Israelfɔ Ɩlʋ 40 - Bulu Ntam Pɔpwɛ mʋ́a Israel Ɩlʋ

Bulu Lɔpʋ Mʋ Kanfʋ Ɩlʋ Pɔpwɛ Wa Mɩ Ɔnɔ

Dawid kanfʋ-ɩlʋ ha ɩlʋ osunapʋ.

¹ Nenya ɩklʋn tsia gyo Nana Bulu. Ɔlɛyaa asʋ mɩ wa, nu mɩ asʋn, sɔ mɩ ɔnɔ.

² Olotsu mɩ lɛ lowu ɔbɔtɔ. Ɔlɛlɛ mɩ lɛ ɔdɩba makpiitɔ. Ɔlɔpʋ mɩ lɩɩ ɩbʋtasʋ. Nɩ nna a, ntenya anatɩlɛ.

³ Ɔlɔpʋ anɩ Bulu kanfʋ ɩlʋ pɔpwɛ wa mɩ ɔnɔ. Aha tsɔtsɔɔtsɔ bówun nya ifu, pʋ ansɩ dɩnka Nana Bulusʋ.

⁴ Ansɩ igyi ɔha ánɩ́ ɔlɔpʋ ansɩ dɩnka Nana Bulusʋ, ɔmɔpʋdɩnka ɩwɩ atsupʋ ntɛ ɩkpɩ asumpʋsʋ.

⁵ Oo Nana Bulu, mɩ Bulu, ofula tsɔtsɔɔtsɔá fabwɛ ha mɩ, pʋ́ atɔá fahɩɛ ha mɩ lɔdʋbɩ. Tɔtɔ má ɩnʋá nɔ́pʋkapʋ fʋ. Nɩ mbɛɛ, mbwii ɔnɔ blɩ mʋ́ a, ɩma ɩklatɔ.

⁶ Atɔtɔhɛ-afɔdɩɛ mʋ́a lakpan-afɔdɩɛ tamagyi fʋ ansɩ. Faha nawun ánɩ́ fʋtamakle mbwɩá bapʋ amʋ́ bɔ ogya-afɔdɩɛ pʋ́ lakpan-afɔdɩɛ.

⁷ Mʋʋ nɛblɩ mbɛɛ, “Nanaa. Nɛba bɔbwɛ fʋ ɔdwɛla, fɛ alɩá bɔwanlɩn mɩ ɩwɩ asʋn wa fʋ asʋn wanlɩnhɛ amʋtɔ.

⁸ Oo mɩ Bulu, ɩbʋ mɩ ɔdwɛá nɔ́bwɛ fʋ ɔdwɛla, tsufɛ fʋ atosunahɛ ɩdɩn mɩ ɩklʋnsʋ.”

⁹ Nada fʋ yilebwɛ ɔkan fʋ aha tsɔtsɔɔtsɔ ansɩtɔ anɩ ɔpasuatɔ. Nana Bulu, fʋ onuto fʋyin ánɩ́ mmɔkʋkpa ɔnɔ bun.

¹⁰ Mmesi fʋ yile ŋain mɩ ɩklʋntɔ. Nɛkpalɩ fʋ ɔnɔkwalɩwa pʋ́ fʋ nkpahɔ ɩwɩ asʋn. Mmesi fʋ ɔdwɛá ɩma ɔka pʋ́ fʋ ɔnɔkwalɩ ŋain fʋ aha tsɔtsɔɔtsɔ ansɩtɔ, anɩ ɔpasuatɔ.

¹¹ Oo Nana Bulu, mákina mɩ nwɛ wun ɛkɛkɛɛkɛ. Ha fʋ ɔdwɛá ɩma ɔka pʋ́ fʋ ɔnɔkwalɩ ɩkpa mɩ brɛ fɛ́ɛ́.

¹² Asʋn wunhɛ tsɔtsɔɔtsɔ labomli mɩ, ɩma klatɔ. Mɩ lakpan lamli atɔ sʋrahɛ ha mɩ. Ɩlaha ntra mmɛdɛ atɔ wun. Ɩtsɔ dʋn mɩ nwunsʋ-imi, ɩlakpɔn mɩ.

¹³ Oo Nana Bulu, tsula bɔhɔ mɩ! Nana Bulu, wa ɔsa begyi mɩ bʋalɛ.

¹⁴ Ha pɛlɩ ɩkɩta aha ánɩ́ bʋdɛ mɩ lowu kle, amʋ́ nwun ikotsoli. Ha aha ánɩ́ bʋdekleá bɔ́pʋ lalahɛ gyi mɩ abʋpʋ nsʋpa yinki.

¹⁵ Ha ansɩ iwu aha ánɩ́ bʋdɛ mɩ ɩwɩ asʋn blɩ bɛɛ, “Ɛhɛɛn, ɛhɛɛn, anɩlanya mʋ!”

¹⁶ Tamɛ ha ɩwɩ ɩsankɩ aha ánɩ́ bʋtodunka fʋ fɛ́ɛ́, abʋnya fʋ ɩwɩ ansigyi. Ansɩ igyi aha ánɩ́ fʋ nkpahɔ legyi amʋ́ ansɩ, abʋkplʋn blɩ lablɩ bɛɛ, “Nana Bulu lomoni!”

¹⁷ Mɩ mʋ́ a, ohiani ngyi, mma tɔtɔ. Bulu, gywɩɩn mɩ ɩwɩ. Mɩ Bulu, fʋgyi mɩ bʋalɛ ogyipʋ pʋ́ mɩ ɔlɛpʋ. Mási tsia mʋ́sʋ.