Israelfɔ Ɩlʋ 37 - Bulu Ntam Pɔpwɛ mʋ́a Israel Ɩlʋ

Ɩwɩasɩ Abapʋ Obégyi Ɔsʋlʋ Amʋ

Dawid ɩlʋ.

¹ Mákpla lakpan abwɛpʋ. Lalahɛ abwɛpʋ tɔtɔ mápɛ fʋ ansɩ,

² tsufɛ ɩmɔ́ɔwa ɔpá kʋkʋ bɔ́bʋ fɛ ɩfa, wʋlɩ fɛ ɔsʋlʋkpan.

³ Pʋ ansɩ dɩnka Nana Bulusʋ, afʋbwɛ yile. Tsia ɔsʋlʋ amʋsʋ, ɩwa alɛ ha fʋ.

⁴ Ansɩ igyi fʋ Nana Bulu ɩwɩ, mɛnɩ ɔbɛ́ha fʋ tɔá fʋ ɩklʋn dekle.

⁵ Pʋ fʋ ɩwɩ wa Nana Bulu ɩbɩtɔ, afʋpʋ ansɩ dɩnka mʋsʋ, ɔbɔ́bwɛ mʋ́ ha fʋ.

⁶ Ɔbɛ́ha fʋ yilebwɛ ɩbɛ́lɩn ɔwan fɛ ɔyɩkɛhɛ, fʋ asʋngyi ɛ ɩbɔ́wankɩ fɛ ɔpawi.

⁷ Nya ɩklʋn ha Nana Bulu, tsia gyo mʋ. Nɩ ɩdɛ alɛ wa ha ɔkʋ, ntɛ ɔkʋ ɔtsʋn ɔkpa lalahɛsʋ nya ɩwɩ a, mákpla mʋ.

⁸ Mánya ɔblɔ. Lɛ ɔblɔkpan lɛ fʋtɔ. Mákpla mʋ, ɩtɛkpa ɔha wa lalahɛtɔ.

⁹ Tsufɛ aha lalahɛ bɛ́ta, tamɛ aha ánɩ́ bɔpʋ ansɩ dɩnka Bulusʋ obégyi ɔsʋlʋ anfɩ.

¹⁰ Ɩlasi kpalobi aha lalahɛ bʋmɛ́ɛtra tsia. Fódunka amʋ́ fʋmóowun amʋ́.

¹¹ Ɩwɩasɩ abapʋ obégyi ɔsʋlʋ amʋ, ɩwɩ bɛ́hɩɛ lwii amʋ́.

¹² Ɔha lalahɛ tɛkan yile ɔbwɛpʋsʋ, pɩɛɩ ayin suna mʋ,

¹³ tamɛ anɩ Wie dɛ mʋ mɔsɩ, tsufɛ oyin ánɩ́ mʋ nkɛ lawie woyi ta.

¹⁴ Aha lalahɛ balɛ amʋ́ ɔflɛtɔ ɔdayi. Babɩtɩ amʋ́ ɩta, bʋdekleá bɛ́lɛ ahianfɔ pʋ́ apɔnpʋ da; abʋmɔ aha ánɩ́ amʋ́ asʋn da ɔkpa.

¹⁵ Bulu ɔbɛ́ha amʋ́ onuto ɔdayi békpie amʋ́ ɩklʋn, amʋ́ ɩta ɛ bébiabia.

¹⁶ Atɔ kpalobiá ɔha yile bʋ legyi ansɩ, dʋn aha lalahɛ tsɔtsɔɔtsɔ atɔ.

¹⁷ Nana Bulu tɛkpa lalahɛ ɔbwɛpʋ ɩba, tamɛ ɔtɔwa yile ɔbwɛpʋ ɔwʋnlɩn.

¹⁸ Nana Bulu tɛkɩ ɔha ánɩ́ ɔlala ma mʋ ɩwɩsʋ ekekegyiɛkɛ. Mʋ ogyikpa bétsia brɛ fɛ́ɛ́.

¹⁹ Ɔtamawa mʋ pɛlɩtɔ mʋ ɩkplanbɩ. Akʋnbɩ kʋraa a, ɔtɛha mʋ atɔ otegyi mwɛ.

²⁰ Aha lalahɛ bɛ́ta. Nana Bulu alupʋ bʋgyi fɛ mbwɩ ogyikpa ɩfa ntswɩtswɩ. Bʋtɔkɔsɩ fwɩ fɛ ogyasi.

²¹ Ɔha lalahɛ ɔpan ɔtamaka, tamɛ yile ɔbwɛpʋ mʋ́ bʋ awɩtɔlɛ, otekie atɔ.

²² Ɔhagyiɔha ánɩ́ Bulu oyula obégyi ɔsʋlʋá alaha mʋ, tamɛ ɔha ánɩ́ Bulu ɔlwɩɩ obówu.

²³ Nana Bulu tɛkɩ ɔha ayabi ɔtsakpa, mʋ bwɛhɛ tegyi mʋ ansɩ.

²⁴ Nɩ ɔdɩda kʋraa a, ɔtamasin ɔsʋlʋtɔ; tsufɛ Nana Bulu dɛ mʋ ɩbɩ.

²⁵ Tɛkɩ kebi ngyi brɛ amʋ, sei nadan. Tamɛ mmɔkʋnu ɛkɛkɛɛkɛ bɛɛ, Bulu lakpa ɔha yile ɔma. Ntɛ mʋ abi bakʋlɩ atogyihɛ.

²⁶ Yile ɔbwɛpʋ bʋ awɩtɔlɛ. Otekie atɔ, ɔtɔpʋ atɔ pan aha. Mʋ́ sʋ mʋ abi bénya oyula.

²⁷ Si lalahɛ bwɛ, afʋbwɛ yile, mɛnɩ fétsia ɔsʋlʋ amʋsʋ brɛ fɛ́ɛ́.

²⁸ Tsufɛ Nana Bulu tekle asʋngyi ɔnɔkwalɩsʋ. Ɔmɛ́ɛkpa aha ánɩ́ bʋtamayinki mʋ ɔma, ɔma ɛkɛkɛɛkɛ. Ɔbɛ́kɩta amʋ́ kɔnkɔn ɩbrɛ fɛ́ɛ́, tamɛ aha lalahɛ asɩ bɛ́ta.

²⁹ Yile abwɛpʋ obégyi ɔsʋlʋ amʋ, tsia mʋ́sʋ brɛ fɛ́ɛ́.

³⁰ Nyansa asʋn tɛdalɩ ɔha yile ɔnɔ, otegyi asʋn ɔnɔkwalɩsʋ.

³¹ Mʋ Bulu atosunahɛ bʋ mʋ ɩklʋntɔ. Mʋ́ sʋ ɔtamasrɛɩ dalɩ mʋ ɔkpasʋ ɛkɛkɛɛkɛ.

³² Aha lalahɛ bʋtɛtɛ yile abwɛpʋ, dunka ɔkpa ánɩ́ bɔ́tsʋn mʋ́sʋ mɔ amʋ́.

³³ Tamɛ Nana Bulu méesi amʋ́ wa amʋ́ ɩbɩtɔ, ntɛ ha amʋ́ abʋgyi ɩpɔn asʋn agyipʋ ansɩtɔ.

³⁴ Kɩ Nana Bulu ansɩtɔ, afʋkɩta mʋ mblatɔ. Ɔbɔ́pʋ ɔsʋlʋ amʋ ha fʋ, pʋwa fʋ numnyam. Fówun aha lalahɛ owukpa.

³⁵ Nowun ɔha lalahɛ ɔkʋá ogyi owuntɔlɩnpʋ, alatsu ɩwɩ fʋa, yɛyɛɩ fɛ Lebanon odum lenya ɔlɩɩkpa.

³⁶ Tamɛ nɛlakɩ a, alafwɩ. Nodunka mʋ kʋraa mmowun mʋ.

³⁷ Hɩɛ yile ɔbwɛpʋ nsʋ, afʋlɛ ansɩ kɩ ɔha ánɩ́ mʋ asʋn da ɔkpa, tsufɛ ɔha ánɩ́ ololwii asɩ bɛ́klɛɩ.

³⁸ Tamɛ mblasʋ magyipʋ bɛ́ta. Lalahɛ abwɛpʋ asɩ bótu plɩplɩplɩ.

³⁹ Nana Bulu ɩbɩtɔ yile abwɛpʋ bʋtenya amʋ́ nkpahɔ tsu. Ogyi ɔtanʋkpa ha amʋ́ brɛá bʋbʋ ɩkplantɔ.

⁴⁰ Otegyi amʋ́ bʋalɛ, lɛ amʋ́. Ɔtɛlɛ amʋ́ aha lalahɛ ɩbɩtɔ. Ɔtɔkɔ ha amʋ́, tsufɛ batanʋ mʋ.