Israelfɔ Ɩlʋ 45 - Bulu Ntam Pɔpwɛ mʋ́a Israel Ɩlʋ

Owie Ɔkatsia Ɩlʋ

Kora abi atosuna ɩlʋ ha ɩlʋ osunapʋ. Dimbisʋ-saprada ɔmɛ bɔ́pʋwa mʋ́. Ɔdwɛ-ɩlʋ.

¹ Ɩlakɩta mɩ ɩklʋn ánɩ́ nɔ́wanlɩn owie ɩwɩ ɩlʋ. Mɩ ɔdandʋ bʋ ɔsa, fɛ atɔ ɔwanlɩnpʋ ɩbɩ.

² Nanain, ɔhaa má akɩlɛ ɔyasubi fɛ fʋ! Asʋn ánɩ́ ɩbʋ anulɛ bɔ fʋ ɔnɔ. Bulu layula fʋ brɛ fɛ́ɛ́.

³ Otumipʋ, tsu fʋ ɔdayi tsan. Kɩta fʋ numnyam pʋ́ fʋ iwiegyitɔ.

⁴ Kɩta fʋ iwiegyitɔ, afʋkɔ yɔ nkpa. Kɔ ha ɔnɔkwalɩ mʋ́a yilebwɛ pʋ́ ɩwɩasɩba. Fʋ gyɔpɩ ɩlɛ fʋ ofula ɔwan.

⁵ Fʋ mbɩn pɩɔnpɩɔn ifuti fʋ alupʋ klʋn, ɔmá-ɔmá abʋba ɩwɩasɩ fʋ ansɩtɔ.

⁶ Oo Bulu, fʋ owie-obia mɛ́ɛta ɛkɛkɛɛkɛ. Ɔnɔkwalɩ gyi fʋ akɔnfra.

⁷ Fʋtekle yilebwɛ. Lalahɛbwɛ mʋ́ a, fʋtekisi. Mʋ́ sʋ fʋ Wie Bulu lada fʋ ofuli, pʋ ansigyi bʋla fʋtɔ dʋn fʋ aba.

⁸ Ohuam, pɩprɩ, ɔhɩɛn pʋ́ atɔ fanfan ɩdɛ ɔfan wa fʋ atadɩɛ tɩntɩntɔ fanfaanfan. Owie woyiá bɔpʋ srʋfɔ-ɩsɛn hɩhɩɛ mʋ́tɔ, ndondo aná dɛ mʋ́tɔ tsia bʋ fʋ ɔdwɛ.

⁹ Awie abi tsɩhɛ bʋbʋ fʋ akatɔ. Ɔtsɩá owie detsia lɔwa Ofir sika atɔ wanklaan, ɔlɩɩ fʋ gyɔpɩsʋ.

¹⁰ Ɔtsɩ, kɩ, yaa asʋ afʋnu. Tan fʋ abusuanfɔ pʋ́ fʋ sɩ woyisʋ,

¹¹ mɛnɩ owie ansɩ bégyi fʋ ɩwɩ. Fʋ wie nɩ. Mʋ́ sʋ ba ɩwɩasɩ ha mʋ.

¹² Tirofɔ bɔ́sʋra atokiehɛ ba. Ɔyɩtɔ ɩwɩ anyapʋ bɔ́pɔpɔ fʋ.

¹³ Owie mʋ bi tsɩhɛ onumnyampʋ anfɩ tsie obutotɔ. Ɔlɔwa atadɩɛ tɩntɩn ánɩ́ bɔpʋ sika pɛpɛ lʋ mʋ́.

¹⁴ Ɔlɔwa atadɩɛ tɩntɩn ánɩ́ ɩhɩɛ bʋ akɩlɛ, bakpa mʋ bɛya owie amʋ. Mʋ aba mbitebi bʋbuo mʋ.

¹⁵ Ansigyi mʋ́a oseyee bapʋkpa mʋ bɛya owie-woyitɔ.

¹⁶ Nanain, fʋ abi yinhɛ bétsia fʋ asɩ́ mbiasʋ. Fɛ́yaɩ amʋ́ awie ɔmá-ɔmátɔ.

¹⁷ Bulu ɔbɛ́ha abi-aná fɛ́ɛ́ bɛ́kaɩn fʋ ɩdasʋ. Ɩnɩ sʋ ɔmá-ɔmá bɛ́kanfʋ fʋ brɛ fɛ́ɛ́.