Israelfɔ Ɩlʋ 48 - Bulu Ntam Pɔpwɛ mʋ́a Israel Ɩlʋ

Bulu Otsiakpa Sion

Kora abi kanfʋ-ɩlʋ.

¹ Nana Bulu lomoni. Ɩlɛkana ánɩ́ bɛ́hɩɛ kanfʋ mʋ. Bɛ́kanfʋ mʋ mʋ wulutɔ, igyi wuluá ɩdɩn mʋ onuto ɩbʋ amʋsʋ.

² Sion ɩbʋ lɔfʋa, ɩhɩɛ bʋ akɩlɛ. Ɩbʋ ɔyɩtɔ aha fɛ́ɛ́ ansigyi. Sion ɩbʋ igyi Bulu otsiakpa. Igyi owie otumipʋ kpɔnkpɔntɩ wulu.

³ Bulu onuto bʋ awie amʋ woyitɔ. Alalɛ ɩwɩ ɔwan ánɩ́ mʋgyi ɔtanʋkpa kinkin ha mʋ́.

⁴ Kɩ, awie bɛtɩ aba fia, kʋsʋ yɔ wulu anfɩ ɔkɔkpa.

⁵ Tamɛ brɛá bowun mʋ́ a, opuni letsii amʋ́. Begyigya, yinki srɩ.

⁶ Bɛkpɩnkɩ kpakpakpakpa, fɛ ɩkwɩɩ dɛ ɔtsɩ dwiin.

⁷ Fɛ alɩá atsufu totsu owi ɔdalɩkpa bobwiebwie Tarsisfɔ ɔpʋsʋ-ayɛn.

⁸ Asʋn amʋʋ anɩlonu amʋ anɩlawun a. Ɩsa Ɔnɔ Ɔlɩɩpʋ Nana Bulu wulu nɩ. Anɩ Bulu amʋ wulu nɩ. Ɔbɛ́ha ɩbɛ́lɩɩ kinkin brɛ fɛ́ɛ́. Ɩya.

⁹ Oo Bulu, anɩdɛ fʋ ɔdwɛá ɩma ɔka ɩwɩ gywɩɩn fʋ ɔtswɛkpa ɩnʋ.

¹⁰ Oo Bulu, alɩ amʋʋ fʋ ɩda bʋ ɔtɩnɛgyiɔtɩnɛ amʋ a, alɩ kɛn bʋtɛkanfʋ fʋ yɛtʋ ɔyɩ ɔka nɩ. Yilebwɛ labʋla fʋ gyɔpɩ.

¹¹ Ha ansɩ igyi Sionbʋsʋ atsiapʋ, ansɩ igyi Yuda awulu, tsufɛ fʋtobua asʋn ɔnɔkwalɩsʋ.

¹² Mlɩnatɩ tsʋntsʋn Sion. Mlɩki bomli mʋ́ fɛ́ɛ́, amlɩkla mʋ́tɔ mbu fʋahɛ.

¹³ Mlɩlɛ ansɩ kɩ mʋ́ abunti wanklaan. Mlɩkɩ awie-woyi amʋ wanklaan. Fówun mlɔ́pʋbla mlɩ abi-aná mlɩaa,

¹⁴ “Alɩ Bulu gyi nɩ. Mʋgyi anɩ Bulu brɛ fɛ́ɛ́. Ɔbɛ́kpa anɩ yɛfʋn anɩ owukɛ.”