Israelfɔ Ɩlʋ 47 - Bulu Ntam Pɔpwɛ mʋ́a Israel Ɩlʋ

Owie Kpɔnkpɔɔnkpɔntɩ Bulu Gyi Ɔyɩsʋ

Kora abi kanfʋ-ɩlʋ ha ɩlʋ osunapʋ.

¹ Ɔmá fɛ́ɛ́, mlɩpʋ ansigyi da apian, amlɩtswɩ ope kanfʋ Bulu,

² tsufɛ Nana Bulu, Ɔsʋsʋʋsʋ mʋ Wie amʋ ɩwɩ bʋ ifu. Owie kpɔnkpɔɔnkpɔntɩ ogyi ɔyɩ fɛ́ɛ́sʋ.

³ Ɔtɛba ɔmá-ɔmá asɩ, pʋ amʋ́ wa anɩ asɩ. Ɔlɛha anɩlegyi ɔmá fɛ́ɛ́sʋ.

⁴ Otekle anɩ Yakob abi-aná asʋn. Mʋ́ sʋ ɔlɛlɛ ɔsʋlʋá igyi anɩ ogyikpa ha anɩ, anɩtɔpʋtsu ɩwɩ. Ɩya.

⁵ Bulu lɔpʋ ansigyi dʋ ɔyɔ. Nana Bulu lɔdʋ ɔyɔ, bʋdɛ okitikiti, ɩkpɛ dɛfʋlɩ.

⁶ Mlɩwa ɩlʋ kanfʋ Bulu, amlɩtswɩ ope ha mʋ. Mlɩwa ɩlʋ kanfʋ anɩ Owie. Mlɩwa ɩlʋ kanfʋ mʋ,

⁷ tsufɛ Bulu gyi ɔyɩ fɛ́ɛ́ Owie. Mlɩwa ɩlʋ sunahɛ ha mʋ.

⁸ Bulu tsie mʋ onuto owie-obiasʋ, ɔdɛ ɔmá fɛ́ɛ́sʋ gyi.

⁹ Ɔmásʋ agyipʋ bafia. Abraham Bulu aha bafia, tsufɛ Bulu bʋ́ ɔyɩtɔ awie fɛ́ɛ́. Batsu mʋ fʋa ɔtɩnɛgyiɔtɩnɛ.