɩmɛ́ɛkpa mʋ ya.

¹⁸ Nɩ ɔtɛkɩá mʋbʋ ansigyitɔ ɔyɩ anfɩtɔ, aha bʋtɛkanfʋ mʋ ánɩ́ oyin mʋ ɩwɩsʋ kɩ kʋraa a,

¹⁹ obówu yɔ mʋ asɩtɔ. Ɔmɛ́ɛtra wun wankɩ ɛkɛkɛɛkɛ.

²⁰ Nyankpʋsa ɔhɩhɩɛ ɩwɩ alɩágyialɩá a, oméetsia nkpa yɔ. Ogyi fɛ ɔbwɩ, ɔtɔkɔsɩ wu.